YAASINƆ.
6.
Ma nɛ́, tó n n gbɛ̃daaa fĩa dì n musu, tó n kpɛ́gaau sɛ̀ gbɛ̃nɛ, 
tó n lɛ́ n ásaru kɛ̀, tó n yã'ona n da yãn, 
ǹ kɛ lán kɛ̀ bà, ma nɛ́, ǹ lɛ́ bↄ yã pìn, zaakɛ n na n gbɛ̃daaa ↄzĩ. Ǹ gá ǹgↄ̃ zɛzɛ n gbɛ̃daaa pìzi, ǹ agbaa kpánɛ. 
Ǹton tó ii gɛ̃ n wɛ́ɛnlo, ǹton tó n wɛ́ɛbaa tìisi kũro, 
ǹ n zĩnda sía lán gãa è ń kɛ̃ nà, lán bãa è bↄ bàkpakpari ↄzĩ nà. 
Mɛade, ǹ gá zɛ̀nↄ gwa, ǹ a yãkɛna tàasi kɛ, nɛ́ ↄ̃ndↄ̃ kũ. 
À dↄn'aɛdee vĩro, à gbɛ̃nsi ke dii vĩro. 
È kũsãɛ zi di kwɛɛmɛ, è a pↄ́blee kakↄ̃a pↄ́kɛ̃gurↄ. 
Mɛade, nɛ́gↄ̃ daɛna ai bↄrɛmɛ? Bↄrɛn nɛ́ vu iin? 
Nɛɛ̀ kámma bo féte nɛɛ̀ ii o féte, nɛɛ̀ daɛ féte ↄkpana n kùsɛa. 
Takaasi é gɛ̃nzi lán kpãi wɛ́ɛdewɛ bà, pↄ́kɛ̃sãmmana é summa lán gbɛ̃ kɛ̀ gↄ̃kɛbↄ kũna bà. 
Gbɛ̃ntee pãa nɛ́ gbɛ̃ zaaamɛ, ègↄ̃ lili oo kↄ̃n ɛgɛɛo da à lɛ́n. 
È yã o kↄ̃n wɛ́ɛo kↄ̃n ↄↄo, è sèeda kɛńnɛ kↄ̃n gbáo. 
Mↄnafiki bé à à nↄ̀sɛ pana, yã zaa wàarin ègↄ̃ paa gurↄ píngi. 
Beee yãnzin mↄ́nzi é mↄ́a lɛ́zana sai, kaatɛna é gɛ̃zi kãndo, eégↄ̃ fɛɛna vĩro. 
Yã mɛ̀n swɛɛdoo kuu kɛ̀ Dii zàn, à kà se swɛɛplaa kɛ̀ dɛnɛ tɛ̃̀ ũ. 
Wada, ɛgɛtona, taarisaide dɛna, 
yã pãsĩ wàaripana, wãna zaaazi, 
sèeda ɛgɛtona kↄ̃n danɛnↄ dↄkↄ̃anao. 
Ma nɛ́, ǹgↄ̃ n de yãdiɛnanↄ kũna, ǹton pã kpá n da yãdannɛziro. 
Ǹgↄ̃ kũna n swɛ̃̀ guu, ǹgↄ̃ dana kã̀mbɛɛ ũ. 
Eé dↄnnɛ aɛ n táa'ona guu, eé n dãkpa n daɛna guu. Tó n vu, eé lɛ́ damma. 
Zaakɛ yãdiɛna pìnↄ nɛ́ fitiamɛ, yãdannɛna pì nɛ́ gupuraamɛ, lɛ́damma kↄ̃n totonao nɛ́ zɛ́ wɛ̃̀ndideemɛ. 
Eé n sí nↄgbɛ̃ zaaa ↄzĩ, eé n bↄ gbɛ̃ pãnde nↄ yãnnanna'onan. 
Ǹton à maakɛɛ ni dɛro, ǹton tó à wɛ́ɛkpãntɛ̃daɛnzina n kũro. 
Kaarua è tó ń gↄ̃ kori, gbɛ̃ pãnde nↄↄ sↄ̃ è ń wɛ̃̀ndi bɛ̀ɛdee kaatɛ. 
Tó gbɛ̃ tɛ́ sɛ̀ à dà a pↄtɛ, à pↄ́kãsãa é gí tɛ́ kũziↄ́? 
Tó gbɛ̃ kɛ̀sɛ pɛ̀ɛ tɛ́yↄ̃a, eé gí à kpataziↄ́? 
Lɛn à dɛ lɛ kↄ̃n gbɛ̃ kɛ̀ gɛ̃̀ a gbɛ̃daaa nↄↄzio, zaakɛ tó à ↄ kɛ̀a, eé bↄ pãro. 
Tó nↄaa e gbɛ̃ dɛɛ, tó à kpãi ò, wè à yã da pãↄ́? 
Tó wà à kũ̀, eé à fĩa bo lɛo swɛɛplaa, eé pↄ́ kɛ̀ à vĩ a uan kpá píngi. 
Zinakɛri laasuu vĩro, gbɛ̃ kɛ̀ è beee kɛɛ è a zĩnda kaatɛmɛ. 
Gbɛ̃na maa kↄ̃n kpɛbↄnaon à baka ũ, à tↄ́ zaaa é kɛ̃aro. 
Zaakɛ gↄ̃gbɛ̃ nↄ̀sɛgↄ̃aanↄ bé eé su pↄfɛ̃o, tó èe gɛ̃ɛ booḿma, eé ń wɛ̃nda gwaro. 
Eé agbaakpabↄ ke síro, baa tó à gba bíta dànɛ, eé weziro.