SAAMUNƆ.
97.
Dii bé èe kí blee! Tↄↄtɛdeenↄ pↄnnaa kɛ, ísiabaadeenↄ gↄ̃ kú pↄnnaa guu. 
Ludambɛ sia kↄ̃n gusia níginigio ligazi, maakɛ kↄ̃n yãzɛdeeon à kpata kãsãa ũ. 
Tɛ́ ègↄ̃ kũu à aɛ, è ibɛɛ kɛ̀ aↄ̃ↄ ligazinↄ kpata. 
À loupina è tↄↄtɛ pu, tó anduna è, è luga. 
Kpiiinↄ è yↄ́ lán zↄ́sa bà Dii aɛ, anduna píngi Dii aɛ. 
Musudeenↄ è à maakɛɛ kpàakpa kɛ, bori sãnda píngi è à gakui e. 
Wí è tãagbãgbãrinↄ kũ ń píngi, gbɛ̃ kɛ̀ aↄ̃è ĩa dã kↄ̃n pↄ́ ginanↄ. Tãanↄ é dↄnzi kɛnɛ ń píngi. 
Zayↄndeenↄↄ mà wà pↄnnaa kɛ̀, Yuda wɛ́tɛdeenↄↄ kú pↄnnaa guu n yãkpaɛkɛnanↄ yãnzi, Dii. 
Zaakɛ ń kú musu dɛ anduna píngila, Dii, ń dɛ tãanↄla ń píngi. 
Dii ye gbɛ̃ kɛ̀ aↄ̃ zà yã zaaannↄzi, ègↄ̃ a yãmarinↄ wɛ̃̀ndi dãkpa, è ń bↄ zaakɛrinↄ ↄzĩ. 
Guu è dↄ gbɛ̃ maaanↄa, nↄ̀sɛpuradeenↄↄ pↄnnaa vĩ. 
Gbɛ̃ maaanↄ, à pↄnnaa kɛ Dii guu, à à tↄ́ kɛ̀ kú adona bↄ.