10
E Nadap e Abihu Ru Mate
1 Na tahuna iea e tune Aron ala rua, e Nadap, e Abihu, ru pi a kanono, ru ru dili na ulo kiroko ni rata na aen, ru guru puru a havu mangisipa na ulo, ru habi a kanono i uka ma ni taba ne BAKOVI DAGI. Pali e BAKOVI DAGI i uka ma i taki rua ru gu rata mavonga. 2 Lakea i malaviriri kunana e BAKOVI DAGI i rudua a kanono i puru valai i gutu parina rua ru mate na matana. 3 Muri e Moses i takia e Aron, “E BAKOVI DAGI i ta maea:
‘E huriki ri leho nau,
ri gi lohoka kamumu vona iau a kiripiripi.
Na matane huriki lobo,
bara vakasiri ria vona a nitora dagi, a bagetua nau.’ ”
E Aron i longoa a nita iea, i uka ngavana.
4 Muri e Moses i gale e Misael, e Elsapan, e tune Usiel, e tamane Aron kiroko, ru valai vona. Lakea i taki rua i ta maea, “Muru valai, muru kaloho tala a podane turane marua na mailo na Vure, muru bole tala na mada.” 5 Ru vano ru kaloho tala na mada a podane rua, i manga a ngava e Moses i vakuku. Pali uka ma ru kali tala a nirodo na bakovi nga ru mate.
6 Ngane e Moses i habi a ngava tabu ne Aron turana e tuna ala rua, e Eleasar, e Itamar. I taki tou i ta maea, “Nahea ge patoka a vune matou, naha ni rape a varakia matou, ma ga moto rata mavonga bara moto mate, a rongova ne BAKOVI DAGI bara i bele ne huriki. Pali e huriki a viri ne mua a Israel, ria ri gi kalo vona ra bakovi nga e BAKOVI DAGI i rabalaki rua na kanono. 7 Naha ni pe taroa a Kape na Vaponga, ma moto go mate. A gamai matou pali, matou a vora ne BAKOVI DAGI kunana.” I mavonga, to longoa a nitane Moses, to ramaia.
A Vinara ne Huriki a Prister
8 E BAKOVI DAGI i takia e Aron i ta maea, 9 “Na tahuna ioe turana e tumu ala rua moto dili na Kape na Vaponga, naha ni ninu a vain a naru vagole, ma moto go mate. Ra vinara iea, ge ramai vakaroroa e huriki a hamone matou. 10 Moto tovo matou ni matakilaka vona a maki ni taba, a maki i uka ma ni taba, a maki i kaba, a maki i muto. 11 Bara moto tovo e huriki a Israel na maka vinara e BAKOVI DAGI i vakuku e Moses vona.”
12 * Levi 6:14-18E Moses i taki e Aron turana e tuna ala rua ru tababana ni mahuri, e Eleasar, e Itamar, i ta maea, “Moto bole a vit i tababana na nihabi ni gutu na kanono ne BAKOVI DAGI, moto rata a bret i uka is, moto kani tabukoi na dede, a vuhuna a bret iea ni taba. 13 Moto kani na hini ni taba pololilo na nure na Kape na Vaponga. A naguna vit ni gutu kaleva ra ni habi ne BAKOVI DAGI, moto bole ge ne matou, ne vona e tune matou bakovi, moto bole tala na nihabi ni gutu na kanono ne BAKOVI DAGI, i ramaia a ngava ni vakuku iau vona. 14 * Levi 7:30-34Pali matou turana e huriki e tune matou bakovi, e tune matou ngatavine, mu bolea na nihabi na nivalemu ne huriki a Israel a siana ni tabari, a pona a sipsip, a bulmakau. A tabeke tara i matapado na matana Vure, moto vano moto kani vonga. 15 E huriki a bakovi, a ngatavine ri gi habi a vahana, a siana bulmakau, a sipsip turana a vina, moto bole moto tabari e BAKOVI DAGI vona. Muri moto gutu-vuro na dede a vina, pali moto bole a pona, a siana, moto kani. Ra pona, a siana sipsip, a bulmakau bara ne matou kunana vakaroro, turana e huriki e tune matou, i manga a ngava e BAKOVI DAGI i vakuku.”
16 Na tahuna e Moses i nana kado tou na a ra maki to ratea vona a meme na nihabi na naro hale, to takia ta to gutua pali na kanono! Lakea e Moses i tahate e Eleasar e Itmar, i ta maea, 17 * Levi 6:24-26“I navai i uka ma moto kani a nihabi na naro hale pololilo na kape? Ra nihabi iea ni taba hateka. Ni habi ne matou, moto go kube a rarenga ne huriki, moto go kavitagu ria na matane BAKOVI DAGI. 18 Matou i uka ma moto bole a darana nihabi ge dili na Tabeke Nitaba, pali i navai i uka ma moto kani pololiloa vonga, ge ramaia a ngava iau a vakuku mua vona?”
19 Lakea e Aron i takia e Moses, “O longo, mona e huriki ri habi a nihabi na naro hale ne ria, a nihabi gutu-vuro. Pali ge a ra, a maki hale i bele nau pali. I mavonga, na tahuna ga kani a nihabi na naro hale mona, e BAKOVI DAGI ge ngarua a narogu?” 20 Na tahuna e Moses i longoa a ngavane Aron, i kamumu a lohona.