Apostolo.
4.
E huriki a prister, a ubu ne huriki a tagari na roho na Vure, e huriki a Sadusi ri valai mai e Petrus e Ioanes na tahuna ru tabana ni vara e huriki. 
I madihi a hatene ria, a vuhuna ru vara e huriki, ru taki ria ne Isu i pesi rike mule na nimate, lakea i vakasiri manga e huriki lobo bara ri pesi rike mule na nimate. 
I mavonga, ri lakavu e Petrus e Ioanes. Ri ru dili rua taro na bavi, a vuhuna i malunga liu pali. 
Pali e huriki ala kupo ri longo a ngava ne rua, ri luhoi torea a Vure. I mavonga, e huriki a bakovi ri luhoi torea e Kristo ri ala 5,000 ngane. 
Na parava muri e huriki a matakari, e huriki a gare, e huriki a mari na vinara ri vapopo o Ierusalem, 
turane Anas a prister dagi, e Kaipas, e Ioanes, e Aleksander turana e huriki a kabu na prister dagi. 
Ri vakapesi na matane ria e Petrus e Ioanes, ri nana rua, “Na nitora ne rei, na rane rei muru rata a maka naro nga?” 
Ngane a Hanu Kiripiripi i vakatorea e Petrus, i ta maea, “Mua o huriki a matakari, e huriki a gare o Israel! 
Ra mua, mu nana maria na naro kamumu miri rata virihia na beu, i tavaga navai? 
A ngaru mu gu lohoka vona, mua turana e huriki a Israel: A bakovi iea i tavaga, i pesi na matane mua na rana, na nitora ne Isu Kristo o Nasaret ra viri mu paditatea, lakea a Vure i vakamahuri mulea na matenga. 
E Isu ia ‘a kedo mua e huriki a mari ni hae a ruma, mu koi vona, ngane ia a vuhu butu na ruma.’ 
“I uka tabu tara rana bakovi ge korimule hita, a vuhuna a Vure i rudua a viri ala taku kunana ge korimule hita, re Isu.” 
E huriki a matakari na Iuda ri turutu na tahuna ri matai e Petrus, e Ioanes i uka ma ru mangenge ni ta. Ri turutu a vuhuna ri matakilaka vona rua a bakovi tavula, i uka ma ni tovo. Pali ri matakilala rua, ru laho turane Isu muga. 
Pali ri gi ta navai? Ri masia a bakovi iea i tavaga, i pesi turane rua. 
I mavonga, ri turari tala tou na vaponga, ri vata, 
ri ta maea, “Si gi rata navai a bakovi nga? E huriki lobo o Ierusalem ri lohoka ne rua ru rata a nivakasiri dagi. Bara si keri ni lavuni. 
Pali si gi ta pupukari ne rua, nahea ru gu vakalongo tabu e huriki ne Isu, ma ge rere lae a velengana.” 
Lakea ri gale dili tabu e Petrus e Ioanes, ri ta puhaki ne rua nahea ru gu ta tabu, o ru gu vara e huriki ne Isu. 
Pali e Petrus, e Ioanes ru koli mule, ru ta maea, “Mu luhoi navai? A Vure ge ngaru miri gi longototo mua, o miri gi longototo ia? 
I uka tara maki ge rata maria miri gi longo vulai. Miri vakalongo kunana a maki miri matai, a maki miri longo.” 
Muri e huriki a matakari na Iuda ri ta pupukari tabu ne huriki a apostolo nga nahea ru gu vara tabu, muri ri vakapagitala rua. I uka ma ri matavisia tara dala ri gi vakamadihi rua vona, a vuhuna e huriki lobo ri kavurikea a Vure vona a maki i bele. 
A bakovi ni korimule, a pida vona i ravulu va, i tahoka a polona. 
Muri e Petrus, e Ioanes ru vano, ru hamule mai e huriki a turane rua, ru vakalongo ria vona a ngava i taki rua vona e huriki a prister dagi, e huriki a gare. 
Na tahuna ri longo loboa a ngavane rua, ri ta rike, ri vasileki palupu na Vure, “Bakovi Dagi, ioe o ratarike a hunu, a malala, a dari turana maka maki i tabuli ne tou. 
O ta polo na Hanu Kiripiripi na ngavane Davit, o ta maea, ‘Re huriki i uka ma ria a Iuda, i navai i madihi a hatene ria? Ri manga. Ri matakana a dala ni ratapile iau, pali ri keri. 
E huriki a hariki na malala ri pesi rike na ni vaubi, e huriki a matakari ri vapopo ri gi vaubi turane Bakovi Dagi, ri gi vaubi turana Viri a Vure i Vulakia.’ 
A ngava nga ri bele muholi na tahuna e Ponsius Pilato e Herod ru vapopo koea na tanga iea turane huriki a Israel, e huriki i uka ma ria a Iuda. Ri vapopo, ri matakana a dala ri gi ratapilea a vora vomu, re Isu, a viri o vulakia. 
A maki ri ratea ne Isu, na nitora vomu, na ningaru vomu, o taki muga vona ge bele. 
Bakovi Dagi, ngane o luhoi a hini ri ta vakamangenge mia vona. O kori mia, e huriki a vora vomu, nahea mi gi mangenge ni vakalongo pagapaga a nitamu ne huriki. 
O vakasiri a nitora vomu, o vakamahuri e huriki, o rata a maka nivakasiri dagi na nitora ne Isu Kristo, a vora malamala vomu.” 
Na tahuna ri vasileki lobo, a ruma ri vapopo vona i vuruke. A Hanu Kiripiripi i vakatora ria, ri ta pagapaga na nitana Vure, i uka ma ri mangenge. 
E huriki a murimuri, a niluhoi ne ria i taku kunana. A mahala na viri, i uka ma i taki ge ne vona kunana. Ria lobo ri vaveru a mahala lobo ne ria. 
A Vure i habi a nitora dagi ne huriki a apostolo, ri vakalongo e huriki ne Isu a Bakovi Dagi i pesi rike mule na matenga. A Vure i rata kamumu hateka ria lobo. 
I uka tara ne ria ge bala vona tara maki, a vuhuna e huriki ri tahoka a malala, a ruma, bara ri habi ni kona, ri bole a moni, 
ri habi ne huriki a apostolo. Muri e huriki a apostolo bara ri habi tala ne huriki ri bala a maki. 
E Iosep, a hamone Levi na tanga e Saiprus, a rana ri galea vona e huriki a apostolo, e Barnabas. Ra ngava e Barnabas a pelegona i maea, ‘a mari ni vakatora a niluhoi ne huriki.’ 
I mavonga i habia a hania vona ni kona. I bole a moni, i habi ne huriki a apostolo.