SAAMUNƆ.
104.
Ma swɛ̃̀, ǹ Dii sáabu kpá. Dii ma Luda, ń bíta maamaa, ń gakui dana pↄ́kãsãa ũ, èe tɛ́ kɛɛ, 
n gupuraa kùnla lán bisa bà, n musu kpàɛ lán pɛ̀ bà, 
n bɛɛ bò ínↄla musu. N ludambɛ luguu kɛ̀ n sↄ̃goro ũ, nɛɛ̀ di ĩa ↄↄa. 
Nɛɛ̀ ĩa kɛ n zĩ̀rinↄ ũ, nɛɛ̀ tɛ́vura kɛ n zĩkɛrinↄ ũ. 
N anduna kàɛ, n à kãsãa pɛ̀ɛ, à nigãna vĩ zikiro. 
N ísiaa dànɛ uta gumusu ũ, í pì dà kpiiinↄla. 
N kpãkɛ̃ í pìzi, ben à bàa lɛ̀, n pataa, ben à nàguzi. 
Kpiiinↄ bↄ̀ gupuraaa, guzurɛnↄ sↄ̃̀ɛ, ben í tà guu kɛ̀ ń dìɛnɛn. 
N lɛ́zɛkii dà í pìnɛ, eé fↄ̃ à vĩàlaro, eé ɛara à da tↄↄtɛla ziki dↄro. 
Nɛɛ̀ tó íbↄkiinↄ í pisi swa'ↄnɛnↄn, ben à í ègↄ̃ bàa lɛɛ kpiiinↄ dagura. 
Sɛ̃̀tɛ pↄ́ píngi ègↄ̃ à í mii, à í è saginↄ í nii kɛ̃ḿma. 
Bãanↄ è sà dↄ swaanↄ saɛ, aↄ̃ègↄ̃ kú à dàko guu, aↄ̃ wiii ègↄ̃ dↄ. 
Zaa n bɛ musu nɛɛ̀ lou gbarɛ kpiiinↄa, n zĩ gbɛ̀ è anduna kã. 
Nɛɛ̀ tó sɛ̃̀ bↄɛ pↄ́kãdeenↄnɛ, nɛɛ̀ tó burapↄnↄ bↄɛ gbɛ̃nteenↄnɛ, nɛɛ̀ pↄ́blee bↄɛńnɛ tↄↄtɛa, 
geepiwɛ̃ɛ kɛ̀ è ń pↄↄ kɛ nnaa kↄ̃n nↄ́si kɛ̀ è ń uu tɛ́ kɛɛo kↄ̃n blɛɛ kɛ̀ è ń gba gbãaao. 
Dii línↄ è mↄdↄ e maamaa, sida lí kɛ̀ à bà Lɛbanↄnↄ. 
Gwen bãanↄ è sà dↄdↄn, zùbaaninↄ è bɛɛ dↄ pini lí musu. 
Kpii lezĩnↄↄ dɛ kpasaanↄ kúkii ũ, gbɛ̀kotoonↄ dɛ gbɛ̀'ɛ̃ɛnↄ utɛkii ũ. 
N mↄvura kɛ̀ gurↄ tàasikɛbↄ ũ kↄ̃n ↄfãntɛ̃ kɛ̀ à a gɛ̃na kpɛ́n gurↄↄ dↄ̃ↄo. 
Nɛɛ̀ tó guu si, ben gwãavĩ è kɛ, lákpɛpↄnↄ è fɛɛ táo píngi. 
Músunↄ è nↄadɛna ↄ́ↄ dↄ, aↄ̃è pↄ́blee wɛtɛ Ludaa. 
Tó ↄfãntɛ̃ bↄ̀ɛ, aↄ̃è lↄↄtɛ aↄ̃ tá daɛ ń tòn. 
Gbɛ̃ntee è bↄ à gá zĩi kɛ, ègↄ̃ yã ma a zĩndaa ai uusiɛ. 
Dii, n yãkɛnanↄↄ pari fá! À píngi bↄ̀ n ↄ̃ndↄ̃ↄ guumɛ, anduna pana kↄ̃n pↄ́ kɛ̀ ń kɛ̀nↄ. 
Ísia kuu, à bíta bensↄ̃ à yàasa, pↄ́ bɛ̃ɛ kɛ̀ kú à guunↄ lɛ́ vĩro, à nɛ́ngo kↄ̃n à bítao píngi. 
Góro'itɛnↄ ègↄ̃ táa oon kↄ̃n kúkukuu kɛ̀ ń kɛ̀ à kↄ̃kↄ̃ o à guuo. 
Pↄ́ pìnↄ è wɛ́ɛ dↄnzi ń píngi lɛ ǹ pↄ́blee kpáḿma a gurↄↄa. 
Nɛɛ̀ kpáḿma, aↄ̃è sɛ́ɛ, nɛɛ̀ ↄ porońnɛ, ben pↄ́ maaanↄ è mↄ́ḿma. 
Tó n mìkpɛɛ zùńnɛ, aↄ̃è bídi kɛmɛ, tó n wɛ̃̀ndi sìḿma, aↄ̃è ga wà ɛara wà tá bùsutin. 
Tó n n Ninii gbàrɛ, pↄ́nↄ è wɛ̃̀ndi e, nɛɛ̀ tó tↄↄtɛ ɛara à kɛ dufu. 
Wà tó Dii gakui gↄ̃ kuu gurↄ píngi, wà tó Dii pↄↄ kɛ nna a yãkɛnanↄa. 
Àmbe è tↄↄtɛ gwa, ben è dege, è ↄ kɛ kpiiinↄa, ben tɛ́sukpɛ è bↄ. 
Mɛ́ lɛ̀ sí Diinɛ ai ma wɛ̃̀ndi lɛ́n, mɛ́ ma Luda táaki lɛ́ ai ma gurↄ lɛ́n. 
Ǹ tó ma laasuu kánnɛ, Dii, lán mɛ́ɛ pↄnnaa kɛnyo nà. 
Durunkɛrinↄ mì dɛ anduna guu, zaakɛrinↄ tóngↄ̃ kuu dↄro. Ma swɛ̃̀, ǹ Dii sáabu kpá. Aleluya!