YAASINƆ.
13.
Nɛ́ ↄ̃ndↄ̃dee è a de lɛ́damma ma, fabori è gí kpãkɛ̃nazi. 
Lɛ́gbɛ nnaa è gbɛ̃ ká pↄ́ maaaa, náanɛsaidee è ble a pãsĩ guumɛ. 
Gbɛ̃ kɛ̀ è a lɛ́ kũ è a wɛ̃̀ndi dãkpa, gbɛ̃ kɛ̀ à lɛ́ è kúroo è a zĩnda yaka. 
Mɛadee è pↄ́ kɛ̀ à yezi ero, aĩade sↄ̃ è nnaa ma. 
Gbɛ̃ maaa zà mↄnafikiyãn, gbɛ̃ zaaa è wí daḿma è ń kpɛ bↄ. 
Maakɛna è zɛ́maasɛri mì sí, zaakɛna è durunkɛri liɛ a kpɛɛgãnda. 
Gbɛ̃kenↄ è ń zĩnda diɛ auzikidee ũ, mↄde aↄ̃ègↄ̃ pↄ́ke vĩro. Gbɛ̃kenↄ è ń zĩnda diɛ takaasidee ũ, mↄde aↄ̃ègↄ̃ pↄ́ vĩ bíta. 
Auzikidee è a zĩnda bↄ kↄ̃n a auzikikɛɛo, takaasidee sↄ̃ è vĩadaanzina ero. 
Gbɛ̃ maaanↄ gupuraa ègↄ̃ puna, gbɛ̃ zaaanↄ fitia è gaḿma. 
Zĩndasɛna lezĩ è swèe da, lɛ́dammamana è tó wà ↄ̃ndↄ̃ kũ. 
Ɔↄ zaaa è gá aɛro, ↄↄ kɛ̀ wà è ísimma guu sↄ̃ è kↄ̃. 
Tãmaa gìkɛna è ń nↄ̀sɛ yaka, pↄ́ kɛ̀ wà yezi ena è mↄ́ wɛ̃̀ndi dufuo. 
Gbɛ̃ kɛ̀ è yã daroo é yã e, gbɛ̃ kɛ̀ è yã ma é àre e. 
Ɔ̃ndↄ̃dee yãdannɛnan íbↄki wɛ̃̀ndidee ũ, è ń bↄ ga bàn. 
Wɛ́ɛzɛ̃ maaa è tó gbɛ̃ dakↄ̃rɛ gòmio, mↄde náanɛsaideenↄ zɛ́ ègↄ̃ pãsĩ. 
Làakarideenↄ è yã kɛ kↄ̃n dↄ̃nao, yↄ̃nkↄↄ è a faasaikɛɛ ↄdↄańnɛ. 
Zĩ̀ri zaaa è gɛ̃ yãn, ìba náanɛdee è su aafia. 
Gina totonazi è mↄ́ takaasio kↄ̃n wíyão, lɛ́dammamana è bɛ̀ɛ líńnɛ. 
Pↄ́nidɛna ena è ń pↄↄ kɛ nna, mↄde yↄ̃nkↄↄ ye kɛ̃na yã zaaaaziro. 
Gbɛ̃ kɛ̀ tɛ́ ↄ̃ndↄ̃rinↄzi è ↄ̃ndↄ̃ kũ, gbɛ̃ kɛ̀ kakↄ̃ana kↄ̃n yↄ̃nkↄↄnↄ è yã e. 
Mↄ́nzi ègↄ̃ tɛ́ durunkɛrinↄzi, nnamanan gbɛ̃ maaanↄ àre ũ. 
Gbɛ̃ maaa è túbi tó a dionↄnɛ, durunkɛri sↄ̃ auziki é gↄ̃ gbɛ̃ maaanɛ. 
Takaaside bura è pↄ́blee kɛ maamaa, mↄde yãkɛna lɛkpɛɛ è tó à korazi. 
Gbɛ̃ kɛ̀ è a nɛ́ gbɛ̃roo zàn, gbɛ̃ kɛ̀ ye a nɛ́zi è à toto káaku. 
Gbɛ̃ maaa è pↄ́ ble à kã, gbɛ̃ zaaanↄ nↄ̀sɛ ègↄ̃ da kori.