YAASINƆ.
21.
Kína nↄ̀sɛ kú Dii ↄzĩ lán ízɛ bàmɛ, è à liɛ guu kɛ̀ à yezin. 
Baade ègↄ̃ ee a yãkɛna maa, mↄde Dii bé ègↄ̃ ń nↄ̀sɛ dↄ̃. 
Maakɛna kↄ̃n yãkɛna a zɛ́ao è kɛ Diinɛ dɛ sa'onala. 
Zĩndasɛna lezĩ kↄ̃n ĩadãao è zaakɛrinↄ durun bↄ gupuraaamɛ. 
Aĩadee laasuu è à ká nnamanaa, nↄ̀sɛwãadee è gɛ̃ takaasin. 
Auziki kɛ̀ gbɛ̃ è ɛgɛtona guu é gɛ̃ ĩala à ń kpá gaazi. 
Zaakɛrinↄ pãsĩkɛna é táńyo, zaakɛ aↄ̃è we wà yãzɛdee kɛro. 
Taaride yãkɛna ègↄ̃ dↄ̀rↄ vĩro, taarisaide yãkɛna ègↄ̃ wásawasamɛ. 
Ina kpɛ́ làasin maa dɛ kuuna kpɛ́n lɛdo kↄ̃n nↄ swèedeeola. 
Zaakɛri swɛ̃̀ ègↄ̃ kú à zaaaamɛ, è a gbɛ̃daaa wɛ̃nda gwaro. 
Tó wà wɛ́ɛ tã̀ faboria, yↄ̃nkↄↄ è ↄ̃ndↄ̃ kũmɛ, tó wà kpã̀kɛ̃ ↄ̃ndↄ̃deezi, à dↄ̃na è kaaramɛ. 
Ludaa maa, è zaakɛri bɛɛ tàasi kɛ, è zaakɛrinↄ ká kaatɛnan. 
Gbɛ̃ kɛ̀ èe swã kpá wɛ̃ndade wiiiziro, àpi é wii pɛ́ se, gbɛ̃ke é weàlaro. 
Gbadana asii guu è pↄfɛ̃ kpáɛ, ↄdↄnkpɛɛgbaa sↄtↄna utan è pↄfɛ̃ mì dɛ. 
Yãgↄ̃gↄ̃na a zɛ́a è gbɛ̃ maaa pↄↄ kɛ nna, mↄde è vĩa dada zaakɛrizi. 
Gbɛ̃ kɛ̀ pã̀ làakari zɛ́nɛ é si gɛ̀wãadeenↄ tɛ́mɛ. 
Gbɛ̃ kɛ̀ nↄ̀sɛ kpà pↄnnakɛnaa é gↄ̃ takaasin, gbɛ̃ kɛ̀ ye wɛ̃ɛzi kↄ̃n nↄ́sio é kɛ auzikidee ũro. 
Zaakɛrinↄn gbɛ̃ maaanↄ tↄↄbakpabↄ ũ, Luda è wɛ́ɛ tã náanɛsaideenↄa nↄ̀sɛpuradeenↄ gɛ̃ɛ ũ. 
Kuuna gbáan maa dɛ vɛ̃ɛna kↄ̃n nↄ swèede pɛ̃tɛ̃deeola. 
Pↄ́ble maaa kↄ̃n nↄ́sio ègↄ̃ kaɛna ↄ̃ndↄ̃dee bɛ, mↄde yↄ̃nkↄↄ è a pↄ́ mↄ́mↄ gↄ̃ↄmɛ. 
Gbɛ̃ kɛ̀ è yãzɛdee kↄ̃n gbɛ̃kɛɛo wɛtɛ è wɛ̃̀ndi kↄ̃n yã nnaao kↄ̃n bɛ̀ɛo e. 
Ɔ̃ndↄ̃dee è lɛ́ɛ gↄ̃sa gbãaanↄ wɛ́tɛa, è zɛkigbãaa kɛ̀ aↄ̃ↄe à náanɛ kɛɛ gboro. 
Gbɛ̃ kɛ̀ à a lɛ́ fↄ̃̀ bensↄ̃ à a nɛ́nɛ kũ̀, àmbe è a zĩnda bↄ yãn. 
Gbɛ̃ kɛ̀ wada kↄ̃n ĩadãnao vĩ tↄ́n fabori, è yã kɛ kↄ̃n zaza bítaomɛ. 
Mɛadee pↄyezi è à kpá gaazi, kɛ̀ à ↄ gbàrɛ zĩizi yãnzi. 
Ègↄ̃ kú pↄ́nidɛnan gurↄ sãnda píngi, gbɛ̃ maaa sↄ̃ è gba da nↄ̀sɛo do. 
Gbɛ̃ zaaa sa'ona Diia nɛ́ tɛ̃̀mɛ, atɛ̃nsa tó èe oo kↄ̃n mↄnafikio. 
Sèeda ɛgɛdee é gɛ̃ zɛ́a, gbɛ̃ kɛ̀ à tɛ̀ à yãzi é kaatɛ ai gurↄ píngi. 
Gbɛ̃ zaaa wɛ́ɛ ègↄ̃ pãsĩmɛ, nↄ̀sɛpurade wɛ́ɛ ègↄ̃ tɛ́ a yãkɛnazi. 
Ɔ̃ndↄ̃ↄ ke wɛ́ɛzɛ̃ɛ ke lɛ́damma, aↄ̃ ke é fↄ̃ à Dii furo. 
Wè sↄ̃ soru kɛ zĩ̀ yãnzimɛ, mↄde Dii bé à zĩ̀blena yã dↄ̃.