MAAKU.
13.
Kɛ̀ Yesu e bↄↄ Luda ua guu, à ìbanↄ doke bènɛ: Dannɛri, ǹ gwa lán wà kpɛ́ maaa kɛ̀ takanↄ bò nà kↄ̃n gbɛ̀ maaa kɛ̀ takanↄ. 
Ben Yesu bènɛ: N kpɛ́ ìsi kɛ̀nↄ è píngiↄ́? Gbɛ̀ kee kú guu kɛ̀ kɛ̀ weé tó dikↄ̃aro, weé gboro píngimɛ. 
Yesu vɛ̃ɛna Kùkpɛ sĩ̀sĩgɛɛzi aɛdↄkↄ̃ana kↄ̃n Luda uao, ben Pita kↄ̃n Yemisio kↄ̃n Yohanao kↄ̃n Anduruo à gbèka gusaɛ wà bè: 
Ǹ owe, bↄrɛn yã kɛ̀nↄ é kɛɛ? Bↄ́ bé eégↄ̃ dɛ à píngi kɛgurↄ sèeda ũu? 
Ben Yesu bèńnɛ: À làakari kɛ, àton tó wà a sãsãro. 
Weé mↄ́ pari ma tↄ́o, aↄ̃égↄ̃ bee Mɛsayan ń ũ aↄ̃é gbɛ̃nↄ sãsã pari. 
Tó a zĩ̀nↄ baaru mà kↄ̃n à wàpeo, àton bídi kɛro. Sé beeenↄ kɛ, mↄde anduna yãana kpɛ́. 
Bori kↄ̃n boriio é fɛɛkↄ̃zi, lɛmɛ dↄ bùsu kↄ̃n bùsuo. Tↄↄtɛ nigãnigãna égↄ̃ kú gukenↄn kↄ̃n nↄaao. Yã beeenↄn nↄ̀wãwã naana ũ. 
À làakari kɛ. Weé a kũkũ wà a na yãkpaɛkɛrinↄnɛ ń ↄzĩ, weé a gbɛ̃gbɛ̃ aduakɛkpɛnↄ guu. Weé a zɛ bùsu gbɛ̃nsinↄ kↄ̃n kínanↄ aɛ ma yãnzi, lɛ àgↄ̃ dɛńnɛ ma sèedadeenↄ ũ. 
Sé wà ma baaru nna waazi kɛ bori píngi ma gĩa. 
Tó wà gàaao yãkpaɛkɛkiia, àton gĩakɛ à yã kɛ̀ é o damu kɛro. Yã kɛ̀ Ludaa dàare a lɛ́n gurↄↄ mↄ̀an à o, zaakɛ ámbe é yã oro, Luda Ninimɛ. 
Vĩ̀i kↄ̃n dãaronↄ é kↄ̃ kpáḿma wà dɛ. Denↄ é bↄ ń nɛ́nↄ kpɛɛ. Nɛ́nↄ é bↄ ń denↄ kↄ̃n ń danↄ kpɛɛ wà ń dɛ. 
Gbɛ̃ píngi é zaagu ma yãnzi, mↄde gbɛ̃ kɛ̀ zɛna gbãa ai à gurↄ lɛ́a é mìsina e. 
Tó a tɛ̃̀ guyakari è guu kɛ̀ dɛ àgↄ̃ kúnlo, kyókɛri gↄ̃ dↄ̃, gbɛ̃ kɛ̀ aↄ̃ↄ kú Yudeanↄ bàa sí wà mì pɛ́ kpiiinↄa. 
Gbɛ̃ kɛ̀ kú a kpɛ́ musu tón pita à gɛ̃ kpɛ́ guu à pↄ́ke sɛ́ à bↄoro. 
Gbɛ̃ kɛ̀ kú buraa tón liara bɛ à a uta sɛ́ro. 
Wãiyoo nↄ̀sindadeenↄ kↄ̃n nɛ́dandeenↄ gurↄ beeea. 
À adua kɛ lɛ yã pì tón kɛ buusiɛ gurↄro, 
zaakɛ wɛ́ɛtãmma égↄ̃ kuu gurↄↄ pìnↄa. Zaa gurↄↄ kɛ̀ Luda anduna kɛ̀ ai gbã̀a à taka e kɛro, eé sↄ̃ kɛ zikiro. 
Tó Dii e gurↄↄ pìnↄ lagoro, lɛ gbɛ̃ke é bↄro. Mↄde à gurↄↄ pìnↄ làgo a gbɛ̃ kɛ̀ à ń sɛ́nↄ yãnzimɛ. 
Gurↄ beeea tó gbɛ̃ke bèare, à Mɛsaya gwa kɛ̀ kesↄ̃ à Mɛsaya gwa kãaa, àton síro. 
Zaakɛ Mɛsaya ɛgɛɛnↄ kↄ̃n annabi ɛgɛɛnↄ é mↄ́ wà sèedanↄ kↄ̃n dabudabuyãnↄ kɛ, lɛ wà gbɛ̃ kɛ̀ Luda ń sɛ́nↄ sãsão, tó eé sí kɛ. 
À làakari kɛ. Ma gĩakɛ ma yã píngi òare zaa káaku kↄ̀. 
Gurↄↄ pìnↄ wɛ́ɛtãmma gbɛra ↄfãntɛ̃ é sia kũ, mↄvura é í kɛro, 
sↄsↄnɛnↄ é woro ludambɛ, gbãaa kɛ̀ aↄ̃ↄ kú musunↄ é nigã, 
gbasa wà Gbɛ̃ntee Nɛ́ suna e ludambɛ luguun kↄ̃n gbãa bítao kↄ̃n gakuio. 
Eé a malaikanↄ zĩ, lɛ aↄ̃ gbɛ̃ kɛ̀ à ń sɛ́nↄ kakↄ̃a anduna gooda siigↄ̃ↄa, zaa anduna lɛ́a ai ludambɛ lɛ́a. 
À yã dada kãkã lía. Tó à gã̀nↄ í kpàkpa èe lá bↄ̀rↄ paa, á dↄ̃ kɛ̀ guwãagurↄↄ kà kĩi. 
Lɛmɛ sↄ̃, tó á è yã pìnↄↄ e kɛɛ lɛ, àgↄ̃ dↄ̃ kɛ̀ à suna kà kĩi, à kú kpɛɛlɛa. 
Yãpuraan mɛ́ɛ ooare gurↄↄ kɛ̀ gbɛ̃nↄ é gɛ̃tɛro ai yã pìnↄ gá kɛo píngi. 
Musu kↄ̃n tↄↄtɛo é gɛ̃tɛ, mↄde ma yãnↄↄ gɛ̃tɛna vĩro. 
Gbɛ̃kee à gurↄↄ ke à gurↄ zaka dↄ̃ro, baa malaika kɛ̀ aↄ̃ↄ kú musunↄ ke Luda Nɛ́, sé De Luda. 
À làakari kɛ, a wɛ́ɛ gↄ̃ dↄ, zaakɛ á dↄ̃ gurↄↄ kɛ̀ eé suro. 
À dɛ lán gbɛ̃ kɛ̀ èe gaa wɛ́tɛa bà. À a bɛɛ tò a zĩkɛrinↄnɛ baade kↄ̃n a zĩio, ben à bè a gudãkparinɛ a wɛ́ɛ gↄ̃ dↄ. 
Apinↄ sↄ̃, á dↄ̃ gurↄↄ kɛ̀ bɛdee é suro, uusiɛn yoo, lezãndon yoo, kolɛzuon yoo, ke gudↄnao. Beee yãnzi a wɛ́ɛ gↄ̃ dↄ, 
lɛ àton su kãndo à a le, ée ii ooro yãnzi. 
Yã kɛ̀ mɛ́ɛ ooare mɛ́ɛ oo baade pínginɛmɛ, a wɛ́ɛ gↄ̃ dↄ.