1 “Ngane ga taki ioe vona a maki go ratea ne Aron turane huriki e tuna, ge ria a prister nau. O bole a bulmakau, a sipsip a toga karaba ge rua ge gavutuvutu. 2 O bole a bret kamumu ge uka a is, o vuli turana a namona oliv, o rata a bret a bisket. 3 O ru dili na kulopi a maka bret a bisket o bole valai nau turana a bulmakau, a sipsip nga ge rua.

4 “O tuli valai na matana kape nau e huriki e tune Aron bakovi, o vahilolo ria na naru. 5 Muri o vakarodoa na bagetua na prister e Aron. O vakarodoa na siot, a nirodo ola ola, a kala kiroko, a kala na ngala, o vakarea ia vona a palabele. 6 O bolea a hoi o vakakubea vona. Muri o bolea a hulongi ni gamai, o pipi dilia na hoi vona. 7 Muri o bolea a nibiri o guru langea na gina o gamaia. 8 O gamai loboa e Aron o tuli valai e huriki e tuna, o vakarodo ria na siot, 9 o vakarea ria na palabele, o kae a hoi na gine ria. Ra naro o ratea i vakasiri e Aron turana e tuna mai, ria e huriki a prister nau. Re huriki a bakovi nga, turane huriki a hamone ria bara ri rata vakaroro a leho na prister.

10 “O bole lakea na matana kape nau a bulmakau ge a nihabi. Muri e Aron turane huriki e tuna ri gi ru langa a limane ria na mapana. 11 O rabalakia na matagu a bulmakau, tabukoi na matana kape nau. 12 O bole ranga darana bulmakau na kuku limamu, o ru na tupina dede. Muri o bole paru a dara i tababana, o guru polotano na dede. 13 O bole a maka mahalana bulmakau turana a hatena, a vuanalipina, o gutu na dede. 14 Pali a bobona bulmakau, a kulina, a tamudina, o bole tala, o rungani polovavo na mada. Ra bulmakau iea, a nihabi ne vona ni puga vuroki a naro hale.

15 “O bolea a sipsip a toga ge a nihabi. E Aron turana e tuna mai, ri gi ru langa a limane ria na gina tuna sipsip. 16 Muri o rabalakia a sipsip, o bole a darana, o voro langa na tabeke na dede i va. 17 O poka kesikesia, o vahilolo a vahana ge rua, a maka mahalana, o ru langa na mapana. 18  * Epe 5:2; Pili 4:18O gutu ge vuro lobo liu a sipsip na dede, ge a nihabi gutu-vuro na kanono ne vona e BAKOVI DAGI. Lakea iau bara burongi a mangina bara vivi.

19 “O bole tabua tara sipsip, o taki e Aron turana e tuna mai, ri gi ru langa a limane ria vona. 20 O rabalakia a sipsip iea, o bole ranga darana o ravu na kanena taruna talingana e Aron, e tuna mai. Muri o bole tabu a dara o ravu na kukukoru na limana a kanena, a kukukoru na vahana a kanene ria. O bole paru a dara i tababana, o voro langa na tabeke lobo na dede. 21 Muri o bole ranga dara i tabuli na gagana dede, a nibiri, o voro langa ne Aron turane huriki e tuna. O voro langa tabu na bagetua ne ria a dara, a nibiri. A naro o ratea ne ria, i vakasiri a bagetua ne ria a maki nau.

22 “O bole tabua tara sipsip a toga, o pokea, o bole lobo a maka vina ge a nihabi na tahuna ni gamai a prister. O bolea a kuna, a kinakena, a hatelilo, a hatekato, a hatelipi turana a vina, a gepena kanena. 23 Na kulopi na bret i uka is, ra nihabi nau, o bole tala a bret ni gutu na namona oliv, a bret tara i uka ma ni gutu na namona oliv, a bisket. 24 Muri o habi a bret a balena sipsip ne Aron, turane huriki e tuna. Ri gi bole a nihabi nga ri gi tabari iau vona, ge a nihabi na nitabari. 25 O bole na limane ria a maki ni kani, o gutu na dede turana maka nihabi gutu-vuro, ge a nihabi na kanono ne vona e BAKOVI DAGI. Lakea iau bara burongi a mangina bara vivi. 26 O bolea a siana sipsip ni poka muri ne vona ni gamai e Aron, o tabari iau vona. Muri o bolea ge ne vomu.

27 “Na tahuna o ngaru ni ratea tara bakovi ge ia a prister, o bole a siana, a pona sipsip, o tabari iau vona. Muri o habi ne huriki a prister ra maka balena nga. 28 E huriki a Israel ri gi rata vakaroroa a nihabi iea, ri gi habia nau e BAKOVI DAGI a sipsip, ne vona a nivalemu. Muri ri gi habi ne Aron turane tuna mai a siana, a gepena sipsip, ri gi kani.

29-30 “Muri ne Aron ge mate, a maka bagetua vona na prister ge vabole polo vona e huriki a hamona. E rei ni gamai ge ia a prister dagi ge bole a murina, ge rodo a maka bagetua nga. Ra bagetua nga ge rodo na parava ge polorua, na tahuna i rata a leho na Tabeke Nitaba pololilo na Kape na Vaponga.

31 “Na tahuna o gamai e Aron, e huriki e tuna, o bolea a bobona sipsip a toga ra o habia nau, o ru dili na ulo o nono pololiloa na mailo nitaba. 32 E Aron turane tuna mai ri gi bole a bobona sipsip a bret i tababana na kulopi, ri gi kani na matana Kape na Vaponga. 33 Ri gi kani ra maki ni kani ni habi nau, ga puga vuroki a naro hale ne ria, na tahuna ni gamai ria ge ria a prister. E huriki a prister kunana ri gi kani ra kinani nga. E huriki a bakovi tavula nahea ri gi kani a vuhuna ni gamai. 34 A bobona sipsip a bret ranga ge palala taho a hini, naha ni kani. Ra maka kinani nga ni gamai, ni gi gutu na kanono ge vuro.

35 “O ratea a leho iea ni gamai e Aron turane huriki e tuna na parava ge polorua, ge manga a naro a vakuku ioe vona. 36 Na parava lobo o habia nau tara bulmakau, ge a nihabi ni kavitagu a naro hale. Ra nihabi iea ge ratea a dede nau ge matapado na matagu. O guru langa na dede a nibiri, o gamaia ga dede nau. 37 O gamaia a dede iea na parava ge polorua, ga maki nau kunana. A viri tara ge nugua, a maki tara ge padoia bara i malamala.

38 “Na parava vakaroro o bole a tuna sipsip ge rua, a pida ne rua ge taku, o habi na dede. 39 O habia na hatelanga tara na malunga liu tara. 40 O bolea a kilo ge taku na plaoa o vuli turana a lita ge taku na namona oliv, o habi nau turana a sipsip. O guru tabua a lita na vain ge taku, ge a nihabi na vain. 41 O tabari tabua nau na malunga liu a sipsip tara. O bole a bret ge manga a hini muga turana a namona oliv, a vain, mu habi nau ge manga a nihabi na hatelanga, ge a nihabi gutu-vuro na kanono ne BAKOVI DAGI. Lakea iau bara burongi a mangina bara vivi. 42 Ra nihabi ni gutu-vuro ge rata vakaroroa e huriki a hamone mua na matana Kape na Vaponga, iau e BAKOVI DAGI ga tagui mua vonga, ga ta turane mua. 43 A nipara dagi nau ge bele na kape, ge ratea a tabeke iea, a tabeke nau kunana. Nahea tara viri ge valai vona.

44 “Ga gamai a kape, a dede, ga maki nau kunana. Ga gamai tabu e Aron turane huriki e tuna, ri gi rata a leho nau manga a prister. 45 Ga made turane huriki a Israel, ge iau a Vure ne ria. 46 Ri gi lohoka kamumu nau, iau kunana a tuli tala ria o Egipto, a taparaki valai ria koea ga made turane ria. Iau kunana e BAKOVI DAGI a Vure ne ria.