SAAMUNƆ.
77.
Asafa lɛ̀. Ma wii pɛ̀ Ludazi ma à sìsi, ma wii pɛ̀ Ludazi lɛ à ma yã ma. 
Kɛ̀ má kú nawɛ̃a guu ma Dii kii wɛ̀tɛ, ma ↄ sɛ̀ musu gwãavĩ kámmabona sai, ma làakari wè à kpáɛro. 
Kɛ̀ ma laasuu tà Luda kiia, ben ma ã'ã, kɛ̀ ma à yã wàari pà, ben ma suuna kɛ̀. 
N ma wɛ́ɛ tɛ̃̀ iii, ma gↄ̃ bídi guu ma kora yãzi mà o. 
Ma dↄ yã ziinↄn kↄ̃n wɛ̃̀ kɛ̀ gɛ̃̀tɛnↄ. 
Ma laasuu lɛ̀ ma swɛ̃̀ guu gwãavĩ, ma a zĩnda là mà wɛtɛ mà dↄ̃. 
Ma bè: Dii gìwazi mámmann yↄ́? À pↄↄ é kɛwa nna dↄroo? 
À gbɛ̃kɛɛ yã̀a mámmann yↄ́? À yã égↄ̃ fɛɛna gurↄ píngin yↄ́? 
Wa wɛ̃ndagwana yã sã̀ Ludann yↄ́? À pↄ fɛ̃̀wazi, eé sósobi kɛwao dↄroo? 
Ben ma bè: Yã kɛ̀ ↄ̃̀maan yɛ̀. Luda Musude ↄↄ bùsawe. 
Mɛ́ laasuu lɛ́ Dii yãbↄnsaɛnↄa, mɛ́ dↄ yã kɛ̀ à kɛ̀ yãanↄn. 
Mɛ́ n dabuyãkɛnanↄ wàari pá píngi, mɛ́ n yãbitakɛnanↄ da ma swɛ̃̀n. 
Luda, n zɛ́ kú adona. Dii kpare bíta bè à kà lán wa Luda bà? 
Ḿbe Luda yãbↄnsaɛkɛri ũ, n n gbãaa mↄ̀ boriinↄnɛ. 
N n gbɛ̃nↄ mì sì kↄ̃n n gã̀sã gbãaao, wamↄwa Yakubu kↄ̃n Yusufu boriinↄ. 
Kɛ̀ ísia wɛ́ɛ sìnlɛ Luda, kɛ̀ ísia wɛ́ɛ sìnlɛ, ben à kↄ́tↄ kpà, à dègedege ai a lↄ̀n. 
Ludambɛɛ í kwɛ̀ɛ, lapatana kĩi gↄ̃ dↄ musu, n kànↄↄ e fãa loupina ũ. 
N pũtãna kĩi dↄ zàga'ĩa guu, n loupina anduna pù píngi, tↄↄtɛ kɛ̀ gìri, à nìgãnigã. 
N zɛ́ bↄ̀ ísiaan, n gɛ̃kii kɛ̀ í bítanↄ dagura, wèe n kɛ̀sɛgbɛ ero. 
N dↄ n gbɛ̃nↄnɛ aɛ lán sã kpàsa bà Musa kↄ̃n Arunao gãzĩ.