Mateo.
14.
Na tahuna iea a hariki e Herod i longo a velengane Isu, 
lakea i taki e huriki a vora vona i ta maea, “Ra bakovi iea, e Ioanes a mari ni vahilolo, i pesi rike mule na matenga! I mavonga i tahoka a nitora ni rata a nivakasiri.” 
I ta mavonga, a vuhuna i rabalakia hosi e Ioanes. A nimatene Ioanes i bele maea: e Ioanes i tahatea e Herod na hini i parangi tabu e Herodias, e girihine tukana, e Pilip. I takia, i ta maea, “A vinara i ta pupukari vona go parangi vona e girihine turamu.” I mavonga, e Herod i ngaru ni rabalakia e Ioanes, pali i mangenge e huriki, a vuhuna ri luhoia e Ioanes a propet. Lakea i rudu vakuku e huriki a nugumaheto, ri lakavu kunanea e Ioanes, ri kolo tatea, ri ru dilia na bavi. 
Na parava e Herod ni poda vona, i ratea a habu dagi. E tune Herodias a ngatavine i raulo. Na tahuna e Herod i masia, i vivi hateka, 
lakea i kaba i ta muholi vona ge habia vona a ra maki i ngarua. 
E kinana koma i voro dili a ngava vona, ge ta maea, “A ngaru go rabalakia e Ioanes a mari ni vahilolo, o ru na sika a mapana, o habia nau.” 
Na tahuna a hariki i longoa, i dodo. Pali i vakuku ni gi rabalaki e Ioanes, ri gi bole vilia a gina, a vuhuna i kaba pali na matane huriki ri valai na habu. 
Lakea ri palakudua a lohone Ioanes pololilo na bavi. 
Ri rua na sika a gina, ri bole lakea na sirula. A sirula i bolea, i habia ne kinana. 
Muri e huriki a murimuri ne Ioanes ri bolea a podana, ri tanua. Muri ri vano ri vakalongoa e Isu. 
Na tahuna e Isu i longoa a velengane Ioanes i mate, i malaga, i rike na aga ta ge lakea na tabeke i ngeki. Pali na tahuna e huriki ri longoa a hini i vano, ri malaga na tanga lobo, ri laho pololilo ri gi buloa. 
Na tahuna e Isu i bele, i matai ria, i dodo ria, i vakamahuri e huriki ri giloa. 
I malunga liu ngane, lakea e huriki a murimuri vona ri takia, ri ta maea, “I malunga liu pali. A tabeke si made vona i ngeki. O rudu e huriki ri gi hamule lakea na tanga, ri gi kona a maki ni kani.” 
Pali e Isu i koli, i ta maea, “Nahea ri gi hamule. Mu vakani ria.” 
Ri koli, ri ta maea, “Mi tahoka kunana a bret i lima, a manu i rua. 
Lakea e Isu i ta maea, “Mu bole valai nau.” 
Muri i taki e huriki ri gi made puru na varili. I bole a bret i lima, a manu i rua, i mata rike na hunu i kavurikea a Vure. Muri i kevea a bret, i habi ne huriki a murimuri vona ri veru ne huriki. 
E huriki lobo ri kani, ri maru. Muri e huriki a murimuri vona ri tahoni dili na kulopi i ravulu a polona i rua a kalavana maki ni kani ri kani kaleva. 
E huriki a bakovi ri kani ri ala rangale lima (5,000). Pali e huriki a ngatavine, a koma i uka ma ni gi. 
Muri e Isu i rudu e huriki a murimuri vona ri gi rike na aga, ri gi muga lakea na tabeke tara na darilomu. Pali i made mule ia, ge ru polo kamumu e huriki. 
E huriki lobo ri vano pali, lakea i sike kikeri na lolo i vasileki. I rodo ngane a hini, i tabana ni made kikeri vonga. 
Pali e huriki a murimuri ri rike pali na aga, ri pasi tala basi pali. A vilu i pori valai muga, ru vahori a aga. 
Na malabeonga ngane, e Isu i laho langa na dari, i laho pori mai ria. 
Na tahuna e huriki a murimuri ri masia i laho langa na darilomu ri mangenge, ri haloho, a vuhuna ri pahadakia ta a hanitu. 
Pali e Isu i malaviriri kunana i taki ria, “Naha ni mangenge, mu tuhaka! Iau kunana.” 
Lakea e Petrus i ta maea, “Bakovi Dagi, ge ioe muholi, o taki iau ga laho langa na dari, ga laho lakene mai ioe.” 
Lakea e Isu i koli, i ta maea, “O valai.” E Petrus i page raga na aga, i laho langa na dari, i lakea mai e Isu. 
Pali na tahuna i masia a vilu i pori hateka, i mangenge, i vakatubu ni pasiri. Lakea i gale tala, i ta maea, “Bakovi Dagi, o korimule iau!” 
Lakea e Isu i malaviriri kunana i nugua, i takia, “A niluhoi vomu i kiroko hateka. I navai o lohorua?” 
Na tahuna ru rike na aga, i pasi puru a vilu. 
Lakea e huriki ri made na aga ri kavurikea, ri ta maea, “Muholi hateka, ioe a Tuna Vure.” 
Ri polo kudua a darilomu, ri bele o Genesaret. 
E huriki a bakovi vonga ri mata­kilalea e Isu, lakea ri vakaru a ngava ne huriki na tabeke iea, ri bole valai ne Isu e huriki ri giloa. 
Ri nana tora ia ri gi padoi kunanea a harena varakia vona. E huriki lobo ri padoia, ri tavaga.