Markus.
3.
Na parava tara, e Isu i dili na roho na vaponga. I masia vonga a bakovi i mate a limana. 
E huriki ranga ri ngaru ni matakana a ngava ri gi padi virihi e Isu vona, lakea ri matanonoa, a ra ge ratea? Ge vakamahuri a bakovi iea na Parava Nimalo, o ge uka? 
Ngane e Isu i takia a bakovi i mate a limana, “O pesi rike na matane huriki lobo.” 
Muri i nana ria, “A vinara i ta navai vona a naro si gi ratea na Parava Nimalo? Ni gi rata a naro kamumu, o ni gi rata a naro hale? Ni gi kori a viri, o ni gi rabalaki a viri?” Pali ri mangulu tete ria. 
Lakea e Isu i madihi a hatena, i mata lae ne ria. I dodo, a vuhuna ri gigi tora hateka. I takia a bakovi, i ta maea, “O toto talea a limamu.” A bakovi i toto talea a limana, lakea a limana i tavaga mule. 
Malaviriri kunana e huriki a Pariseo ri pagitala, ri vakatubu ni vata turana e huriki a tara ne Herod na dala ri gi rabalaki e Isu vona. 
E Isu i pe a tabeke iea turana e huriki a murimuri vona, ri lakea na darilomu. E huriki ala kupo hateka ri muri vona. E huriki na tabeke ne Galili, e huriki na tabeke ne Iudea, 
e huriki o Ierusalem, e huriki na tabeke ne Idumea, e huriki na tabeke tara na naru e Iordan, e huriki na maka tanga ri pesi halui e Tair, e Sidon. Ria lobo ri longo a maka maki i rata e Isu, ri valai maia. 
E huriki ri ala kupo hateka, lakea e Isu i taki e huriki a murimuri vona ri gi kanu vilia vona a aga, ge pesi langa vona, ma ge bole tugua e huriki. 
E huriki ri tahoka a gilanga ri boletugu, ri gi padoia e Isu, a vuhuna e Isu i vakamahuri muga pali e huriki ala kupo. 
Na tahuna e huriki i dili ne ria a hanitu ri masia, ri tabuli puru na ngalana, lakea e huriki a hanitu ri gale tala, ri ta maea, “Ioe a Tuna Vure.” 
Pali e Isu i taki e huriki a hanitu nahea ri gi taki tala ne huriki, ia e rei muholi. 
E Isu i sike na gagana lolo, i gale valai vona e huriki i ngaru, lakea ri valai vona. 
I vulaki a viri ala ravulu a polona i rua ri gi turana, i gale ria a apostolo. Muri ge rudu tala ria, ri gi vara, 
ri gi tahoka a nitora ni lili tala a hanitu. 
A viri ala ravulu a polona i rua, i vulaki, a rane ria ra nga: e Simon (e Isu i vunua e Petrus), 
e Iakop e Ioanes rua e tune Sebedi (e Isu i vunu kalale rua e Boanerges, ra i maia: e maki tarina rua a vilone rua i manga a hini maravila, a hini i kururu), 
e Andreas, e Pilip, e Bartolemeus, e Mateo, e Tomas, e Iakop tune Alpius, e Tadeus, e Simon a tara ne huriki a Silot, 
e Iudas Iskariot, ra viri i habi na limana pile e Isu. 
Muri e Isu i dili na ruma, pali e huriki ri vapopo tabu mai ia, lakea e Isu turana e huriki a murimuri vona ri keri ni kani. 
E huriki a kabu ne Isu ri longo, lakea ri vano ri gi tuli mulea, a vuhuna ri takia ta i manga. 
E huriki a mari na vinara ri valai o Ierusalem, ri ta maea, “I dili vona e Belsabub. I lili tala e huriki a hanitu na nitora na hariki ne huriki a hanitu.” 
Lakea e Isu i gale ria, i taki ria vona a nita vakakika, “E Satan ge lili tala mule navai ia? 
Bara a tanga tara i vapida ni pesi palupu, a tanga iea i uka ma ge pesi tora. 
A kabu tara bara i vapida ni pesi palupu, a kabu iea i uka ma ge pesi tora. 
Pali e Satan i uka ma ge ngaru mulea, ge vakalipida, i uka ma ge pesi tora. A nilobona i valai pali. 
I muholi hateka, i uka tara viri ge dili tavula na ruma na bakovi hateka tara, ge bole tavula a maka mahala vona. A naro bara i rata mugea, bara i kolotata taroa a bakovi hateka, muri bara i panaho na ruma vona. 
A taki muholi mua, a maka naro hale, a maka harogianga dagi i rata e huriki a bakovi bara ni puga. 
Pali e rei i harogia a Hanu Kiripiripi, i uka ma ni gi puga a naro hale vona. A naro hale vona bara i tabuli vakaroro.” 
E Isu i takia a nita iea, a vuhuna ri taki ia ta i dili vona a hanitu. 
Muri e kinana, e huriki e tarina ri bele, ri pesi polovavo na ruma, ri rudua tara viri ge dili, ge galea. 
Lakea e huriki ri made halui e Isu ri takia, “Oe! E kinamu, e tarimu mai, ri pesi polovavo, ri ngaru ni matai ioe.” 
Lakea e Isu i nana mule ria, “E rei e nana? E rei e huriki e tarigu?” 
I mata lakea ne huriki ri made halui ia, i taki ria, “E huriki ri made koea, ri manga e nana e turagu. 
E rei a viri i muri mai a ningaru na Vure i manga e turagu, e kurabagu, e nana.”