Apostolo.
8.
Na matane Saulus, a naro ri rata virihia e Stepan vona i kamumu hateka. Na parava iea kunana ri vakatubu ni vakamadihi e huriki a tara ne Kristo o Ierusalem, lakea ri ha vapida lae, ri vano ri made na tabeke ne Iudea, a tabeke ne Samaria. Pali e huriki a apostolo i uka ma ri vano. 
E huriki a bakovi kamumu ranga ri bolea a podane Stepan, ri taringia, muri ri tanua. 
Pali e Saulus i ratapile mavonga e huriki a tara ne Kristo. I dili na ruma ne ria, i turari tala e huriki a bakovi a ngatavine, i ru dili ria na bavi. 
E huriki ri ha vapida lae, ri vara a Velenga Kamumu ne huriki na maka tanga ri lakea vona. 
E Pilip i puru na tanga dagi e Samaria, i vakalongo e huriki vonga ne Kristo. 
Na tahuna e huriki ri longoa e Pilip i vara, ri matai a maka nivakasiri i rata, ria lobo ri longo kamumu a ngava i taki. 
I vakatavaga e huriki a beu, a vaha hale. I lili tala e huriki a hanitu ne huriki, lakea e huriki a hanitu ri kulugou, ri ha tala. 
Ngane e huriki lobo na tanga iea ri vivi. 
A bakovi tara i made na tanga dagi iea, a rana e Simon. Muga ne Pilip i lokovonga, e Simon i vakaholi e huriki a Samaria na malulu vona. I bibi rike mulea ta ia a bakovi dagi. 
E huriki lobo ri longo maia, e huriki a bakovi tavula, e huriki a kakaina tanga, ri ta maea, “A bakovi iea i tahoka a nitora na vure ni gale e ‘Dagi.’” 
Ri longo maia, a vuhuna i tabaka ngane i vakaholi ria na malulu vona. 
Pali na tahuna e Pilip i vara ria, ri luhoi torea a Velenga Kamumu na harikianga na Vure, ri luhoi torea a rane Isu Kristo, lakea e huriki a bakovi a ngatavine ni vahilolo. 
E Simon tara i luhoi tora, lakea ni vahilolo. Muri i laho turane Pilip, i turutu vona a maka nivakasiri dagi e Pilip i rata. 
Na tahuna e huriki a apostolo o Ierusalem ri longo e huriki a Samaria ri bole a nitana Vure, ri rudu e Petrus e Ioanes ru lakea ne ria. 
Na tahuna ru bele, ru vasileki ne ria, ri gi bole a Hanu Kiripiripi, 
a vuhuna i uka ma i bele ne ria ma. Ni vahilolo ria kunana na rane Isu Kristo a Bakovi Dagi. 
Muri ru ru langa ne ria a limane rua, ri bole a Hanu Kiripiripi. 
Na tahuna e Simon i matai e Petrus e Ioanes ru ru langa a limane rua ne huriki, lakea ri bole a Hanu Kiripiripi, i ngaru ni habi a moni ne rua, 
i ta maea, “Muru habia nau a nitora iea, e rei a viri ga ru langa a limagu vona bara i bole a Hanu Kiripiripi.” 
Pali e Petrus i koli i ta maea, “A moni vomu ge velu. Ioe tara bara o velu, a vuhuna o luhoi ta go konea a nitora na Vure! 
Ioe o uka ma go dili vona a leho miri ratea, a vuhuna a naromu i hale na matana Vure. 
O pulo a vilomu, o ha vona a naro hale iea. O vasileki ne Bakovi Dagi ge pugea a naro hale o ngaru ni ratea. Ia ge ngaru, bara i pugea a naro hale vomu. 
A matakilala ioe, o ngutu hateka ni bole a nitora iea. Ioe a vora tavula na naro hale.” 
E Simon i koli, i ta maea, “O vasileki nau ne Bakovi Dagi, nahea ge bele nau a maki o taki.” 
E Petrus e Ioanes ru vakalongo e huriki ne Bakovi Dagi, ru tovo ria na ngavana. Muri ru hamule lakea o Ierusalem. Na tahuna ru laho hamule, ru vara e huriki na maka tanga o Samaria na Velenga Kamumu. 
Ngane a agelo ne Bakovi Dagi i takia e Pilip, i ta maea, “O pesi rike, o vano, o laho na dala i pagitala o Ierusalem i puru lakea na nuli tanga e Gasa.” 
Lakea i malaga, i laho. Na bokodala i taguia a bakovi o Itiopia. A bakovi iea a ori, ni pala a dolena. A leho vona ni matakari a tava na hariki ngatavine e Kandasi na robo e Itiopia. I sike pali o Ierusalem, i vasileki. 
Ngane i hamule lakea na tanga vona. I made langa na karis, i gia a puhu na raukea ne Isaia a propet. 
Lakea a Hanu Kiripiripi i takia e Pilip, “O lakea tabukoi na karis.” 
Lakea e Pilip i nunu lakea na karis, i longoa a bakovi i gia a puhu na hinere ne Isaia a propet. Lakea e Pilip i nanea, “Ra ngava o gia, o longokilalea?” 
Lakea a ori i koli, i ta maea, “Ga longokilala navia? A viri ge tuveve poloa nau, bara lohoka vona.” Lakea a ori i takia e Pilip ge rike maia, ge made turana. 
A tabekena Hinere i gia a ori iea, i maea, “Ni lalu manga a sipsip ni gi padimate. I vulai, i malou manga a tuna sipsip ni pala a vuna, i uka ma i takia tara ngava. 
Na tahuna ri biu pilea, i uka ma ri pelekado kamumua. I uka a hamona a vuhuna i uka ma i made tabu na malala.” 
Lakea a ori i nanea e Pilip, “O vakalongo iau ngane vona a propet iea. I taki mulea, o i taki a viri tara?” 
Lakea e Pilip i vakalongoa a ori na Velenga Kamumu ne Isu, i vakatubu na ngava iea. 
Na tahuna ru nunu puru na dala, ru bele vona tara naru. Lakea a ori i ta maea, “Mata lakea, a naru. A ngaru go vahilolo iau.” 
Lakea i vakukua a bakovi i vakanunua a karis, ge hori taro. Muri e Pilip, a ori ru puru na naru, lakea e Pilip i vahiloloa. 
Na tahuna ru pagitala na naru, a Hanune Bakovi Dagi i bolea e Pilip, i vano. A ori i uka ma i matai tabua, pali i vivi hateka, i ramai a dalana, i vano. 
Pali e Pilip i bele na tanga dagi e Asotus. I laho lakea o Sisaria, i vara a Velenga Kamumu na maka tanga na dala.