SAAMUNƆ.
73.
Asafa lɛ̀. Luda è yã maaa kɛ Isarailinↄnɛ yãpuramɛ, atɛ̃nsa nↄ̀sɛpuradeenↄ. 
Mapi sↄ̃, ma kĩi kũ̀ lɛɛnao, ma gbá yezi à satamɛ yã. 
Kɛ̀ ma zaakɛrinↄ kuuna maaa è, ma ĩadãri pìnↄ gwena ni dɛ̀. 
Yãke è kpáńnɛro, aafia mↄ̀ḿma bensↄ̃ aↄ̃ↄ mɛ̀kpana. 
Aↄ̃è nawɛ̃a kɛ lán danↄ bàro, aↄ̃è gyãa kɛ lán danↄ bàro. 
Aↄ̃è ĩadãna da ń waalɛ lán kãmbɛɛ bà, aↄ̃è pãsĩkɛɛ da pↄ́kãsãa ũ. 
Aↄ̃ swɛ̃̀ kɛ̀ gbãa yãzaakɛnao, yã vãi ń nↄ̀sɛ pà. 
Aↄ̃è gbɛ̃ lalandi kɛ aↄ̃è yã zaaa liḿma, aↄ̃è gbãaa mↄ́ńnɛ ń gwena bítakɛɛ yãnzi. 
Aↄ̃è be: Luda pita wà ↄsi ká, bensↄ̃ aↄ̃ yã bé è ble anduna guu. 
Bee yãnzi wè tá ń kpa, wè yã kɛ̀ aↄ̃ↄ ò píngi sí yãpuraa ũ. 
Aↄ̃è be: Luda é kɛ dɛa à dↄ̃ↄ? Luda Musude dↄ̃na kà lɛn yↄ́? 
Ǹ gwa, zaakɛrinↄ è yãke kã̀hãn kɛro, aↄ̃ gwena ègↄ̃ kaara gurↄ píngimɛ. 
Ase ma nↄ̀sɛ pura pãn yↄ́? Ma a ↄↄ bↄ̀ɛ taarin wásawasa pãmɛↄ́? 
Nɛɛ̀gↄ̃ ma gbɛ̃ɛ gurↄ píngi, nɛɛ̀gↄ̃ ma swã sukãamɛ lán guu e dↄↄ nà. 
Tó ma zɛ kↄ̃n yã beee taka onao, bee égↄ̃ dɛ bↄna n gbɛ̃nↄ kpɛɛ yã ũmɛ. 
Kɛ̀ ma laasuu lɛ̀ yã pìzi mà e mà dↄ̃, à kɛ̀mɛ zĩ'ũ. 
Sé kɛ̀ ma gɛ̃ Luda kúkiin, ben ma wɛ́ɛ gbasa à kɛ̃̀ lán aↄ̃é yãa nà. 
N ń kpá guzãɛa yãpura, nɛɛ̀ ↄ sↄ̃ńzi aↄ̃ lɛ́ɛ wà kaatɛ. 
Aↄ̃è gↄ̃ kaatɛna pↄ́ ũ kãndo, vĩapↄnↄ è ń le aↄ̃ yãao. 
Lán nanaa è gɛ̃ ĩa nà tó gbɛ̃ vù, tó n fɛɛ Dii, ǹ tó aↄ̃ gɛ̃ ĩa lɛ. 
Kɛ̀ ma nↄ̀sɛ yàka, bensↄ̃ ma pↄↄ sia kũ̀, 
ma kɛ yↄ̃nkↄ, má yãke dↄ̃ro, ma gↄ̃nnɛ lán nↄ̀bↄsɛ̃tɛ bà. 
Baa kↄ̃n beeeo mɛɛ̀gↄ̃ kúnyo, ń ma kũna ma ↄplaaa. 
Nɛɛ̀ dↄmɛ aɛ kↄ̃n n lɛ́dammanao, nɛ́ yãa ǹ ma sí ai n gakui guu. 
N baasiro, dén ma wɛ́ɛ dↄzi musuu? N baasiro pↄ́ke nii e ma dɛ anduna guuro. 
Baa tó ma mɛ̀ kↄ̃n ma swɛ̃̀o e yãaa, Ludan ma swɛ̃̀ gbãa'ekii ũ, àmbe ma baka ũ gurↄ píngi. 
Gbɛ̃ kɛ̀ aↄ̃ kɛ̃̀mmaanↄ é mì dɛ, nɛ́ gbɛ̃ kɛ̀ aↄ̃ bↄ̀ n kpɛɛnↄ kaatɛ. 
Luda, ma sↄ̃nzina bé à kɛ̀mɛ nna, Dii Luda, ma n kɛ ma utɛkii ũ, mɛ́ n yãkɛnanↄ tↄ̃kɛ̃ńnɛ.