SAAMUNƆ.
145.
Dii táaki kɛ̀ Dauda lɛ̀. Mɛ́ n táaki lɛ́, ma Luda ma Kína, mɛ́gↄ̃ n tↄ́ bↄↄ gurↄ píngi. 
Mɛ́gↄ̃ n sáabu kpaa lán guu e dↄↄ nà, mɛ́gↄ̃ n táaki lɛɛ yãana sai. 
Dii bíta, à kà wà à táaki lɛ́, à bítakɛ lɛ́ vĩro. 
Kpàɛnↄ é n yãkɛnanↄ sáabu kpá Wurenↄnɛ, aↄ̃é n yãbitakɛnanↄ kpàakpa kɛ. 
Aↄ̃é n maakɛ bíta gakuide yã o, mɛ́ n yãbↄnsaɛkɛnanↄ laasuu lɛ́. 
Aↄ̃é n yãkɛna naaside gbãa yã o, mɛ́ n bítakɛɛ tↄ̃kɛ̃ńnɛ. 
Aↄ̃é n maakɛ bíta baaru kpá, aↄ̃é guda kɛ n yãzɛdekɛnanↄ yãnzi. 
Dii sùu vĩ kↄ̃n wɛ̃ndaao, è pↄ fɛ̃ kpaaro, à gbɛ̃kɛɛ vĩ bíta. 
Dii è à maaa kɛ baade pínginɛ, è a pↄ́ kɛ̀ à kɛ̀nↄ wɛ̃nda gwa ń píngi. 
Pↄ́ kɛ̀ ń kɛ̀nↄ é n sáabu kpá ń píngi, n yãmarinↄ é n tↄ́ sɛ́ lezĩ, Dii. 
Aↄ̃é n kpata gakui gari kɛ, aↄ̃é n iko gbãa yã o, 
lɛ gbɛ̃ píngi n yãbitakɛnanↄ dↄ̃ kↄ̃n n kpata maa gakuide yão. 
N kpata nɛ́ kpata yãanasaimɛ, nɛ́gↄ̃ dɛ kí ũ ai wa boriia. Dii náanɛ vĩ yã kɛ̀ à ò píngi musu, à sùu vĩ kↄ̃n pↄ́ kɛ̀ à kɛ̀nↄ ń píngi. 
Dii è gbɛ̃ kɛ̀ aↄ̃ↄe lɛɛɛnↄ kũ, è gbɛ̃ kɛ̀ nawɛ̃a tↄ̃̀ḿmanↄ fɛɛ. 
Pↄ́ píngi wɛ́ɛ dↄnzi, nɛɛ̀ pↄ́blee kpáḿma à gurↄↄa. 
Nɛɛ̀ ↄ porońnɛ pↄ́ mↄ́ḿma, nɛɛ̀ pↄ́ píngi pↄyezi bↄkↄ̃tɛnɛ. 
Dii yãkɛnanↄↄ maa píngi, à gbɛ̃kɛɛ vĩ a yã píngi kɛna guu. 
Dii kĩi kↄ̃n a sìsirinↄ ń píngi, gbɛ̃ kɛ̀ aↄ̃è à sísi kↄ̃n yãpuraaonↄ. 
È a vĩakɛrinↄ pↄyezi bↄkↄ̃tɛńnɛ, è ń wiipɛna ma à ń mì sí. 
Dii è gbɛ̃ kɛ̀ aↄ̃ↄ yeaziinↄ dãkpa ń píngi, mↄde eé zaakɛrinↄ kaatɛ. 
Dii táakilɛna égↄ̃ da ma lɛ́n, pↄ́ píngi gↄ̃ à tↄ́ kɛ̀ kú adona bↄↄ gurↄ píngi.