1 E huriki a Ismael ri turaria e Iosep i lakea o Egipto, ri habia ne Potipar i konea. E Potipar a bolekori ne Parao, a ubu na tagari na vabinga vona. 2  * Apo 7:9E BAKOVI DAGI i matakaria e Iosep, i leho kamumu kunana na ruma e Potipar. 3 E Potipar i masia i kamumu a vilona, a vuhuna e BAKOVI DAGI i laho turana, i matakaria. 4 E Potipar i masia a leho vona i vivi, i ru ia ge ia a bolekori vona. I ru ia ge matakari a ruma vona, turana a maki lobo pololilo vona.

5 E BAKOVI DAGI i gamaia e Potipar, a vuhuna i rata kamumua e Iosep, i ru ia a matakari na ruma turana a maki lobo vona. I gamai tabu a maki lobo na hania vona. 6 E Potipar i ule lakea lobo ne Iosep a maki lobo i matakari. Na tahuna e Iosep i matakari a ruma ne Potipar, e Potipar i uka ma i luhoi lege vona tara maki. A maki i luhoi kunanea, a kinani. E Iosep i mata kamumu, i koru labeka. 7 I polo a parava ranga, e girihine Potipar i masia, i masigoroa, i takia, “O valai, o mahita turagu.”

8 Pali e Iosep i marikoi, lakea i takia, “Iau a matakari vona a hini nga. E girihimu i habi na limagu a maki lobo na ruma. I uka ma i luhoi lege vona tara maki. 9 I uka a viri ge matakaria a ruma, iau kunana a matakaria. E girihimu i uka ma i hatekakaria nau tara maki. Ioe kunana i hatekakari iau vomu, a vuhuna ioe e girihina. Ga rata a naro hale navai na matana Vure?”

10 Na parava vakaroro i ngere maia na ngava e Iosep. Pali e Iosep i marikoi hateka ni lokovonga tabukoi vona, o ni mahita turana.

11 Na parava tara i dili na ruma e Iosep ge rata a leho vona. E huriki a vora na ruma, i uka ma ria pololilo. 12 Lakea a ngatavine i tangotatea na varakia vona e Iosep, i takia, “O valai o mahita turagu.”

Pali e Iosep i pe purua na limana ngatavine a varakia vona, i ha tala na ruma ia. 13 A ngatavine i masia a varakia i ha taroa na limana, 14 lakea i gale e huriki a vora na ruma i ta maea, “Mata lakea, ra koma o Hibru ni bole valai na ruma ne hita. I ngaru ni ratapile hita! I valai ta ge mahita turagu, lakea a haloho iau. 15 I longo iau a haloho, i pe purua tabukoi nau a varakia vona, i ha tala na ruma ia.”

16 A ngatavine i bolea a varakia ne Iosep, i davea e girihina ge hamule na tanga, ge vakasiria vona. 17 Lakea i tuverei maea ne girihina, “Ra vorakato na Hibru o bole vilia na ruma tarua, i valai ta ge rata a naro hale nau. 18 Na tahuna a haloho iau, i pe tabukoi nau a varakia vona, i ha tala na ruma ia.”

19 Muri ne Potipar i longoa e girihina i ta maea, “Ra naro iea i rata virihi iau vona a vorakato vomu.” I madihi a hatena.

20 Lakea e Potipar i ru dilia na bavi e Iosep, na hini ni ru vona e huriki ri longotaro a nita na hariki. Pali na tahuna e Iosep i made na bavi, 21  * Apo 7:9e BAKOVI DAGI i matakaria, i ratea a matakari na bavi i ngarua. 22 Lakea a tagari na bavi i rua e Iosep i matakari e huriki lobo na bavi, turana a leho lobo ni rata pololilo. 23 A tagari na bavi, i uka ma i loho lege vona a leho e Iosep i rata, a vuhuna e BAKOVI DAGI i matakaria, i rata kamumu a maka leho.