SAAMUNƆ.
74.
Asafa lɛ̀. Luda, bↄ́yãnzin n giwazi ai gurↄ píngizi? À kɛ̀ dia n pɛ̃tɛ̃ e fɛɛɛ n kpàsa sãanↄzi? 
Ǹ tó gbɛ̃ kɛ̀ n ń sí zaa ziinↄ yã dↄngu, borii kɛ̀ ń bò aↄ̃ gↄ̃̀ n pↄ́ ũunↄ kↄ̃n Zayↄn kpiii kɛ̀ ń kɛ̀ n kúkii ũuo. 
N ibɛɛnↄ n kúkii gbɛ̃̀ wà dàɛ mámmam, ǹ dↄdↄzi ǹ gwa, à gbòro píngi 
N zangurinↄ zↄka dↄ guu kɛ̀ weè danlɛn, aↄ̃ ń zĩnda tuutanↄ pɛ̀ɛ gwe sèeda ũ. 
Wá è, aↄ̃ kpása dↄ musu, aↄ̃ↄe kɛɛ lán wègↄ̃ dàko kɛ̃ɛɛ nà. 
Lí ana maaa kɛ̀ wà nàna n kpɛ́ gũ̀a, aↄ̃ↄ gbɛ̃̀ wà gbòro kↄ̃n kpásao kↄ̃n aadao. 
Aↄ̃ tɛ́ sↄ̃̀ n kúkiia à kwɛ̀, aↄ̃ↄ tò kpɛ́ kɛ̀ n tↄ́ kúa pì gbãsĩ lɛ̀. 
Aↄ̃ bè ń nↄ̀sɛn: Wà ↄ tↄ̃ḿma mámmam. Aↄ̃ tɛ́ sↄ̃̀ wa bùsu aduakɛkpɛnↄa. 
N kpɛ́ sèedanↄ kuu dↄro, annabi ke kuu dↄro. Wégↄ̃ kuu lɛ ai bↄrɛmɛ? Wa gbɛ̃kee dↄ̃ro. 
Luda, nɛ́ tó n ibɛɛnↄ gↄ̃ n yáa dↄↄ ai bↄrɛmɛ? N zangurinↄ égↄ̃ kya kaangu yãana sain yↄ́? 
Bↄ́yãnzin n ↄ kpà n kùlazi? Ǹ ↄ bↄɛ n utan ǹ ń dɛdɛ. 
Ludan ma kína ũ zaa káaku, àmbe è gbɛ̃ mì sí anduna guu. 
Ḿbe n ísiaa zↄ̃̀kↄ̃rɛ kↄ̃n n gbãaao, n kùkuku mìnↄ wìwi í guu. 
N Igipitinↄ kàatɛ gwe, n ń gɛ̀nↄ kpà gbáa nↄ̀bↄnↄa pↄ́blee ũ. 
N swaanↄ bↄ̀ n zɛ́ wɛ̃̀ bianↄnɛ, n swaa kɛ̀ à í babana vĩroo zↄ̃̀kↄ̃rɛ. 
Fãantɛ̃ kↄ̃n gwãavĩo kú n pↄ́ ũ, n mↄvura kↄ̃n ↄfãntɛ̃o kúkii kɛ̀ńnɛ. 
Ḿbe n anduna gulɛzɛkinↄ kɛ̀ píngi, n kwɛɛ kↄ̃n buusiɛo gurↄↄ dìɛ. 
N yá kɛ̀ n ibɛɛnↄ dↄ̀ yãa dↄngu Dii, yↄ̃nkↄↄnↄ kya kà n tↄ́n. 
Ǹton n pↄ̃tɛ̃ɛ kpá nↄ̀bↄ pãsĩnↄaro, n gbɛ̃ wɛ̃ndadeenↄ yã tón sãnguro. 
Ǹ làakari dↄ n bà kuunawaoa, zaakɛ wa bùsu gusaɛnↄↄ pãsĩ píngi. 
Ǹton tó wa gwenawɛ̃ndadeenↄ bↄru kpɛɛ kↄ̃n wíoro, ǹ tó takaasideenↄ kↄ̃n pↄ́nidɛrinↄ n táaki lɛ́. 
Luda, ǹ fɛɛ ǹ gí kↄ̃n n zĩndao, ǹ n yá kɛ̀ yↄ̃nkↄↄnↄↄ e dↄↄ zɛna sai ma dé! 
Ǹton zↄka kɛ̀ n ibɛɛnↄↄ e kaanzi kpá swãkotoro, n zangurinↄ kĩi dìgↄ̃ dↄ yãana sai.