YAASINƆ.
12.
Gbɛ̃ kɛ̀ lɛ́damma è kɛnɛ nnaa ye dↄ̃nazi, gbɛ̃ kɛ̀ totona è kɛnɛ zaaa mì vĩro. 
Gbɛ̃ maaa è Dii pↄnnaa e, mↄde Dii è yã da mↄnafikideela. 
Zaakɛna è gbɛ̃ke kãsãa pɛ́ɛro, gbɛ̃ maaa kãsãa ègↄ̃ degena vĩro. 
Nↄ maaa dɛ a zãnɛ lán fùra bà, nↄ wídammari dɛnɛ lán mɛ̀kɛmuna bà. 
Gbɛ̃ maaanↄ ègↄ̃ pɛɛ yãzɛdeea, gbɛ̃ zaaanↄ lɛ́damma mↄnafiki vĩ. 
Gbɛ̃ zaaanↄ yã nɛ́ gbɛ̃dɛna yãmɛ, gbɛ̃ maaanↄ lɛ́ sↄ̃ è ń bↄ. 
Wè gbɛ̃ zaaanↄ liɛ ń kpɛɛgãnda aↄ̃ mì dɛ, mↄde gbɛ̃ maaanↄ ua ègↄ̃ kuu. 
Wè gbɛ̃ tↄ́ bↄ a ↄ̃ndↄ̃ lɛ́mmɛ, wè kya ká faasaideen. 
Gbɛ̃ futa kɛ̀ à zĩ̀ri vĩi sã̀ↄ dɛ gbɛ̃ kɛ̀ è a zĩnda diɛ pↄ́ke ũ bensↄ̃ à pↄ́blee vĩroola. 
Gbɛ̃ maaa a pↄ́kãdeenↄ gwana dↄ̃, gbɛ̃ zaaanↄ dà pãsĩ kↄ̃n ń pↄ́nↄ. 
Búbari aĩadee ègↄ̃ kãna, laasuu kɛ̃̀sã gbɛ̃ kɛ̀ è pɛ́ gukoriaa. 
Gbɛ̃ zaaa è ↄↄ zaaa ni dɛ, mↄde gbɛ̃ maaa kãsãa ègↄ̃ mↄdↄ vĩ. 
Gbɛ̃ zaaa lɛ́ zaaa è à kũ, mↄde gbɛ̃ maaa è bↄ yãketen. 
Lɛ́ maaa è ń ká pↄ́ maaaa, zĩi kɛ̀ gbɛ̃ kɛ̀ àre è gɛ̃ a ↄzĩ. 
Yↄ̃nkↄↄ yãkɛna è kɛnɛ maa, ↄ̃ndↄ̃dee sↄ̃ è lɛ́damma ma. 
Yↄ̃nkↄↄ è tó wà à pↄfɛ̃ dↄ̃ gↄ̃ↄ, làakaridee sↄ̃ è sↄ̃sↄ̃ daro. 
Yãpura'ori è yãzɛdee o, sèeda'ɛgɛde yã ègↄ̃ mↄnafiki vĩmɛ. 
Laasuusaiyã è ń swɛ̃̀ zↄ̃ lán fɛ̃ɛdaa bà, ↄ̃ndↄ̃dee lɛ́gbɛ è mↄ aafiao. 
Yãpuraa kɛ̀ wà ò ègↄ̃ gìkɛna, ɛgɛɛ sↄ̃ è gɛ̃ zɛ́la lán wɛ́ɛ'ibakɛna bà. 
Mↄnafiki kú zaalɛkpakↄ̃sↄ̃rinↄ swɛ̃̀n, gbɛ̃'aafiawɛtɛrinↄ bé aↄ̃ↄ pↄnnaa vĩ. 
Zaa ke è gbɛ̃ maaa lero, gbɛ̃ zaaanↄ sↄ̃, yã è dańla. 
Dii tɛ̃̀n ɛgɛdee ũ, à pↄↄ ègↄ̃ nna yãpuradeea. 
Làakaridee ègↄ̃ a dↄ̃na kũna a swɛ̃̀n, yↄ̃nkↄↄ è yã faasai kpàakpa kɛ. 
Zĩkɛna ↄplaplaa è tó gbɛ̃ kí ble, mɛa è gbɛ̃ da zↄ̀bleen. 
Kuuna bídi guu è gbɛ̃ sↄ̃ɛ, yãnna'onnɛna è ń pↄↄ kɛ nna. 
Gbɛ̃ maaa è a gbɛ̃daaa da zɛ́a, gbɛ̃ zaaanↄ yãkɛna è ń sãsã. 
Mɛadee è a nↄ̀bↄ kã wawaro, aĩadee è làakari dↄ a pↄ́nↄa. 
Kuuna yãzɛde zɛ́n wɛ̃̀ndi vĩ, zɛ́ pì sɛna è ń kpá gaaziro.