SAAMUNƆ.
136.
À Dii sáabu kɛ, zaakɛ à maa, à gbɛ̃kɛɛ yãana vĩro. 
À Luda kɛ̀ dɛ tãanↄla sáabu kɛ, à gbɛ̃kɛɛ yãana vĩro. 
À Dii kɛ̀ dɛ diinↄla sáabu kɛ, à gbɛ̃kɛɛ yãana vĩro. 
Àmbe è dabuyã bítanↄ kɛ ado, à gbɛ̃kɛɛ yãana vĩro. 
À musu kɛ̀ kↄ̃n a ↄ̃ndↄ̃ↄo, à gbɛ̃kɛɛ yãana vĩro. 
À tↄↄtɛ kàɛ í musu, à gbɛ̃kɛɛ yãana vĩro. 
À pↄ́gupuri bítanↄ kɛ̀, à gbɛ̃kɛɛ yãana vĩro. 
À ↄfãntɛ̃ kɛ̀ à kí ble fãantɛ̃, à gbɛ̃kɛɛ yãana vĩro. 
À mↄvura kↄ̃n sↄsↄnɛnↄ kɛ̀ aↄ̃ kí ble gwãavĩ, à gbɛ̃kɛɛ yãana vĩro. 
À Igipiti daudunↄ dɛ̀dɛ, à gbɛ̃kɛɛ yãana vĩro, 
À Isarailinↄ bↄ̀ɛ ń tɛ́, à gbɛ̃kɛɛ yãana vĩro. 
À a gã̀sã pòro kↄ̃n a iko gbãaao, à gbɛ̃kɛɛ yãana vĩro. 
À Isia Tɛ̃aa zↄ̃̀kↄ̃rɛ plaa, à gbɛ̃kɛɛ yãana vĩro. 
À tò Isarailinↄ gɛ̃̀tɛ à dagura, à gbɛ̃kɛɛ yãana vĩro. 
À Fili'auna kↄ̃n a zĩ̀kpɛɛnↄ kà Isia Tɛ̃aan, à gbɛ̃kɛɛ yãana vĩro. 
À dↄ̀ a gbɛ̃nↄnɛ aɛ gbáan, à gbɛ̃kɛɛ yãana vĩro. 
À kí bítanↄ lɛ̀ à nɛ̀, à gbɛ̃kɛɛ yãana vĩro. 
À kí gbãadeenↄ dɛ̀dɛ, à gbɛ̃kɛɛ yãana vĩro. 
Amↄrinↄ kí Siↄ̃, à gbɛ̃kɛɛ yãana vĩro. 
Kↄ̃n Basã kí Oguo, à gbɛ̃kɛɛ yãana vĩro. 
À ń bùsu sì à gba dào, à gbɛ̃kɛɛ yãana vĩro. 
À kpà a zↄ̀bleri Isarailinↄa túbi ũ, à gbɛ̃kɛɛ yãana vĩro. 
À dↄ̀ wa yãn wa gwena zaaan, à gbɛ̃kɛɛ yãana vĩro. 
À wa bↄ wa ibɛɛnↄ ↄzĩ, à gbɛ̃kɛɛ yãana vĩro. 
È pↄ́blee kpá pↄ́ sãnda píngia, à gbɛ̃kɛɛ yãana vĩro. 
À Luda Musude sáabu kɛ, à gbɛ̃kɛɛ yãana vĩro.