Epesus.
5.
I mavonga, mu toni a naro na Vure, a vuhuna mua e huriki e tuna, i ngaru hateka mua. 
Mu laho na naro na nivangaru, i manga e Kristo i ngaru hateka hita, i habi ia na Vure, i manga a nihabi manginoro. 
Pali a naro na molenga, a naro katoki, a naro ni ngutu, ni ngaru hateka a maki, naha liu mu gu rata. A naro nga, i uka ma ge kara ni rata a tara na Vure. 
Naha ni rata a naro ni maruhu vona, a ngava manga manga, o a nipadikede muma. A tara na Vure i uka ma ge rata a naro nga. Naha ni rata. Pali mu kavurikea a Vure. 
I muholi hateka, e huriki ri mole, e huriki ri katoki na matana Vure, e huriki ri ngutu na maki na viri tara (e huriki maea ri kavurike a vure tebi), i uka ma ri gi dili na harikianga ne Kristo, a harikianga na Vure. 
A naro nga ri rata a rongova na Vure i rike ne huriki ri longotaro ia. Nahea tara viri ge tami mua na ngava tavulavula. 
I mavonga, naha ni laho manga e huriki ri rata a naro hale nga. 
I muholi, hosi mua a bakovi na uvo manga ria. Pali ngane mu rihi e Bakovi Dagi, mua a nipara. Mu laho manga e huriki a bakovi na nipara. 
A kanena nipara, a naro kamumu, a naro malamala, a nita muholi. 
Mu toni ni matakilaka vona a ra naro i vivi vona e Bakovi Dagi. 
Naha ni rata a maka naro hale e huriki a bakovi na uvo ri rata. Mu tahate e huriki ri rata. A naro nga ri uka lehone ria. 
A maki ri rata kapiloho, iau bara taki tala, bara si maruhu. 
Pali na tahuna a nipara i parai a maki tara, a maki iea i bele kavakava, 
a vuhuna a nipara i rata a maki lobo i bele kavakava. Ni here hosi i maea, “Ioe a viri o mahita, o hadongo o pesi rike mule na matenga, lakea e Kristo bara i parai ioe.” 
I mavonga mu matadoko. Naha ni laho manga e huriki a manga. Mu laho manga e huriki ri tahoka a lohokanga. 
Mu leho kamumu, naha ni made tavula, a vuhuna a tahuna mona i hale hateka. 
Naha ni rata tavula. Mu matakilaka vona a ningaru ne Bakovi Dagi, mu ramai. 
Naha ni ninu hateka a naru vagole, mu gu manga, a vuhuna a naro iea bara i ratapile mua. Pali mu vonu na Hanuna Vure. 
Mu vakalolo a maka linge na hinere, a linge vasileki, a linge na lotu. Mu kalolo na hatene mua ne Bakovi Dagi. 
Na maki lobo, mu kavurike vakaroroa a Vure e Tamane hita na rane Bakovi Dagi, e Isu Kristo, 
mu valongototo, a vuhuna mu mangenge ne Kristo. 
Mua e huriki a ngatavine, mu longototo e girihine mua, i manga a hini mu longototoa e Bakovi Dagi. 
A bakovi i muga ne girihina, i manga kunana e Kristo i muga na tara vona, ra kakaina. Ia kunana i korimule hita. 
A tara na Vure i longototoa e Kristo. I mavonga kunana, e huriki a ngatavine ri gi longototo e girihine ria na maki lobo. 
Mua e huriki a bakovi, mu ngaru hateka e girihine mua, i manga e Kristo i ngaru hateka a tara vona, i mate na murina, 
ge ratea ge ne vona kunana. I vahiloloa na naru, na nitana Vure, i ratea i malamala. 
I rata mavonga, ge masia a tara na Vure ge mata kamumu hateka, manga a ngatavine ni mareraku vona, ge lakea ne girihina. I uka ma ge katoki, i uka ma ge kuli malulu. Ge malamala, ge matapado. 
Na naro iea kunana, e huriki a bakovi ri gi ngaru hateka e girihine ria, i manga ri ngaru mule ria. A viri i ngarua e girihina, i manga i ngaru mule ia. 
I uka tara viri ge koi vona a kakaina. Hita lobo si matakari, si ngaru a kakaine hita. E Kristo tara i ngaru hatekea a tara vona, 
a vuhuna si manga a maka tabekena kakaina. 
Ni here maea na Hinere, “I mavonga, a bakovi bara i pe e tamana e kinana, i madoko turana e girihina, a kakaine rua ge taku.” 
A ngava kapiloho iea i tahoka a lohokanga dagi i tabuli vona. Pali iau a ta maea: i ta kana mai e Kristo turana e huriki a tara vona. 
I mavonga, ga taki tabu. Mua e huriki a bakovi mu ngaru e girihine mua i manga a hini mu ngaru mule mua. Mua e huriki a ngatavine mu togo e girihine mua.