Apostolo.
5.
A bakovi tara, a rana e Ananias, e girihina e Sapira, ia tara i habia a tabekena malala vona ni kona. 
I bole mule ranga mapana malala, i habi ranga tabekena ne huriki a apostolo. E girihina i lohoka vona a naro i ratea. Na tahuna i vano ge habi a moni ne huriki a apostolo, e Petrus i takia, i ta maea, “Ananias, i navai e Satan i dili vomu, o tamia a Hanu Kiripiripi, o bole mule ranga moni ni kona a malala vona? 
Muga a malala ne vomu. Muri na malala ni kona, a moni o bole, a moni vomu. Bara o rata a maki na ningaru vomu. Pali i navai o luhoi ni ratena a naro iea? I uka ma o tamia tara bakovi. A viri o tamia a Vure.” 
Na tahuna e Ananias i longoa a ngava iea, i boru puru, i mate. E huriki ri longoa a naro iea, ri mangenge hateka. 
Muri e huriki a riau ri valai, ri bunua a podana, ri kaloho talea, ri tanua. 
Muri na kilala i tolu e Sapira i dili valai. I uka ma i lohoka vona e girihina i mate. 
Lakea e Petrus i nanea, “O vakalongo iau ngane, ra moni nga, a mapana malala marua ni kona?” E Sapira i koli i ta maea, “E, ra ngi kunana a mapana malala.” 
Lakea e Petrus i takia i ta maea, “Pali i navai muru valongo mai a ngava ni tonia a Hanune Bakovi Dagi? Mata lakea! E huriki a riau ri tanua pali e girihimu, ri laho valai. Ioe tara, bara ri kaloho tala a podamu.” 
Malaviriri kunana e Sapira i boru puru tabukoi na vahane Petrus, i mate. Na tahuna e huriki a riau ri dili, ri masia i mate pali, ri kaloho talea, ri tanu tabukoi ia ne girihina. 
E huriki a tara ne Kristo, turana e huriki lobo ri longoa a maki i bele, ri mangenge. 
E huriki a apostolo ri rata a nivakasiri i kupo na matane huriki. E huriki a tara na Vure ri vapopo vakaroro na Talele ne Solomon. 
E huriki lobo ri ngaru ria, pali i uka ma ri dili turane ria, a vuhuna ri mangenge. 
Ngane e huriki ala kupo hateka ri luhoi torea e Bakovi Dagi, ri dili turane ria. 
E huriki ri lohoka vona a maka nivakasiri e huriki a apostolo ri rata, lakea ri kaloho valai e huriki ri giloa, ri vakamahita ria na kiri ne ria, a moke ne ria na hare dala. Na tahuna e Petrus i laho polo, ri ngarua a maniruna ge tarui ria. 
E huriki lobo na maka tanga kiroko tabukoi o Ierusalem ri kaloho valai ne huriki a apostolo e huriki ri giloa, e huriki i dili ne ria a hanitu, lakea ni vakamahuri lobo ria. 
Pali a prister dagi, turane huriki a tara vona re huriki a Sadusi, i madihi a hatene ria. 
Ri lakavu e huriki a apostolo, ri ru dili ria na bavi. 
Pali na rodo a agelo ne Bakovi Dagi i talea a logo na bavi, i tuli tala ria. Lakea i taki ria, 
“Mu vano, mu pesi na roho na Vure, mu vakalongo e huriki na ngava lobo na nimahuri karaba.” 
Na tahuna i mavida a more, ri dili na roho na Vure, ri vakatubu ni tovo e huriki. Na tahuna a prister dagi turane huriki a tara vona ri bele, ri gale palupu e huriki a tara na Sanderin ra tara na vaponga ne huriki a Israel. Muri ri rudu e huriki a bolekori, ri lakea na bavi, ri gi tuli valai ne ria e huriki a apostolo ne Kristo. 
Na tahuna e huriki a tagari ri bele na bavi ta ri gi turari e huriki a apostolo, i uka ma ri matai ria vonga. Lakea ri hamule, ri vakalongo maea: 
“Mi masia a logo na bavi ni tukari kamumu. E huriki a tagari ri pesi polovavo. Pali na tahuna mi talea a logo, i uka ma mi masia tara bakovi ge made pololilo.” 
Na tahuna a ubu na tagari na roho na Vure, turane huriki a prister dagi ri longoa ngava iea, ri loho lege, e huriki a apostolo ri lokovai? Ri nana rovi lae a ra maki ge bele ngane. 
Muri a bakovi tara i valai, i ta maea, “Longo valai! Re huriki a bakovi mu ru dili na bavi, ngane ri pepesi na roho na Vure, ri tovo e huriki vonga.” 
Muri a ubu i vano turane huriki a tagari vona, ri tuli mule e huriki a apostolo. I uka ma ri turari ria, a vuhuna ri mangenge ne huriki, ma ri gi padimate ria na kedo. 
Ri tuli valai e huriki a apostolo, ri vakapesi ria na matane huriki a tara na vaponga na Sanderin. Lakea a prister dagi i nana ria, 
i ta maea, “Mi vakuku pali mua, nahea mu gu tovo e huriki vona a rana bakovi iea. Pali mu valai, mu tovo e huriki lobo koea o Ierusalem. Pali a maki tara mu ratea, mu ngaru ni vakarare mia vona a nimatena bakovi iea.” 
Pali e Petrus turane huriki a apostolo, ri koli, ri ta maea, “Mi gi longototo kunanea a Vure. I uka ma mi gi longototo e huriki a bakovi! 
Mu paditatea e Isu na kai tavalavala, i mate. Pali a Vure ne huriki a gare ne hita i vakamahuri mulea na matenga. 
A Vure i bibi rikea a rana e Isu, i vakamadea na limana kanena, ge muga ne hita, ge korimule hita, ge rata e huriki a Israel ri gi pulo a vilone ria, ge puga a naro hale ne ria. 
Mia mi masia. A Hanu Kiripiripi tara i masia. A Vure i habi a Hanu Kiripiripi ne huriki ri longototo a nitana.” 
Na tahuna ri longoa a ngava iea, i madihi a hatene ria, ri ngaru ni rabalaki e huriki a apostolo. 
Pali a Pariseo tara, e huriki lobo ri togoa, a rana e Gamaliel. Ia a mari ni tovo a vinara. I pesi rike, i taki ni gi tono tala taro e huriki a apostolo. 
Muri i taki e huriki a tara na vaponga, i ta maea, “Mua o huriki a bakovi o Israel, mu luhoi kamumu a naro mu ngaru ni rata virihi ne huriki a bakovi nga. 
I uka ma i hosi hateka e Teudas i bele, i takia ta ia a bakovi dagi, lakea e huriki ala 400 ri muri vona. Muri ni rabalaki, lakea e huriki a murimuri vona ri ha vapida, i lobo tavula a tara vona. 
Muri na tahuna ni here a rane huriki lobo, e Iudas a bakovi o Galili, i bele. I tuli e huriki a bakovi, ri vakabele a vabinga ri ngaru ni lili e huriki ri matakari ria. Ia tara ni rabalaki, ri vapida rere e huriki a murimuri vona. 
I mavonga, e huriki nga, naha ni padoi ria! Mu mata taro ria ri gi vano! A leho ne ria, ge valai na bakovi kunana, bara i lobo tavula. 
Pali a leho ne ria, ge valai na Vure, bara mu keri ni vakalobo ria, pali mua bara ni matakilaka mua mu hehea a Vure.” Na tahuna ri longoa a ngavana bakovi iea, ri ngarua, ri longo maia. 
Muri ri gale dili tabu e huriki a apostolo, ri hotu ria. Ri pupukari ria nahea ri gi ta tabu vona a rane Isu. Muri ri tono tala ria ri vano. 
E huriki a apostolo ri pe a vaponga, ri vano. Ri vivi vona a hini a Vure i matai ria, i kara ria ni bole a maregoa na rane Kristo. 
Na parava lobo ri tovo e huriki na roho na Vure, na ruma takutaku. Ri tovo, ri vara e huriki, ne Isu a viri a Vure i vulakia.