A Raukea E Paulus i Here Lakea ne Huriki a Galesia.
1.
Iau e Paulus a herea ra raukea iea. Iau a apostolo. I uka tara bakovi ge vulaki iau. E huriki i uka ma ri rudu iau ge iau a apostolo. E Isu Kristo, turana Vure, e Tamana, ra viri i vakamahuri mulea na matenga, rua kunana ru vulaki iau, ru rudu iau ge iau a apostolo. 
E huriki a turane hita ri made koea, ri pesi turagu, mi vakarua ra raukea iea i lakene ne mua e huriki a tara ne Kristo mu made na tabeke ne Galesia. 
A Vure, e Tamane hita, turane Isu Kristo, a Bakovi Dagi, ru gu rata kamumu mua, ru gu habi a nivalemu ne mua. 
E Kristo i muri mai a ningaru na Vure, re Tamane hita, i habi mule ia na Vure, i manga a nihabi na naro hale ne hita, ne vona ni korimule hita na naro hale na malala iea. 
A Vure ge bole vakaroro a bagetuanga. I muholi. 
A turutu ne mua, a vuhuna mu lohopile malaviriri a Viri i gale mua na nidodo ne Kristo, mu nunu muri mai a ngava tebi. 
Pali i muholi hateka, i uka tabu tara Velenga Kamumu. Pali e huriki ranga ri vakamarego mua, ri ngaru ni vakavaroru a Velenga Kamumu ne Kristo. 
Pali mia, o a agelo tara na hunu ge vara mua na Velenga Kamumu ge tebi na Velenga Kamumu mi vara mua vona muga, a Vure ge rudurahea. 
Ra ngava nga, mi takia pali hosi, ngane ga taki tabua, i maea, e rei a viri i vara mua na Velenga Kamumu i tebi na Velenga Kamumu mu bolea pali, a Vure ge rudurahea. 
Pali mu luhoi navai, ra ngava a rata, a rata e huriki ri gi vivi nau, o a rata a Vure ge vivi nau? Mu luhoi navai? A toni ni rata e huriki a bakovi ri gi vivi nau? I uka. Iau bara rata mavonga, i uka ma ge iau a vora ne Kristo. 
Mua e huriki a turagu, a ngaru mu gu lohoka vona, a Velenga Kamumu a vara e huriki vona i uka ma a ngavana bakovi kunana. 
Iau i uka ma a bolea na bakovi. I uka tara viri ge tovo iau vona. E Isu Kristo i vakasiri iau vona a Velenga Kamumu. 
Mu longo pali a maka maki a rata hosi, na tahuna a muri mai a lotu ne huriki a Iuda. Iau a vakamadihi hateka e huriki a tara ne Kristo, a toni ni vakalobo ria. 
A leho tora hateka ni muri mai a rabune huriki a gare nau hosi. Na naro iea kunana, a rangi a narone huriki a Iuda, mia a hisi i taku, na naro na lotu ne huriki a Iuda. 
Na tahuna e nana i uka ma i poda iau ma, a Vure i vulaki iau pali. Na naro kamumu vona i gale iau. Na parava i vulakia, 
i vakasiria nau e Tuna, ne vona ni rata iau ga tovo e huriki vona, re huriki i uka ma ria a Iuda. Na tahuna i vakasiria nau e Tuna, i uka ma a vano ga nanea tara bakovi. 
Iau i uka ma a lakea o Ierusalem ga matai e huriki ri bele manga a apostolo muga ne nau. Iau a lakea o Arabia, muri a hamule sike o Damaskus. 
Muri na pida i tolu a lakea o Ierusalem, a ta turane Sipas. A made turana na parava i ravulu a polona i lima. 
I uka ma a matai e huriki a apostolo ranga. A viri a matai kunanea e Iakop, e tarine Bakovi Dagi. 
Ra ngava a vakalongo mua vona ngane, i uka ma a tatami. A ta muholi hateka na matana Vure. 
Muri a lakea na tabeke ne Siria e Silisia. 
Na tahuna iea, e huriki a tara ne Kristo na tabeke ne Iudea i uka ma ri matai iau ma na matane ria. 
Ri longo kunanea a velengagu, ri ta maea, “Ra bakovi iea, hosi i vakamadihi hita, pali ngane i vara e huriki vona ra ngava i toni ni ratapilea hosi.” 
I mavonga ri kavurikea a Vure vona a maki i bele nau.