A Velenga Kamumu ne Isu Kristo i Herea e Markus.
1.
Iea a vuhuna a Velenga Kamumu ne Isu Kristo, a Tuna Vure. 
E Isaia a propet i here puru hosi, i ta maea, “Mu longo! Iau ga rudua a vinuru nau ge muga vomu, ge pelekadoa a dalamu. 
A lohona viri i gale dagi na tabeke i ngeki i ta maea, ‘Mu pelekadoa a dala ne Bakovi Dagi. Mu pelekadoa a dala ge laho vona ge kiripiripi.’” 
I mavonga, e Ioanes, a mari ni vahilolo, i luve na tabeke i ngeki. I vara e huriki ri gi pulo a vilone ria, muri ni gi vahilolo, lakea a Vure ge puga vuroki a vilo hale ne ria. 
E huriki lobo na tabeke ne Iudea, e huriki lobo o Ierusalem, ri lakea ne Ioanes, ri taki tala a vilo hale ne ria. Lakea e Ioanes i vahilolo ria na naru e Iordan. 
A padirodo ne Ioanes ni rata na vuna kamel. I rea na palabele ni rata na kulina me. I kani a koa, a ame na robo. 
E Ioanes i vara maea, “A bakovi tara ge muri valai nau, i tuhaka hateka nau. Iau i uka ma a bakovi kamumu, ga pasike puru, ga puga vuroki a mota na vahapolo vona. 
Iau a vahilolo mua na naru. Pali ia bara i vahilolo mua na Hanu Kiripiripi.” 
Na parava tara, e Isu i malaga na tanga e Nasaret, na tabeke ne Galili, i lakea na naru e Iordan. Na tahuna i bele vonga, e Ioanes i vahiloloa. 
Na tahuna e Isu i taratavaga rike na naru, i mata rike. Malaviriri kunana i masia a hunu i mata ka. A Hanuna Vure i puru valai vona, i manga balu. 
A lohona viri i ta valai meli na hunu, i ta maea, “Ioe e Tugu a hategu. A vivi hateka vomu.” 
Malaviriri kunana a Hanuna Vure i rudua e Isu i lakea na tabeke i ngeki. 
I made vonga na parava i ravulu va, lakea e Satan i tonia. E Isu i made turana maka maki mahuri na robo, pali e huriki a agelo ri tuhoria. 
Muri ne Ioanes ni ru dili na bavi, e Isu i hamule lakea na tabeke ne Galili, i vara vonga na Velenga Kamumu na Vure. 
I ta rike, i ta maea, “Ra parava a Vure i takia hosi, i bele pali. A harikianga na Vure i popote ge bele. Mu pulo a vilone mua, mu luhoi tora a Velenga Kamumu!” 
Na parava tara, e Isu i lalaho na gagana Darilomu e Galili, i matai e Simon rua e tarina e Andreas, ru ru a vuko, a vuhuna rua a tahodari. 
Lakea e Isu i taki rua, “Muru valai, muru muri nau. Ga tovo marua ni tuli valai nau e huriki a bakovi, i manga a hini ngane muru lakavu a manu.” 
Malaviriri kunana, ru pe purua a vuko ne rua, ru ramaia e Isu. 
I uka ma to laho basi hateka ma, lakea e Isu i matai e tune Sebedi ala rua, e Iakop e Ioanes. Ru made na aga, ru honoa a vuko ne rua i marape. 
Malaviriri kunana i gale rua. Ru ha taroa e tamane rua, e Sebedi, i made na aga turana bolekori ne tou, ru vano, ru ramaia e Isu. 
Muri ri lakea na tanga e Kapernaum. A Parava Nimalo i bele ngane, lakea e Isu i dili malaviriri na roho na vaponga, i vakatubu ni vara. 
E huriki ri turutu na vinara vona, a vuhuna i uka ma i vara manga e huriki a mari na vinara. I vara manga a bakovi i tahoka a nitora. 
A bakovi tara pololilo na roho na vaponga i dili vona a hanitu. Lakea a bakovi iea i malaviriri kunana i gale maea, 
“Isu, ioe a bakovi o Nasaret, o valai go rata navai mia? O valai ni ratapile mia? Iau a lohoka vomu. Ioe a Viri Malamala na Vure.” 
Pali e Isu i tahatea a hanitu, i ta maea, “O vulai. O pagitala vona a bakovi iea!” 
Lakea a hanitu i pulua a bakovi iea, muri i haloho i ha tala vona. 
E huriki lobo ri turutu hateka, ri vanana lae, “A ra maki iea i bele? A ngava karaba! Ra bakovi iea, i vara, i ta manga a bakovi i tahoka a nitora. Na tahuna i tono talea a hanitu, a hanitu i longototo kunanea!” 
A nuverei na maki e Isu i rata i malaviriri kunana ni longo na tanga kiroko lobo na tabeke ne Galili. 
Malaviriri kunana, e Isu i pagitala na roho na vaponga, i laho turane Iakop e Ioanes, to lakea na ruma ne Simon rua e Andreas. 
E lahuane Simon i giloa, i rongo a kulina, i mahita na kiri. Lakea ni vakalongo e Isu vona. 
I mavonga e Isu i lokovonga maia, i nugua a limana, i tulipesia. Lakea i lobo a gilanga vona, i vakatubu ni gutu a maki ni kani ne ria. 
Na tahuna a haro i rolo pali, ni tuli valai vona e huriki ri giloa turana e huriki i dili ne ria a hanitu. 
E huriki lobo na tanga ri vapopo na mataruma, 
lakea e Isu i vakamahuri e huriki ri tahoka a maka gilanga legelege. I lili tala e huriki a hanitu i kupo, i ta tora ne ria nahea ri gi ta, a vuhuna ri lohoka vona. 
Na hatelanga pokopoko, e Isu i vuho lakea na tabeke i ngeki, i vasileki vonga. 
Muri e Simon, e huriki a turana ri matakanea. 
Ri matavisia ngane, ri takia, ri ta maea, “E huriki lobo ri matakana ioe.” 
Pali e Isu i koli, i ta maea, “Si gi lakea na maka tanga tabukoi nga, ga vara taro vonga. Ra leho iea kunana a valai vona.” 
Lakea i laho lobo vona a tabeke ne Galili, i vara na maka roho na vaponga, i lili tala e huriki a hanitu. 
A bakovi i vona a patala i lakea ne Isu, i nana tora ia, i turume puru, i ta maea, “Ioe bara o ngaru, o vakamatapado iau.” 
Lakea e Isu i dodo hatekea, i toto talea a limana, i padoia, i ta maea, “Iau a ngaru go matapado. O matapado!” 
I malaviriri kunana i malaharuri vona a patala, i matapado. 
E Isu i rudua ge vano malaviriri, lakea i taki tora ia i ta maea, 
“Naha ni vakalongoa tara viri. Pali o vano, o vakasiri ioe na prister. Muri o habi a nihabi e Moses i taki hosi, ge ne vona a nivakamatapado, ri gi matakilaka vona ioe ni vakamatapado pali.” 
Pali a bakovi iea i vano ngane, i vakalongo lae e huriki, i nunu viliha lae a velengana. Ngane e Isu i keri ni laho kavakava ge dili na tanga dagi. I made polovavo kunana na tabeke i ngeki. Pali e huriki na tanga lobo ri lakea maia, ri masia vonga.