Hibru.
3.
Mua o huriki a turagu, a Vure i gale hita. Mu luhoia e Isu. A Vure i rudu vilia, ge ia a Prister Dagi na lotu ne hita. 
E Isu i rata lobo a leho a Vure i habi vona, i manga e Moses tara i rata a leho lobo a Vure i habi vona. 
A roho takutaku ri tahoka a viri i hae. I mavonga kunana a Vure i ratarike a maki lobo. A viri i hae a roho, a rana i dagi hateka vona a roho i haea. I maea kunana, a rane Isu i dagi hateka na rane Moses. 
Hosi e Moses a vora na Vure, i rata lobo a leho a Vure i takia ge ratea, i matakari e huriki a tara na Vure. E Moses i rata mavonga, i vakasiri muga i muholi a ngava a Vure ta ge taki muri ma. 
Pali e Kristo i uka ma ia a vora. Ia a Tuna Vure. I matakari kamumu e huriki a tara na Vure, i manga e Tamana i ngarua ge ratea. Hita bara si pesi tata ni luhoi torea a Vure, ni pasimata vona a maki a Vure ge rata ne hita, bara hita e huriki a tara vona. 
I manga a ngava a Hanu Kiripiripi hosi i taki, “Mona na tahuna mu longoa a Vure ge taki mua, 
nahea mu gu putu ngingi i manga e huriki e tubune mua hosi, ri longotaro a ngavana Vure, ri laho viliha na malala golea, ri tonia a Vure. 
A rata a maka nivakasiri dagi na matane ria na pida i ravulu va, pali ri tabana ni toni iau. I mavonga, a rihate ne huriki nga, a ta maea, ‘I uka ma ri lohoka vona a narogu. Ri lohopile vakaroro iau.’ 
I madihi a hategu ne ria, lakea a kaba, a ta maea, ‘I muholi hateka, i uka ma ri gi dili na tanga na nimalo nau.’” 
Mua o huriki a turagu, mu matadoko, ma ge rata mua a niluhoi hale, mu gu lobo ni luhoi torea a Vure, mu gu ngalahere na Vure Mahuri. 
Na parava mona mu vatuhori, mu vakatora a niluhoi ne mua na parava vakaroro, ma ge tami mua a naro hale, mu gu gigi tora. 
Na tahuna si luhoi tora karabea e Kristo, i gale hita e huriki e turana. I mavonga, si gi pesi tata ni luhoi torea, ge vano, ge harena na parava si mate vona. Bara i uka, i uka ma ge gale tabu hita e huriki e turana. 
I manga a ngava ni here puru hosi na Hinere i ta maea, “Mona, na tahuna mu longoa a Vure ge taki mua, nahea mu gu putu ngingi i manga e huriki e tubune mua hosi, ri longotaro a ngavana Vure.” 
Re huriki nga, e Moses i vakamariu tala ria o Egipto na nitora na Vure, ri longoa a ngavana Vure, pali i uka ma ri longototoa. Ri longotaroa. 
Ri ratea a Vure, i madihi a hatena na pida i ravulu va. Ria kunana ri rata a naro hale, ri mate na tabeke i ngeki. 
I taki e huriki nga, ra ri longotaroa a ngavana, i uka ma ri gi dili na tanga na nimalo vona. 
I mavonga, si matakilaka vona i uka ma ri dili, a vuhuna i uka ma ri luhoi torea a Vure.