YAASINƆ.
18.
Zĩnda pↄyezi è dↄ gbɛ̃ kɛ̀ è kɛ̃ḿmanɛ aɛ, è gí lɛ́damma píngizi. 
Yↄ̃nkↄↄ è pↄnnaa kɛ làakari yã musuro, yã kɛ̀ bↄ̀ à lɛ́n è o. 
Zaakɛna è mↄ́ kyakanguomɛ, kpɛbↄyã è wí ińnɛ. 
Gbɛ̃ntee lɛ́gbɛ nɛ́ í lↄ̀mɛ, swa'i bàalɛnamɛ, íbↄki wɛ̃̀ndideemɛ. 
Kɛna zaakɛrinɛ kɛ̀rɛkɛrɛ ke yãkɛna taarisaideenɛ lɛ̀kpɛɛ maaro. 
Yↄ̃nkↄↄ lɛ́ è à da swèen, à yã'ona è à kpá gbɛ̃nazi. 
Yↄ̃nkↄↄ lɛ́ è à yaka, à yã'ona è à kũ lán takutɛɛ bà. 
Gbɛ̃peri yã è kɛńnɛ lán zↄ́ bà, è gɛ̃ lɛ́n dↄ̃̀ↄ ai nↄ̀sɛ guu. 
Gbɛ̃ kɛ̀ è pã kpá a zĩizi nɛ́ mↄ́nzide dãaromɛ. 
Dii tↄ́ nɛ́ utɛki lezĩmɛ, gbɛ̃ maaa è bàa lɛ́ à gɛ̃̀n à aafia e. 
Ɔↄde auziki dɛnɛ lán wɛ́tɛ kɛ̀ wà lɛ̀kaa lìgazi bà, lán bĩi kɛ̀ weé fↄ̃ wà didiaroo bà. 
Zĩndasɛna lezĩ è mↄ́ gbɛ̃nɛ kↄ̃n lɛɛnao, zĩndabusana è mↄ́ bɛ̀ɛo. 
Gbɛ̃ kɛ̀ è weńla swãkpana sai, mìsaikɛɛ kↄ̃n kpɛbↄnao gↄ̃̀nɛ. 
Kãgbãakɛɛ è gbɛ̃ gba gbãaa gyãpɛa, mↄde dé bé eé pↄsiaa fↄ̃ↄ? 
Làakaridee è yã dada a swɛ̃̀n, ↄ̃ndↄ̃dee swã ègↄ̃ dↄ dↄ̃nazi. 
Gbaa kɛ̀ gbɛ̃ dà è zɛ́ kɛkɛnɛ, è zɛ́ wɛ̃nɛ gana gbɛ̃nsinↄ kiia. 
Gbɛ̃ kɛ̀ yã ò káakun wè à gwa yãnnadee ũ, ai à ibɛɛ gↄ̃ gá à ɛgɛ bo. 
Kàbankpɛkɛna è swèe mì dɛ, è gↄ̃sa gbãaanↄ yokↄ̃a. 
Danɛ kɛ̀ wà taari kɛ̀nɛ yã ègↄ̃ gbãa lán bĩi bà, aↄ̃ swèe dɛ lán zɛ́tatana kↄ̃n lɛ̀o bà. 
Yã'ona dↄ̃ↄ è mↄ́ gbɛ̃nɛ kↄ̃n kãnao, à lɛ́gbɛ è tó pↄ́ mↄ́a. 
Gaa kↄ̃n wɛ̃̀ndio kú lɛ́mmɛ, gbɛ̃ kɛ̀ ye yã'onazi è a gbɛ̀ e. 
Gbɛ̃ kɛ̀ nↄↄ è ń sɛ́ n pↄ́ maaa è, aubarika beee bↄ̀ Dii kiiamɛ. 
Takaasidee è yã o wɛ̃ndawɛ̃nda, auzikidee è weńla gbãngbãn. 
Gbɛ̃nna bɛrɛkɛtɛ è à zaaa ińnɛmɛ, gbɛ̃nna kenↄ kuu aↄ̃ègↄ̃ na gbɛ̃a dɛ ua gbɛ̃la.