YAASINƆ.
24.
Ǹtongↄ̃ lugaa gbɛ̃ zaaanↄ gwenaziro, ǹton kakↄ̃anyona ni dɛ sero, 
zaakɛ yã gbãaa laasuu bé ègↄ̃ kú ń swɛ̃̀n, yãkete ègↄ̃ kú n lɛ́mmɛ. 
Ɔ̃ndↄ̃ↄn wè bɛ kpáɛo, làakari è tó àgↄ̃ pɛɛna. 
Dↄ̃nan wè pↄ́ káo kpɛ́nↄ pa kↄ̃n auziki maa bɛ̀ɛdeeo. 
Ɔ̃ndↄ̃dee gbãaa ègↄ̃ kaaramɛ, dↄ̃̀ri iko ègↄ̃ gaa aɛmɛ. 
Baaru è tó wà zĩ̀ asãnsi dↄ̃, tó yãkɛkɛrinↄↄ pari, è tó wà zĩ̀ ble. 
Ɔ̃ndↄ̃ↄ lezĩ dɛ faasaideela, lakutu kↄ̃kakↄ̃aa guu à lɛ́ ègↄ̃ nakↄ̃anamɛ. 
Gbɛ̃ kɛ̀ ègↄ̃ zaakɛnnɛna laasuu vĩin wè à sísi mↄnafikide. 
Yãfaasai wàaripana nɛ́ durummɛ, gbɛ̃ke ègↄ̃ ye faboriziro. 
Tó n mɛ̀kpɛtɛ kɛ̀ nawɛ̃akɛgurↄ, n gbãaa bítaro. 
Ǹ gbɛ̃ kɛ̀ aↄ̃ mì pɛ̀ gaaanↄ mì sí, ǹ gí gbɛ̃ kɛ̀ aↄ̃ sòro wèe sii kaatɛnannↄnɛ. 
Tó n bè: O'o, wá dↄ̃ yãro fá, Luda kɛ̀ nↄ̀sɛguuyã dↄ̃ é eroo? N wɛ̃̀ndi gwàri à yã dↄ̃, eé fĩa bo baadenɛ a yãkɛnaamɛ. 
Ma nɛ́, ǹ zↄ́ ble, zaakɛ à maa, zↄ́sa è kɛ lɛ́nɛ nna. 
Lɛn ↄ̃ndↄ̃ↄ è kɛ gbɛ̃nɛ nna a nↄ̀sɛn lɛ. Tó n ↄ̃ndↄ̃ kũ̀, nɛ́gↄ̃ ziaa vĩ, tãmaa é n nɛro. 
Dàde, ǹton gbɛ̃ maaa ua kpákparo, ǹton à bɛ pↄ́nↄ kpokɛro. 
Baa tó gbɛ̃ maaa lɛ̀ɛ gɛ̃̀n swɛɛplaa, è ɛara à fɛɛmɛ, zaakɛrinↄ sↄ̃, mↄ́nzi è ń fu. 
Tó n ibɛɛ lɛ̀ɛ, ǹton pↄnnaa kɛro, tó à fù, ǹton à yáa dↄro. 
Tó Dii è lɛ, eé kɛnɛ nnaro, à pↄfɛ̃ é yãa n ibɛɛ pìamɛ. 
Ǹton tó gbɛ̃ zaaanↄ yã n kũ gbãaro, ǹton zaakɛrinↄ gwena ni dɛro, 
zaakɛ gbɛ̃ zaaa égↄ̃ ziaa vĩro, Luda é zaakɛrinↄ fitia tɛ́ dɛ. 
Ma nɛ́, ǹ vĩa kɛ Diinɛ kↄ̃n kínao, ǹton gbɛ̃nna kpá kↄ̃n gbɛ̃ kɛ̀ aↄ̃ bↄ̀ ń kpɛɛnↄoro, 
zaakɛ yã é ń le kãndomɛ. Dé bé à dↄ̃ lán weé ń ásaru kɛ nà? 
Ɔ̃ndↄ̃deenↄ yãn yɛ̀ dↄ: Gbɛ̃wɛɛgwana yãkpaɛ guu maaro. 
Gbɛ̃ kɛ̀ è yã nnaa kpá taarideea, gbɛ̃nↄ é sa zaaa onɛ, boriinↄ é à ká. 
Gbɛ̃ kɛ̀ è yã da taarideela égↄ̃ à maaa ee, Luda é aubarika dan maamaa. 
Yãwenlana súusu dɛ lán lɛ́pɛna lɛ́a bàmɛ. 
Ǹ n bàazi zĩi kɛ ǹ n bura soru kɛ, nɛ́ gbasa ǹ kpɛ́ bo sa. 
Ǹton n gbɛ̃daaa bↄbↄ a dàn pãro, ǹton tó n lɛ́ gbɛ̃nↄ sãsãro. 
Ǹton be: Mɛ́ kɛnɛ lán à kɛ̀mɛ nàro, kesↄ̃ mɛ́ fĩa bonɛ a yãkɛnaa. 
Ma pã mɛade búnɛ, ma dↄ faasaidee geepiwɛ̃ búzi, 
ben má è lɛ̀ bↄ̀ɛ à dàgula píngi, à sɛ̃̀ kù, gũ̀ kɛ̀ à bò kↄ̃n gbɛ̀o lɛ̀ɛ. 
Ma yã beee gwà ma laasuu lɛ̀a, ben pↄ́ kɛ̀ má è yã dàdamɛ. 
Tó n bè: Mɛ́ ii o féte, mɛ́ kámma bo féte, mɛ́ daɛ féte ↄkpana ma kùa, 
takaasi é bↄ n ã lán kpãi bà, pↄ́kɛ̃sãmma é mↄ́nzi lán gbɛ̃ kɛ̀ gↄ̃kɛbↄ kũna bà.