YAASINƆ.
3.
Ma nɛ́, ǹton tó ma yãdannɛna sãnguro, ǹgↄ̃ yã kɛ̀ má dìɛnnɛɛnↄ kũna n swɛ̃̀n. 
Zaakɛ eé n ká wɛ̃̀ndi gbã̀aa, eé aafia kaarannɛ. 
Gbɛ̃kɛ kↄ̃n náanɛo tón kɛ̃mmaro, ǹgↄ̃ dana kã̀mbɛɛ ũ, ǹ kɛ̃ n swɛ̃̀a lán wè pↄ́ kɛ̃ walaaa nà, 
n tↄ́ égↄ̃ nna, nɛ́gↄ̃ maa Luda kiia kↄ̃n gbɛ̃nteenↄ. 
Ǹ Dii náanɛ kɛ kↄ̃n nↄ̀sɛo do, ǹton gbãaa kpá n zĩnda dↄ̃naaro. 
Ǹgↄ̃ à dↄ̃ n yãpingikɛna guu, eé zɛ́ poronnɛ súusu. 
Ǹton n zĩnda gwa ↄ̃ndↄ̃dee ũro, ǹgↄ̃ Dii vĩa vĩ ǹ kɛ̃ yã zaaaa. 
Beee égↄ̃ dɛ n mɛ̀ aafia ɛ̃zɛ̃ ũ, eé n wánↄ gba gbãaa. 
Ǹ bɛ̀ɛ lí Diinɛ kↄ̃n n auzikio kↄ̃n n bura pↄ́ káakunↄ píngi, 
pↄ́wɛɛ é n dↄ̃̀ pa ai àgↄ̃ kwɛ́ɛ, n lo ìsinↄ é pa yɛ́lɛlɛ kↄ̃n geepiwɛ̃ dufuo. 
Ma nɛ́, tó Dii e n totoo, ǹton dↄkɛ à yãoro, tó à kpã̀kɛ̃nzi, ǹton tó à kɛnnɛ ĩiro. 
Zaakɛ gbɛ̃ kɛ̀ Dii yezin è toto, lán de è kɛ a nɛ́ kɛ̀ kɛ̀nɛ maaanɛ nà. 
Aubarikadeen gbɛ̃ kɛ̀ ↄ̃ndↄ̃ↄ lè à kũ̀ à dↄ̃na è à pàpa ũ. 
Zaakɛ à àre vĩ dɛ kondogila, è kaarana kɛńnɛ dɛ vurala. 
À bɛ̀ɛ vĩ dɛ gbɛ̀baila, pↄ́ kɛ̀ ń à nii vĩinↄ kee e ká à ũro. 
Wɛ̃̀ndi gbã̀a kú à ↄplaan, auziki kↄ̃n gakuio kú à ↄzɛɛn. 
À yãkɛnanↄ nna, à zɛ́ píngi aafia vĩ. 
À dɛ lí wɛ̃̀ndidee ũ gbɛ̃ kɛ̀ kũnanↄnɛ, aubarikadeenↄn gbɛ̃ kɛ̀ aↄ̃ↄ sìnↄ ũ. 
Dii gonikɛɛ guu à tↄↄtɛ kàɛ, à ↄ̃ndↄ̃ↄ guu à musu kɛ̀. 
À ísia wɛ̀ɛ bↄ̀ a dↄ̃na guu, à tò ludambɛ luguu mↄdↄ vĩ. 
Ma nɛ́, ǹgↄ̃ wɛ́ɛzɛ̃ɛ vĩ kↄ̃n faao, ǹton wɛ́ɛ vĩàlaro. 
Eégↄ̃ dɛ n ninii wɛ̃̀ndi ũ, eégↄ̃ dɛ kã̀mbɛɛ ũ n waalɛ. 
Nɛ́gↄ̃ tɛ́ n làakaria, pↄ́ke é kpánnɛro. 
Tó n daɛ, vĩa é n kũro, nɛ́ daɛ ǹ ii o nna. 
Nɛ́ vĩa kɛ karinɛro, ke mↄ́nzi kɛ̀ è zaakɛrinↄ le kãndoo. 
Zaakɛ Dii égↄ̃ dɛ n mìnakii ũmɛ, eé tó n gbá vĩ takutɛɛla. 
Tó n ↄↄ e n kpɛɛ lee, gbɛ̃ kɛ̀ dɛ ǹ à maaa kɛnɛ, ǹton gí kɛnɛziro. 
Tó ń ĩankana zɛ́ vĩ, ǹton be n gbɛ̃daaanɛ à gá gĩa ai ziaro. 
N gbɛ̃daaa kɛ̀ kú n saɛ kɛ̀ à n náanɛkɛna, ǹton à zaaa kpákↄ̃sↄ̃ziro. 
Tó gbɛ̃ e yãke kɛnnɛro, ǹton lɛokpakↄ̃a kɛo pãro. 
Ǹton gbãamↄnnɛri gwena ni dɛro, ǹton tɛ́ à yãkɛna keziro. 
Zaakɛ Dii tɛ̃̀n mↄnafikideenↄ ũ, nↄ̀sɛpuradeenↄn è kɛ a kpaasinↄ ũ. 
Dii è láari zĩ gbɛ̃ zaaanↄ uaa, è aubarika da gbɛ̃ maaanↄ bɛɛn. 
È lalandideenↄ lalandi kɛ, mↄde à gbɛ̃kɛɛ vĩ kↄ̃n zĩndabusarinↄ. 
Ɔ̃ndↄ̃dee è bɛ̀ɛ e, yↄ̃nkↄↄ sↄ̃ è wí da a zĩndaa.