YAASINƆ.
23.
Tó n mↄ pↄ́ ble kↄ̃n gbãadeeo, ǹgↄ̃ dↄ̃ gbɛ̃ kɛ̀ kú n aɛ. 
Tó sãnkaradeemɛ n ũ, ǹ fɛ̃ɛ da n kòtoa. 
Ǹton wãkũ kɛ à pↄ́ble nↄ́sideeziro, zaakɛ pↄ́blee pì dɛ lán dabuuzunnɛna bàmɛ. 
Ǹton ĩa da n zĩndaa ↄↄbitawɛtɛna yãnziro, ǹ ↄ̃ndↄ̃ kũ ǹgↄ̃ n zĩndakũna dↄ̃. 
Wè wɛ́ɛ lɛ́ ↄↄa, ben è gɛ̃ zɛ́la, è dɛ̀bɛ bↄbↄ à vĩa lán kúu bà. 
Ǹton aĩapãsĩde pↄ́ blero, ǹton wãkũ kɛ à pↄ́ble nↄ́sideeziro, 
zaakɛ ègↄ̃ a ↄↄ naroo a nↄ̀sɛmmɛ. Eé bennɛ ǹ pↄ́ ble ǹ í mi, mↄde èe kɛnɛ a nↄ̀sɛnlo. 
Nɛ́ à féte kɛ̀ ń blè pisimɛ, sáabu kɛ̀ ń kɛ̀ é kɛ pã. 
Ǹton yã o yↄ̃nkↄↄ swãnlo, zaakɛ eé kyaka n ↄ̃ndↄ̃yãmmɛ. 
Ǹton tↄↄtɛ lɛ́ sèeda zii wurɛro, ǹton tonɛnↄ bú lɛ́ ǹ ká n pↄ́laro, 
zaakɛ aↄ̃ Dãkpari gbãa, eé bↄ n kpɛɛ à yã síńyo. 
Ǹ lɛ́damma yã da n swɛ̃̀n, ǹ làakari dↄ dↄ̃nayãa. 
Ǹton gí n nɛ́ totoziro. Tó n à gbɛ̃̀ flã̀o, eé garo. 
Ǹ à gbɛ̃ flã̀o, lɛ ǹ à bↄ gaa ↄzĩ. 
Ma nɛ́, tó n ↄ̃ndↄ̃ↄ vĩ n swɛ̃̀n, ma pↄↄ é kɛ nna. 
Tó yãzɛdee e bↄↄ n lɛ́n, ma pↄↄ é kɛ nna. 
Ǹton durunkɛrinↄ gwena ni dɛro, ǹgↄ̃ Dii vĩa vĩ gurↄ sãnda píngi, 
zaakɛ nɛ́gↄ̃ ziaa vĩmɛ, tãmaa é n nɛro. 
Ma nɛ́, ǹ ma yã ma lɛ ǹ ↄ̃ndↄ̃ kũ, ǹ tó n swɛ̃̀ gↄ̃ tɛ́ zɛ́ maaazi. 
Ǹton kakↄ̃a kↄ̃n wɛ̃mirinↄro, ǹtongↄ̃ kú lóudeenↄ tɛ́ro, 
zaakɛ wɛ̃dɛri kↄ̃n lóudeeo è gↄ̃ takaasideenↄ ũ, aↄ̃ mɛ̀kpɛtɛ è ń da utakãsãdanammɛ. 
Ǹ n de'ina yã ma, tó n da zi kũ̀, ǹton kyakanlo. 
Ǹgↄ̃ yãpuraa wɛtɛɛ, ǹton ↄ kpáziro, ǹ ↄ̃ndↄ̃ kũ kↄ̃n yãdadanao kↄ̃n wɛ́ɛzɛ̃ɛo. 
Gbɛ̃ maaa de pↄↄ ègↄ̃ nna maamaa, gbɛ̃ kɛ̀ nɛ́ ↄ̃ndↄ̃dee ì pↄↄ ègↄ̃ nnaaamɛ. 
Ǹ tó n de kↄ̃n n dao pↄↄ kɛmma nna, ǹ tó n da'ina guda dↄmma. 
Ma nɛ́, ǹ n nↄ̀sɛ wɛ̃mɛ, n wɛ́ɛ gↄ̃ tɛ́ ma yãkɛnazi, 
zaakɛ kaarua nɛ́ wɛ̀ɛ zòotomɛ, nↄ pãpãkɛri nɛ́ lↄ̀gↄ zã̀mɛ. 
È gbɛ̃ kpákpa lán kpãi wɛ́ɛdewɛ bà, è tó gↄ̃gbɛ̃ paridee gↄ̃ náanɛ sai. 
Dén wè wãiyoo kɛnɛ? Dén wè o'oo kɛnɛ? Dé bé à lɛokpakↄ̃a vĩi? Dé bé à zↄka vĩi? Dé bé è kɛ̃nna pãa? Dé wɛ́ɛ bé à tɛ̃aa? 
Gbɛ̃ kɛ̀ aↄ̃è gì kɛ wɛ̃mikiianↄ, kɛ̀ aↄ̃è gá kpáɛ kɛ geepiwɛ̃ yãkↄ̃tɛnanↄzimɛ. 
Ǹton wɛ́ɛ bii geepiwɛ̃ɛa lɛ à tɛ̃akɛ wãkũ n kũro, zaakɛ ègↄ̃ pipii togoo guumɛ à gɛ̃na lɛ́n ègↄ̃ nna. 
Eé yãa swaa tɛ̃mma lán mlɛ̃̀ bà, eé n gbã à n kũ lán pitigoo bà. 
Nɛ́ wɛ́ɛ si pↄ́ kɛ̀ nɛ́ɛ e yãroolɛ, nɛ́ laasuu kpɛɛgãnda lɛ́ n swɛ̃̀n. 
Nɛ́gↄ̃ dɛ lán gbɛ̃ kɛ̀ daɛna góron ísiaalaa bà, lán gbɛ̃ kɛ̀ kú góro'itɛ bisa mìsↄ̃ntɛ̃a bà. 
Nɛ́ be: Wà ma gbɛ̃, èe ↄ̃maro, wà ma kɛ búgubugu, mɛ́ɛ à wãwãa maro. Bↄrɛn ma wɛ́ɛ é were lɛ mà í wɛtɛ mà mi dↄↄ?