1 E Moses i ta tabu i ta maea, “Muri na tahuna mu made pali vona a malala e BAKOVI DAGI a Vure ne mua i habia ne mua mu gu made vona, 2  * Nim 23:19mua takutaku mu bole a maki ni kani ri moro muga na hania na robo iea, mu tahoni na kulopi mu bole lakea vona a tabeke a Vure i vulakia ge made vona ge vakarere a rana vona. 3 Mu lakea na prister i matakari a nihabi mu taki maea, ‘Iau a valai na malala e BAKOVI DAGI i ta muholi vona ne huriki a gare ne mia ge habia ne mia.’

4 “E huriki a prister ri gi bole a kulopi na limane mua ri gi ru tabukoi na dede ne BAKOVI DAGI a Vure ne mua. 5 Na matana Vure mu ratea a ngava iea, ‘A gare ne mia e Abraham, a bakovi o Aram, i pea a tanga vona i laho viliha, i bolea a kabu vona ri vano ri made o Egipto, ri bele kupo ri gau hateka. 6 Muri e huriki a Egipto ri rata hale mia, ri vakavora hateka mia vonga. 7 Lakea mi tangi lakea ne BAKOVI DAGI a Vure ne huriki a gare ne hita, ge kori mia na nimade hale ne mia, na leho dagi ne mia, na hini ri pahadanu mia. 8 Lakea e BAKOVI DAGI i rata a leho dagi hateka i korimule mia o Egipto. I rata a maka nivakasiri, a maki hale i bele ne ria. 9 Muri i bole valai mia koea i habia ne mia a malala i vona a maki ni kani iea. 10 I mavonga ngane, o BAKOVI DAGI, a habi vomu a maka maki ni kani ri moro muga na malala o habi nau.’

“O ta lobo, muri o bole a kulopi o ru tabukoi na matane BAKOVI DAGI a Vure ne mua, o kavurikea vonga. 11 Mu vivi vona a maka maki kamumu i habi pali ne mua, turane huriki a kabu ne mua. E huriki a kabu ne Levi, turane huriki a viri basi ranga ri gi vivi turane mua.

12  * Vin 14:28-29 “Na pida i tolu lobo, mu bole a maki ni kani ri bele na hania ne mua, mu ru na naguna ge ravulu. Mu veru ne huriki a kabu ne Levi, na viri basi ri made turane mua, ne huriki a tuna duku a havuri. Mu rata mavonga e huriki nga bara ri tahoka a maki ni kani, ri kani ri maru. 13 Na tahuna mu rata lobo a leho nga, mu taki maea e BAKOVI DAGI a Vure ne hita, ‘A maki lobo o ngaru mia mi gi habi vomu, mi veru lobo pali, i uka ranga ge tabuli mule na ruma ne mia. Mi habi ne huriki a kabu ne Levi, na viri basi ri made turane mia, ne huriki a tuna duku, ne huriki a havuri. Mi ramai lobo a maka nitamu. Mia i uka ma mi longotaro a nitamu mi gi longokaburungi. 14 I uka ma mi kani a kalavana maki ni kani vomu na tahuna mi taringi a bakovi i mate. Na tahuna mi muto na matamu i uka ma mi bole tala na ruma mia ranga maki ni kani nga, i uka ma mi bole ranga mi gi habi ne huriki ri mate pali. O Vure, ioe e BAKOVI DAGI nau, a rata lobo a maki i manga a hini o vakuku iau vona ga rata. 15 O made na hunu na tanga kamumu vomu o tabea, o mata puru valai ne mia e huriki a Israel, o gamai mia. O gamaia a malala o habi ne mia, i manga a hini o ta muholi vona ne huriki a gare ne mia hosi, ra malala i vona a maki ni kani.

16 “Na parava iea e BAKOVI DAGI a Vure ne mua i ngaru mu gu ramai a maka vinara na hatene mua, na niluhoi ne mua. 17 Mona mu vakalongo pali, e BAKOVI DAGI ia a vure ne mua. Mu ta muholi pali mu gu ramai a narona, a maka vinara vona, mu gu rata a maki lobo i taki. 18  * Nim 19:5; Vin 4:20; 7:6; 14:2; Tit 2:14; 1Pe 2:9Mona e BAKOVI DAGI i vakalongo, ge mua e huriki a ngate vona, i manga a hini i ta muholi vona. I taki mua mu gu ramai lobo a maka vinara vona. 19 Ge vakarere, ge ru langa a rane mua na maka kabu lobo i rata rike. Pali i taba mua ge mua a kabu vona kunana, i manga a ngava i taki.”