Galesia.
4.
I manga i maea: Na tahuna a tuna bakovi ia a koma kiroko, i manga kunana a vorakato. I muholi, a maki lobo ne tamana ne vona. Pali i tabana i manga a vora, 
a vuhuna e huriki a matakari, e huriki a bolekori ri matakaria. Bara ri matakaria i vano i harena na parava e tamana i taki puru ge bole a maka maki vona. 
Hita ranga. Hosi, na tahuna si manga a koma kiroko, si vora na maka hanitu, a nitora ranga na malala. 
Pali na parava a Vure i vulaki purua i bele, i rudua e Tuna. A ngatavine i podea. I bele manga a bakovi, i muri mai a vinara lobo na Vure, 
ne vona ni korimule hita e huriki a vorakato na vinara. I rata mavonga, a Vure ge pau hita, si gi bele manga e huriki e tuna. 
Pali ngane mua e huriki a tuna Vure. I rudu vilia a Hanune Tuna ge made na hatene hita, i gale maea, “Tata! O Tata!” 
Ngane mua, i uka ma mua a vorakato tabu. Ngane mua e huriki e tuna. I mavonga ngane mu gu bole a maka maki a Vure i ta muholi vona ge habi ne huriki e tuna. 
Hosi i uka ma mu lohoka na Vure. Mu manga a vorakato ne huriki a nitamina vure. 
Pali ngane mu lohoka pali na Vure, o ga ta maea, a Vure i lohoka ne mua. I mavonga, mu gu ngalahere navai, mu gu hamule tabu ne huriki a hanitu, a nitora ranga na malala? Ri uka a nitora, ri uka leho. I navai mu ngaru mu gu vorakato tabu ne ria? 
Ngane mu longototo tabu a maka vinara na Parava Nimalo, na habu na keva takutaku, na tahuna takutaku, a pida takutaku! 
A mangenge, ma ge velu tavula a leho dagi a ratea ne mua. 
Mua e huriki a turagu, iau a matuka­paga na vinara. A nana tora mua mu gu manga iau. Hosi a made turane mua, i uka ma mu ramai a vinara. Iau tara i uka ma a ramai. Pali na tahuna iea, i uka ma mu rata hale iau. 
Mu lohoka vona, hosi a made turane mua, a vara mua na Velenga Kamumu a vuhuna a giloa. 
A gilanga nau i vakamarego mua, pali i uka ma mu biu iau, i uka ma mu marikoi nau. Mu tagui iau i manga iau a agelo na Vure. Mu tagui iau i manga iau e Isu Kristo. 
Pali i tabuli vai ngane a nivivi mu hatakia hosi? Iau a ta muholi ne mua, bara i kara mua hosi, bara mu sigi tala a matane mua, bara mu habi nau. 
I navai? Iau a pile ne mua a vuhuna a vakalongo ne mua a ngava muholi? 
Re huriki a nitamina mari ni tovo nga, ri bibi rike mua. Pali i uka ma ri luhoi ni tuhori mua. Ri ngaru mu gu ngalahere nau, lakea mu gu bibi rike ria. 
I kamumu mu gu habi a hatene mua na maki kamumu. Pali mu rata vaka­roro, na tahuna iau a made turane mua, na tahuna i uka ma a made turane mua. 
Mua e huriki e tugu. Iau a bole a nimadihi tabu ne mua, i manga a nimadihi i bele na ngatavine i pahea a koma. Iau bara bole a nimadihi iea, ge vano, ge harena na tahuna mu gu bele manga liu e Kristo! 
A ngaru hateka ni made turane mua ngane, ga ta madoru mai mua. A loho lege hateka ne mua. 
Mua e huriki mu ngaru ni ramai a vinara, mu vakalongo iau, mu lohoka vona a vinara, i ta navai? 
Ni here hosi, e Abraham i tahoka e tuna ala rua. E tuna tara i podea a vora ngatavine. E tuna tara i podea e girihine Abraham, ra i uka ma ia a vora. 
E tune Abraham, ra i podea a vora ngatavine, i bele na naro ni vakabele a koma vona. Pali e tuna, ra i podea e girihina, ra i uka ma ia a vora, i bele a vuhuna a Vure i ta muholi ne Abraham ge bele. 
A nuverei iea i muholi, pali i manga tabu a nita vakakika, ra i maea: A ngatavine ala rua nga, ru manga a ngava dagi i rua a Vure i rata hosi. A viri tara i rata na lolo e Sinai, i vakabele kunana e huriki a koma a vora. A rana e Hagar. 
E Hagar i manga a lolo e Sinai na robo e Arabia. I manga a tanga dagi e Ierusalem na malala, a vuhuna ia a vora. E huriki e tuna, ria ranga a vora. 
Pali e Ierusalem na hunu i uka ma ia a vora. Ia e kinane hita muholi, 
a vuhuna ni here hosi i maea, “Ioe a ngatavine o lame, o keri ni vakabele a koma, o vivi! I uka ma o bole a nimadihi ni poda, o pesi rike o gale tala dagi, o vivi! E huriki a koma na ngatavine ra i pea pali e girihina ri kupo hateka ne huriki a koma na ngatavine i tahoka e girihina.” 
Mua e huriki a turagu, mu manga e Isak. A Vure i ta muholi, lakea mu bele manga e huriki a tuna Vure. 
Hosi e Ismael, ra koma ni vakabele na naro ni vakabele a koma vona, i habi a nimadihi ne Isak, ra koma ni poda na nitora na Hanuna Vure. I mona tara, e huriki a koma na malala ri vakamadihi mua, re huriki a Vure i ta muholi, lakea mu bele manga e huriki e tuna. 
Pali a Hinere i ta navai? I ta maea, “O lili talea ra vora ngatavine turana e tuna. E tuna vora ngatavine i uka ma ru gu vaveru vona e tune Sara, ra i uka ma ia a vora, a mahala ne tamane rua.” 
Mua e huriki a turagu, i uka ma hita e huriki a koma na vora ngatavine. Hita e huriki a koma na ngatavine i uka ma ia a vora.