YAASINƆ.
5.
Ma nɛ́, ǹ làakari dↄ ma dↄ̃naa, ǹ swã kpá ǹ ma ↄ̃ndↄ̃ yã ma, 
lɛ ǹgↄ̃ kú n làakaria, dↄ̃na yã égↄ̃ kú n lɛ́n. 
Kaarua yã'ona ègↄ̃ nna lán zↄ́ bàmɛ, è ń gáɛ kↄ̃n lɛ́nnaao, 
mↄde zãazãa è kɛńnɛ kyã̀kyã lán sɛwɛɛ bà, à lɛ́ nna lán fɛ̃ɛda kpaplaplaaa bà. 
À zɛ́ è mì pɛ́ńyo gaaa, è si kↄ̃n gbɛ̃ kɛ̀ aↄ̃ↄ tɛ́zinↄo gɛ̀wãan. 
È laasuu lɛ́ wɛ̃̀ndi zɛ́aro, à dↄ̃ a kɛ̃ zɛ́ pìaro. 
Ma nɛ́, ǹ swã kpá ma yãzi sa, ǹton kpɛɛ li ma lɛ́dammanɛro. 
Ǹ pã nↄgbɛ̃ beee takanɛ zã̀azã, ǹton sↄ̃ à bɛ gãalɛziro, 
lɛ n bɛ̀ɛ tón gↄ̃ gbɛ̃ pãndenↄnɛro, lɛ ǹton n wɛ̃̀ndi kpá gbɛ̃ pãsĩnↄaro, 
lɛ n auzikinↄ tón gↄ̃ danↄnɛro, lɛ n zĩ àre tón gↄ̃ ua pãnde deenↄnɛro. 
Nɛ́gↄ̃ mboo n gurↄ yãanaa, nɛ́ yãyã n gbãaa é yãa. 
Nɛ́ be: Ma gi lɛ́dammazi fá! Ma dↄkɛna totonao bé à tò. 
Mɛ́ɛ lɛ́dammarinↄ yã'onnɛna maro, mɛ́ɛ swã kpá ma yãdannɛrinↄziro. 
Féte bé à gↄ̃̀ kɛ̀ mɛ́ kpɛ bↄ anduna píngi wáa. 
Ǹ n zĩnda orozã í mi, ǹ zɛ kↄ̃n n zĩnda lↄ̀gↄ'io. 
N í kwɛɛna bàazi maaro. N í fãna gãalɛ zɛ́ vĩro. 
Ǹ tó àgↄ̃ dɛ n naↄ̃ pↄ́ ũ ado, àtongↄ̃ dɛ gbɛ̃ pãnde pↄ́ ũro. 
Luda aubarika da n íbↄkii pìn, ǹ pↄnnaa kɛ kↄ̃n n gↄ̃kparɛkɛgurↄ nↄↄo. 
N gã yenzidee! N gbikyao maaa! Ǹ tó à bↄ̃̀ndagana gↄ̃ kɛɛnnɛ nna, ǹ a yenzi ni dɛ lán guu e dↄↄ nà. 
Ma nɛ́, bↄ́yãnzin nɛ́ kaarua ni dɛzi? Bↄ́yãnzin nɛ́ bↄ̃̀nda gá kↄ̃n gbɛ̃ pãnde nↄↄozi? 
Gbɛ̃ntee yãkɛna kee utɛna Diinɛro, ègↄ̃ zɛ́ kɛ̀ à sɛ̀ dↄ̃ píngi. 
Zaakɛri taari è bà kpákpanɛ, à durun è à kũ. 
À lɛ́dammamasai é a kpá gaazi, à yↄ̃nkↄkɛ bíta é à sãsã.