SAAMUNƆ.
84.
Kora boriinↄ lɛ̀. N kúkii maa fá, Dii Zĩ̀kpɛde! 
Mɛ́ɛ Dii ua bɛgɛ kɛɛ ai guu e liima, ma nini kↄ̃n ma mɛ̀o e lugaa Luda Wɛ̃̀ndidezi. 
Dii Zĩ̀kpɛde ma Kína ma Luda, baa sã̀tɛ̃ sà dↄ̀ n gbãgbãkii saɛ, taakaso kpɛ́ bò gwe à a nɛ́nↄ kàn. 
Aubarikadeenↄn gbɛ̃ kɛ̀ aↄ̃ↄ kú n ua guunↄ ũ, aↄ̃ègↄ̃ n táaki lɛɛ gurↄ píngi. 
Aubarikadeenↄn gbɛ̃ kɛ̀ aↄ̃ gbãaan n ũunↄ ũ, n ua gana yã kú ń swɛ̃̀ guu. 
Tó aↄ̃ↄe gɛ̃tɛɛ Baka guzurɛla, è gↄ̃ lán guu kɛ̀ ibↄkiinↄ vĩi bà, pↄ́tↄ̃gurↄ lou è tó aubarika dagula. 
Aↄ̃ gana guu aↄ̃ gbãaa ègↄ̃ kaaramɛ ai aↄ̃ gá káo n kiia Zayↄn. 
Dii Luda Zĩ̀kpɛde, ǹ ma aduakɛna sí, ǹ swã kpá ma yãzi, Yakubu Luda. 
Luda, ǹ kína kɛ̀ dɛ wa sɛngbango ũu gwa, ǹ wɛ́ɛ gↄ̃ tɛ́ kí kɛ̀ ń kàzi. 
Kuuna n ua gurↄ doo maamɛ dɛ kuuna gu pãndea gurↄ wàa sↄↄroola. Ma Luda ua zɛ́dãkparikɛɛ sì dɛ kuuna ua lɛdo kↄ̃n zaakɛrinↄola. 
Dii Ludaa dɛńnɛ ↄfãntɛ̃ kↄ̃n sɛngbangoo ũ, Dii è gbɛ̃kɛɛ kɛńnɛ kↄ̃n bɛ̀ɛo, è gí pↄ́ maaa kpá taarisaideenↄaziro. 
Dii Zĩ̀kpɛde, aubarikadeen gbɛ̃ kɛ̀ èe n náanɛ kɛɛ ũ.