SAAMUNƆ.
139.
Dauda lɛ̀. Dii, n ma yã gwàgwa ń dↄ̃̀, 
ń ma vɛ̃ɛna kↄ̃n ma fɛɛnao dↄ̃, zaa zã̀azã ń ma laasuunↄ dↄ̃. 
Nɛɛ̀ ma táa'ona kↄ̃n ma daɛnao tàasi kɛ, n kↄ̃ dↄ̃̀ kↄ̃n ma yãnↄ píngi. 
Lɛ yã kpɛ́ à bↄ ma lɛ́n, Dii, ń dↄ̃ sãnsãn. 
Ń ligamazi kpɛɛ kↄ̃n aɛo, n ↄↄ kúmala. 
Dↄ̃na beee dɛmɛ dabuyã ũmɛ, à dɛmala, ma ↄ̃ndↄ̃ↄ e káaro. 
Mán mɛ́ gán mà kɛ̃ n Niniia? Mán mɛ́ bàa sí mà gán mà koranzii? 
Tó ma fɛɛ ma gaa musu, ń kú gwe! Tó ma daɛkii kɛ̀ gɛ̀wãan, ńyɛ gwa! 
Tó ma fɛɛ ma gaa ↄfãntɛ̃bↄɛ kpa, tó ma gaa vɛ̃ɛ ísia baa ↄfãntɛ̃gɛ̃kpɛn kpa, 
baa gwemɛ má na n ↄzĩ, nɛ́gↄ̃ ma kũna n ↄplaao. 
Tó ma bè gusiaa damala, ke gupuraa kɛ̀ ligamazii li gwãavĩ ũ, 
guu ègↄ̃ siannɛro, gwãavĩ ègↄ̃ dɛnnɛ lán fãantɛ̃ bàmɛ, gupura kↄ̃n gusiaao ègↄ̃ sɛ̃nkpɛnnɛmɛ. 
Ḿbe n ma guu kɛ̀, n ma í kàsa ma da gbɛɛɛn. 
Ma sáabu kɛ̀ kɛ̀nnɛ ma kɛna naasi vĩ bensↄ̃ à yãbↄnsaɛ vĩ. N yãkɛnanↄ è bↄ ń saɛ, má dↄ̃ sãnsãn ma nↄ̀sɛn. 
Gurↄↄ kɛ̀ n ma í kàsa nɛ́'isↄ guu, ma wá kee utɛnannɛro. Kɛ̀ ma mɛ̀ e lii asii guu gwe, 
n wɛ́ɛ sì ma nɛ́gberelɛ. Lán n ma gurↄↄ dìɛ nà píngi, à lɛ́ kú n takadan zaalɛ à kee e naaro. 
Luda, n laasuu bɛ̀ɛ vĩmɛ maamaa, à lɛ́ vĩro fá! 
Tó má yezi mà naro, aↄ̃ↄ pari dɛ bùsu'ãatɛ̃la. tó ma vu, mɛɛ̀gↄ̃ kúnyo ai tia. 
Luda, tó nɛ́ gbɛ̃ zaaanↄ dɛdɛ dé? À gumala a gbɛ̃dɛrinↄ! 
N ibɛɛnↄ è n yã o kↄ̃n nↄ̀sɛ zaaao, n tↄ́ bɛ̀ɛ vĩ n lɛ́nlo. 
Dii, mɛɛ̀ za gbɛ̃ kɛ̀ aↄ̃ zanguunↄnloo? Mɛɛ̀ gí gbɛ̃ kɛ̀ aↄ̃ fɛ̀ɛnzinↄ kãzi. 
Má yãke vĩńnɛro, se zangu, mɛɛ̀ ń diɛ ma ibɛɛnↄ ũmɛ. 
Luda, ǹ ma gwagwa ǹ ma nↄ̀sɛ dↄ̃, ǹ ma yↄ̃ ǹ ma gwa ǹ ma laasuu dↄ̃. 
Ǹ gwa tó má laasuu zaa ke vĩ, ǹ ma da zɛ́ kɛ̀ ègↄ̃ kuu gurↄ píngia guu.