LUKU.
12.
Gurↄ beeea gbɛ̃nↄ kàkↄ̃azi, wà ń lɛ́ dↄ̃ro, ai aↄ̃ↄe kɛ̀sɛ pɛ́ɛpɛɛɛkↄ̃a, ben à yã ò a ìbanↄnɛ gĩa à bè: À làakari kɛ Farisinↄ burɛdisɛsɛ'ɛ̃zɛ̃zi. Àmbe ń mↄnafiki ũ. 
Pↄ́kee kuu utɛna kɛ̀ é bↄ gupuraaaro. Asiiyã kee kuu kɛ̀ weé gí dↄ̃ziro. 
Lɛmɛ dↄ yã kɛ̀ á ò gusiaan weé ma gupuraaa, asiiyã kɛ̀ á ò kↄ̃ swãn kpɛ́tu weé à kpàakpa kɛ gãalɛ. 
Ma gbɛ̃nnanↄ, mɛ́ɛ ooare, gbɛ̃ kɛ̀ aↄ̃é mɛ̀baa kaatɛ à gbɛra aↄ̃é fↄ̃ wà yãke kɛare dↄroonↄ, àton vĩa kɛńnɛro. 
Mɛ́ gbɛ̃ kɛ̀ dɛ à vĩa kɛnɛ oare. À vĩa kɛ Ludanɛ kɛ̀ gbãa vĩ à a zu tɛ́ guu mɛ̀kaatɛna gbɛra. Eè, mɛ́ɛ ooare, à vĩa kɛnɛ. 
Wè sãtɛ̃ mɛ̀n sↄↄro yá kↄbↄ plaaroo? Mↄde aↄ̃ ke yã è sã Ludanlo. 
Baa a mìkãnↄ, à à lɛ́ dↄ̃. Àton vĩa kɛro, a bɛ̀ɛ dɛ sãtɛ̃ pariinↄla. 
Mɛ́ɛ ooare, gbɛ̃ kɛ̀ zɛ̀mao gbɛ̃nↄ aɛ, Gbɛ̃ntee Nɛ́ é zɛo Luda malaikanↄ aɛ. 
Gbɛ̃ kɛ̀ lɛ́ sɛ̀mazi gbɛ̃nↄ aɛ sↄ̃, mɛ́ lɛ́ sɛ́zi Luda malaikanↄ aɛ. 
Tó gbɛ̃ Gbɛ̃ntee Nɛ́ zaa bò, Luda é kɛ̃nɛ. Mↄde tó gbɛ̃ Luda Nini tↄ́ zaaa sì, eé kɛ̃nɛro. 
Tó wèe gaaao yãkpaɛkɛkiia aduakɛkpɛn ke kínanↄ kↄ̃n gbãadeenↄ aɛ, àton a zĩnda bↄna ke yã kɛ̀ é o damu kɛro, 
zaakɛ Luda Nini bé eé yã kɛ̀ dɛ à oo daare zĩ beeea. 
Zà guu gbɛ̃ke bè Yesunɛ: Dannɛri, ǹ o ma vĩ̀inɛ à ma baka kpáma wa túbi guu. 
Ben à wèàla à bè: Ma gbɛ̃, dé bé à ma diɛ a yãkpaɛkɛri ke a yãgↄ̃gↄ̃ri ũu? 
Ben à bè gbɛ̃nↄnɛ: Àgↄ̃ a zĩnda kũna dↄ̃. À làakari kɛ pↄ́ píngi aĩapãsĩkɛnazi, zaakɛ auziki nɛ́ gbɛ̃ntee wɛ̃̀ndinlo, baa tó à fↄ̃̀ àgↄ̃ dikↄ̃a dia. 
Ben à yã lɛ̀kↄ̃zińnɛ à bè: Ɔↄdee bé à kuu à buraa blɛɛ kɛ̀nɛ maamaa, 
ben à laasuu lɛ̀ à bè: Bↄ́n mɛ́ kɛɛ? Má blɛwɛɛkakii vĩro. 
Ben à bè: Pↄ́ kɛ̀ mɛ́ kɛɛn yɛ̀: Mɛ́ ma pↄ́kaɛkiinↄ gboro, mɛ́ à bítanↄ bo, mɛ́ ma blɛwɛɛ kán píngi kↄ̃n ma auzikinↄ. 
Mɛ́ be ma zĩndanɛ: Gbɛ̃, n gĩakɛ ń pↄ́ maaa vĩ bíta kɛ̀ eé kányo wɛ̃̀ ũgbangba? Ǹ kámma bo ǹ pↄ́ ble ǹ í mi ǹ pↄnnaa kɛ. 
Ben Luda bènɛ: Yↄ̃nkↄ, gwãavĩa mɛ́ n wɛ̃̀ndi gbekamma. Soru kɛ̀ ń kɛ̀ é gↄ̃ dé pↄ́ ũmɛ? 
Lɛmɛ gbɛ̃ kɛ̀ auziki tↄ̃̀kↄ̃azi, mↄde à dɛ ↄↄdee ũ Luda kiiaro yã dɛ lɛ. 
Ben à bè a ìbanↄnɛ: Beee yãnzi mɛ́ɛ ooare, àton a wɛ̃̀ndi kã̀hãn kɛ à be bↄ́n wé blero, àton a mɛ̀ kã̀hãn kɛ à be bↄ́n wé daro. 
Wɛ̃̀ndi dɛ pↄ́bleela. Mɛ̀ dɛ pↄ́kãsãala. 
À gbáa kãnkãnanↄ gwa. Aↄ̃è pↄ́ tↄ̃ro aↄ̃è pↄ́ kɛ̃ro, aↄ̃ↄ dↄ̃̀ ke gbàsↄ vĩro, baa kↄ̃n beeeo Luda è ń gwa. Á bɛ̀ɛ vĩ maamaa dɛ bãanↄla fá! 
A tɛ́, dé bé eé fↄ̃ à a wɛ̃̀ndi gbã̀a kaara, baa gurↄ do, a kã̀hãnkɛna guuu? 
Tó é yã nɛ́ngo kɛ̀ fↄ̃ro, bↄ́yãnzi ée yã kpaaanↄ kã̀hãn kɛɛzi? 
À lá vúdeenↄ gwa sɛ̃̀n lán aↄ̃ↄ dɛ nà. Aↄ̃è zĩi kɛro aↄ̃è buu tãro, mↄde mɛ́ɛ ooare baa Sulemanu kↄ̃n a auzikio, èe uta da à maaa kà aↄ̃ ke ũro. 
Sɛ̃̀la kɛ̀ kuu gbã̀a eé tɛ́ kũ zia, lán Luda è pↄ́ nazi lɛ nà, amↄa ludanaanɛkɛ̃sãnadeenↄ, weé a pↄ́ o dↄↄ́? 
Àton tó pↄ́ kɛ̀ é ble ke pↄ́ kɛ̀ é mi yã dↄare aɛro. Àton à damu kɛro. 
Pↄ́ pìnↄ píngi yã è dↄ anduna kɛ̀ kifiinↄnɛ aɛ, a De sↄ̃ↄ dↄ̃ kɛ̀ pↄ́ pìnↄ kↄ̃ sìao. 
À tó kpata kɛ̀ bↄ̀ à kiia yã dↄare aɛ, eé pↄ́ pìnↄ kaaraare. 
Ma kpàsa nɛ́ngo gbɛ̃nↄ, àton vĩa kɛro, zaakɛ a De pↄyezimɛ à a kpá kpata pìn. 
À pↄ́ kɛ̀ á vĩinↄ yá à takaasideenↄ gba à ↄↄ. À ↄↄsↄ kɛ̀ è zi kũroo zↄ̃, ludambɛ auziki kɛ̀ è yãaro kákii ũ, kɛ̀ kpãi è sↄ̃ziro, kↄ̀kↄ sↄ̃ è à yakaro. 
Zaakɛ guu kɛ̀ a auziki kún, gwen a làakari égↄ̃ kún se. 
Àgↄ̃ kú soru guu, à tó a fitia gↄ̃ nana. 
Àgↄ̃ dɛ lán gbɛ̃ kɛ̀ aↄ̃ↄe ń dii suna dãa à su kↄ̃n nↄsɛ pↄnnakɛnao bà, lɛ gurↄↄ kɛ̀ à mↄ̀ à gbà lɛ̀, weé zɛ́ wɛ̃nɛ gↄ̃ↄ. 
Aubarikadeenↄn zĩkɛri kɛ̀ ń dii é ń le bɛ̃ɛ a sugurↄↄa pìnↄ ũ. Yãpuraan mɛ́ɛ ooare, dii pì é a pↄ́nↄ kɛkɛ à yi, eé ń vɛ̃ɛ, eé pↄ́blee kakↄ̃ańnɛ. 
Baa tó à mↄ̀ lezãndo ke kↄngↄ idɛ'idɛ, tó à ń lé lɛ, aubarikadeenↄn ń ũ. 
Àgↄ̃ yã kɛ̀kii dↄ̃. Tó bɛdee gurↄ zaka kɛ̀ kpãi é mↄ́a dↄ̃̀ yã, lɛ eé tó à a kpɛ́ fↄ̃ro. 
Apinↄ sↄ̃, àgↄ̃ kú soruo, zaakɛ Gbɛ̃ntee Nɛ́ é su gurↄ zaka kɛ̀ a wɛ́ɛ dↄzirooamɛ. 
Pita bè: Dii, wa yãnzin n yã pì lɛ̀kↄ̃ziziↄ́, ke baade píngi yãnzimɛ? 
Dii bè: Dén bɛgwari náanɛde làakaridee kɛ̀ à dii è a zĩkɛrinↄ nanɛ a ↄzĩ lɛ à pↄ́blee kpáḿma à gurↄↄa ũu? 
Aubarikadeen zĩkɛri kɛ̀ à dii à lè èe kɛɛ lɛɛ a sugurↄↄa ũ. 
Yãpuraan mɛ́ɛ ooare, eé a auziki píngi nanɛ a ↄzĩmɛ. 
Mↄde tó zĩkɛri pì bè a nↄ̀sɛ guu a dii suna e gì kɛɛ sↄ̃, ben à nà a zĩkɛri daanↄ gbɛ̃gbɛ̃naa, gↄ̃gbɛ̃nↄ kↄ̃n nↄgbɛ̃nↄ, èe sãnkara pↄ́ blee èe wɛ̃dɛɛ kɛɛ, 
à dii é su gurↄↄ kɛ̀ à wɛ́ɛ dↄzirooamɛ, gurↄ zaka kɛ̀ à dↄ̃rooa, eé à zↄ̃zↄ̃kↄ̃rɛ à à baka da kↄ̃n kifiinↄ. 
Zĩkɛri kɛ̀ à a dii pↄyezi dↄ̃, ben èe soru kɛ à à pↄyeziyã kɛ̀ro, weé à gbɛ̃ búgubugu. 
Zĩkɛri kɛ̀ à a dii pↄyezi dↄ̃ro, ben à yã kɛ̀ dɛ wà à gbɛ̃zi kɛ̀ sↄ̃, weé à gbɛ̃ fétemɛ. Gbɛ̃ kɛ̀ Luda à gbà bítan Luda é wɛtɛa bíta. Gbɛ̃ kɛ̀ Luda pↄ́ nànɛ a ↄzĩ bítan, eé gbekaa dɛńla. 
Tɛ́n ma mↄ na andunaa, mɛ́ɛ gizi tɛ́ pì gↄ̃ kũu se tiaro. 
Má wɛ́ɛtãmma vĩ kɛ̀ mɛ́ gɛ̃n, má kú laasuu bíta guu ai à gá yãao. 
Ée daa ma mↄ lɛ gbɛ̃nↄ gↄ̃ nna kↄ̃o anduna guun yↄ́? Auo! Mɛ́ɛ ooare, kɛ̃kɛ̃kↄ̃ana yãnzin ma mↄzi. 
Zaa tia ua kɛ̀ gↄ̃ↄn sↄↄroonↄↄ kún, aↄ̃é kↄ̃ kpaatɛtɛ. Gↄ̃ↄn aagↄ̃ↄnↄ é bↄ gↄ̃ↄn plaaanↄ kpɛɛ, gↄ̃ↄn plaaanↄ é bↄ gↄ̃ↄn aagↄ̃ↄnↄ kpɛɛ. 
De é bↄ a nɛ́gↄ̃gbɛ̃ kpɛɛ, nɛ́gↄ̃gbɛ̃ é bↄ a de kpɛɛ. Da é bↄ a nɛ́nↄgbɛ̃ kpɛɛ, nɛ́nↄgbɛ̃ é bↄ a da kpɛɛ. Zã da é bↄ nↄzãree kpɛɛ, nↄzãree é bↄ a zã da kpɛɛ. 
Yesu bè pariinɛ: Tó á è lou e sisii ↄfãntɛ̃gɛ̃kpɛn kpa, é be gↄ̃ↄ lou é ma, ben è kɛ lɛ. 
Tó á è ĩa e bↄↄ sↄↄmɛtɛ kpa, é be guu é wã, bensↄ̃ è wã. 
Mↄnafikideenↄ! Á tↄↄtɛ kↄ̃n ludambɛɛo wɛ́ɛ dↄ̃kↄ̃zi, ben á gurↄↄ kɛ̀ki yáasi dↄ̃ sↄ̃ro nɛ́? 
Bↄ́yãnzin á yãkɛna a zɛ́a dↄ̃ a zĩndaaroo? 
Tó n ibɛɛ e gaanyo yãkpaɛkɛkiia, ǹ aĩa kɛ lɛ à gaafaa kɛnnɛ zaa zɛ́n, lɛ àton n gáɛ à gányo yãkpaɛkɛri kiiaro yãnzi. Tó nɛ́ɛ kɛ lɛro, yãkpaɛkɛri pì é n kpá dogaria, dogari é n da kpɛ́siaan. 
Mɛ́ɛ oonnɛ, nɛ́ bↄ gwero ai ǹ gá fĩa boo píngi. Baa kↄbↄ é gↄ̃ tɛ́nziro.