YAASINƆ.
11.
Dii zà pↄ́yↄ̃na kↄ̃n mↄnafikion, kilooyↄ̃na súusun à yezi. 
Zĩndasɛna lezĩ è mↄ́ wíyão, zĩndabusanan ↄ̃ndↄ̃yã ũ. 
Gbɛ̃ maaa nↄ̀sɛpuraa è a da zɛ́a, náanɛsaidee nↄ̀sɛ zaaa è à yaka. 
Auziki àre vĩ yãkpaɛkɛgurↄↄ zĩro, yãkɛna a zɛ́a sↄ̃ è ń sí gaaa. 
Taarisaidee maakɛna è zɛ́ poronɛ, zaakɛri zaakɛna è à nɛ. 
Nↄ̀sɛpuradee maakɛna è à bↄ, náanɛsaide pↄ́nidɛna sↄ̃ è à kũ. 
Tó gbɛ̃ zaaa gà, à tãmaa è mì dɛ, pↄ́ kɛ̀ à náanɛkɛna a gbãagurↄ píngi è yãa. 
Gbɛ̃ maaa è bↄ wɛ́ɛtãmman, ben gbɛ̃ zaaa è gɛ̃n à gɛ̃ɛ ũ. 
Ludayãdarisai lɛ́ è à gbɛ̃daaa yaka, mↄde dↄ̃na è gbɛ̃ maaa bↄn. 
Tó gbɛ̃ maaanↄↄ kú nnamanan, wɛ́tɛ ègↄ̃ nna, tó gbɛ̃ zaaanↄ gàga, wè guda kɛ. 
Wɛ́tɛ è kaara nↄ̀sɛpuradeenↄ gãzĩ, gbɛ̃ zaaanↄ lɛ́ è wɛ́tɛ dɛ. 
Faasaidee è a gbɛ̃daaa fabo, làakaridee è a lɛ́ kũ. 
Kↄmↄtↄdee è bↄ asiiyão gupuraaa, gbɛ̃ náanɛdee è ń asii ta. 
Dↄn'aɛdesaikɛɛ è tó gbɛ̃nↄ fu, yãkɛkɛri pariinↄ è tó wà zĩ̀ ble. 
Tó n gbɛ̃ pãnde fĩa dì n musu, n ka wɛ́ɛtãmmalamɛ, gbɛ̃ kɛ̀ a ↄↄ bↄ̀ɛn è gↄ̃ a làakaria. 
Gbãamↄnnɛri ègↄ̃ auziki vĩ, mↄde nↄgbɛ̃ nↄ̀sɛmaadee ègↄ̃ bɛ̀ɛ vĩńnɛ. 
Sùudee è maaa i a zĩndanɛ, gbɛ̃ pãsĩ è a zĩnda kpá nawɛ̃azi. 
Gbɛ̃ zaaa asaia ègↄ̃ aubarika vĩro, yãmaatↄ̃ri è àre e yãpura. 
Kuuna maa yãpura è ń ká wɛ̃̀ndia, tɛna à zaaazi è mↄ́ gaao. 
Dii tɛ̃̀n nↄ̀sɛzaadeenↄ ũ, à pↄↄ è kɛ nna taarisaideenↄa. 
Yãpura, gbɛ̃ zaaanↄ é bↄ pãro, mↄde gbɛ̃ maaanↄ é bↄ aafia. 
Lán vura tãnga dɛ nà alɛdɛ yĩn, lɛn nↄ maa ↄ̃ndↄ̃saidee dɛ lɛ. 
Gbɛ̃ maaanↄ pↄyezi è ń ká nnamanan, gbɛ̃ zaaanↄ tãmaa è ń nɛ. 
Gbɛ̃ kɛ̀ è gbaa daa è kaarana e, gbɛ̃ kɛ̀ gì pↄ́ kɛ̀ dɛ à kpá kpázi è gↄ̃ takaasimmɛ. 
Gbɛ̃ntee aubarikadee é nnaa ma, gbɛ̃ kɛ̀ è ń pↄ́yĩi kũ é pↄ́yĩi e se. 
Wè gbɛ̃ kɛ̀ è pↄ́wɛɛ utɛ ká, wè sa maaa o gbɛ̃ kɛ̀ è yáḿmanɛ. 
Gbɛ̃ kɛ̀ è à maaa wɛtɛ égↄ̃ nna kↄ̃n gbɛ̃nↄ, gbɛ̃ kɛ̀ è à zaaa wɛtɛ, yã zaaa é à le. 
Gbɛ̃ kɛ̀ è a auziki náanɛ kɛ é lɛ́ɛ, gbɛ̃ maaa è ↄ tá lán lí ládee bà. 
Gbɛ̃ kɛ̀ yã ì a uanɛ é gↄ̃ kori, yↄ̃nkↄↄ é gↄ̃ ↄ̃ndↄ̃dee zↄ̀ ũ. 
Gbɛ̃ maa yãkɛnnɛna nɛ́ lí wɛ̃̀ndideemɛ, gbɛ̃ kɛ̀ è gbɛ̃nↄ ee ↄ̃ndↄ̃ↄ vĩ. 
Zaakɛ Luda è fĩa bo gbɛ̃ maaanɛ andunan, weé ludayãdarisai kↄ̃n durunkɛrio pↄ́ o dↄↄ́?