SAAMUNƆ.
92.
Kámmabogurↄ lɛ̀. À maa wà n sáabu kpá, Dii, wà lɛ̀ sí wà n tↄ́ bↄ, Luda Musude, 
wà n gbɛ̃kɛɛ tↄ̃kɛ̃ kↄngↄ, wà n náanɛkɛyã o gwãavĩ, 
wà n táaki lɛ́ kↄ̃n mↄrↄo kↄ̃n kuntigi ↄ́ nnaao. 
N yãkɛnanↄ è ma pↄↄ kɛ nna, Dii, mɛɛ̀ guda dↄ n ↄzĩkɛnanↄa. 
Dii, n yãkɛnanↄ bíta maamaa, n laasuunↄↄ zã̀ à kɛ̀ bíta. 
Yↄ̃nkↄↄ yã pì dↄ̃ro, mìsaidee é fↄ̃ à dↄ̀rↄ dↄ̃ro. 
Baa tó gbɛ̃ zaaanↄ fɛ̀ɛ wà gbã̀ lán sɛ̃̀ bà bensↄ̃ zaakɛrinↄ kaarana è ń píngi, aↄ̃ ziaa nɛ́ kaatɛna yãanasaimɛ. 
Mmↄn sↄ̃ Dii, nɛɛ̀gↄ̃ kú musu gurↄ píngi. 
Ǹ gwa, n ibɛɛnↄↄ e yãaa, zaakɛrinↄↄ e fãakↄ̃a ń píngi. 
N ma gba gbãaa lán zùsɛ̃tɛ bà, n nↄ́si maaa kù ma mìa. 
Ma wɛ́ɛ sì ma wɛ̀tɛrinↄ lɛɛnalɛ, ma swã ma ibɛɛ zaaanↄ wiii mà dↄ. 
Gbɛ̃ maaanↄ é gbã lán damina línↄ bà, aↄ̃é kɛ bíta lán Lɛbanↄ sida línↄ bà. 
Aↄ̃ pɛna Dii bɛɛ guu, aↄ̃é gbã wa Luda ua. 
Baa kↄ̃n ń zikũkɛɛo aↄ̃égↄ̃ nɛ́ iimɛ, aↄ̃ lá égↄ̃ tɛ́ kɛɛ sí plɛ̀plɛ. 
Aↄ̃é be, Dii maa, àmbe wa gbɛ̀si ũ, zaa kee kú à guuro.