A Vuhuna.
3.
A mata i moro hateka na rabu na taminga, i rangi a maka livoa lobo e BAKOVI DAGI a Vure i rata rike. I nanea a ngatavine, “I muholi a Vure i taki marua, nahea muru gu kani a maka kanena kai lobo na hania?” 
A ngatavine i koli, i ta maea, “Maria bara miri kani lobo a maka kanena kai na hania, 
pali a Vure i taki maria tabu nahea miri gi kani a kanena kai na kurukuruna hania, nahea miri gi padoi ia, ma ga miri gi mate.” 
Lakea a mata i takia a ngatavine, “I uka ma muru gu mate. I uka liu. 
A Vure i lohoka, bara muru kania, a matane marua bara i palala, bara muru manga a Vure na nilohoka na naro kamumu na naro hale.” 
Ngane a ngatavine i masia a kanena kai i kamumu na nikanina, i kamumu na matana, i ngaru ni tahoka a niluhoi dagi. I bolea, i kania. Muri i bole a kalavana i habia ne girihina, ia tara i kani. 
Muri a matane rua i palala, ru matakilala rua ru bobo, pali ru rahi a pagana kai a pik, ru kapikari rua vona. 
Muri a bakovi turana e girihina ru longoa e BAKOVI DAGI a Vure i lalaho na hania na malunga. Lakea ru vano ru pesi kapiloho vona na kai na hania. 
Lakea e BAKOVI DAGI a Vure i galea a bakovi, “Adam, ioe vai?” 
E Adam i koli mule, i ta maea, “A longo ioe o laho na hania, a mangenge. A kapiloho a vuhuna a bobo.” 
Lakea a Vure i nanea, “E re i taki ioe o bobo? Ra ioe, o kania a kanena kai a ta pupukari ioe vona?” 
A bakovi i koli, i ta maea, “Ra ngatavine o vakamade turagu, ia kunana i habia nau a kanena kai, a kania.” 
Muri e BAKOVI DAGI a Vure i nanea a ngatavine, “A ra o ratea ke?” Lakea a ngatavine i koli, “A mata i tami iau a kania a kanena kai.” 
Pali e BAKOVI DAGI a Vure i takia a mata, “Ngane a ruduraha ioe bara o bole a nimadihi polomeli liu na maka sipsip a bulmakau, a livoa, a vuhuna ioe o rata a naro hale. Ngane bara o laho na ngalamu, o todo a habulo na parava vakaroro. 
Bara ioe a pile na ngatavine, e huriki a hamomu ranga bara ria a pile na hamona ngatavine. A hamona ngatavine bara i paha momo a gimu, pali ioe bara o kara tatea a vahana.” 
Muri a Vure i takia a ngatavine, i ta maea, “Ioe bara o bole a nimadihi dagi ni singou, ni poda a koma. Ra nimadihi, i uka ma go hatakia. Pali bara o ngarua e girihimu, e girihimu bara i matakari ioe.” 
Muri i takia e Adam, “Ioe, o longototo e girihimu o kania a kanena kai a ta pupukari vona, ‘Naha ni kania’. Ngane a rudurahea a malala a vuhuna o longotaro iau. Na parava vakaroro bara o leho, o kani. 
A malala bara i vakabele a poto a barakau. Ioe bara o kani a maki o varo na hania. 
Bara i kani ioe a mavidia, o kani. Bara o rura i vano, i harena na tahuna o mate vona. Muri, bara o hamule lakea na habulo ra a vakabele ioe vona. Ioe a habulo, bara o hamule lakea tabu na habulo.” 
E Adam i vunua a rane girihina e Eva, a vuhuna bara ia e kinane huriki lobo. 
E BAKOVI DAGI a Vure i rahi a varakia na kulina kanirau, i vakarea rua. 
Muri e BAKOVI DAGI a Vure i ta maea, “A bakovi ngane i manga teu, i lohoka na vilo kamumu, na vilo hale. Nahea ge made tabukoi koea, ma ge padoi a kai na nimahuri, ge kania, ge mahuri vakaroro.” 
Lakea e BAKOVI DAGI a Vure i tono talea na hania o Iden a bakovi, ge hamule, ge leho na malala ni rata rike ia vona. 
A Vure i tono talea pali a bakovi, muri i vakapesi na nirikena haro na hania o Iden ranga agelo, turana a vito i hube i vito vito lae, ri gi tagaria a dala lakea na kai na nimahuri.