A Nita Kapiloho A Vure i Vakasiri ne Ioanes na Maki Ge Bele Muri Ma.
1.
Iea ngane a ngava a Vure i vakalongo ne Isu Kristo, ge vakalongo polo ne huriki a vora vona. A ngava na maka maki ge bele malaviriri. I rudua a agelo vona ge vakalongo a ngava nga na vora vona, ra iau, e Ioanes. 
Ngane a vakalongo a maki lobo a matai, ra nitana Vure, a ngava ne Isu Kristo. 
E rei a viri ge gi tala a ngava na nita propet iea, ge vivi. E huriki ri longoa, ri longototo a ngava nga ni here, ria ranga ri gi vivi, a vuhuna a parava i valai tabukoi pali. 
Iau e Ioanes a here lakea ne mua e huriki a tara na Vure i polorua, mu made o Asia. Ra Viri i made mona, i made hosi, bara i hamule valai, i rata kamumu mua, i habi a nivalemu ne mua. Pali e huriki a hanu i polorua, ra ri pesi na ngalana gula hariki vona, ria ranga ri gi rata kamumu mua, ri gi habi a nivalemu ne mua. 
E Isu Kristo, ra viri i vakalongo hita na maki lobo a Vure i takia ge taki ne hita, ra viri i mahuri mule na matenga muga ne hita lobo, ra matakari ne huriki a matakari lobo na malala, ia tara ge rata kamumu mua, ge habi a nivalemu ne mua. I ngaru hateka hita. Na darana i vakamatukapaga hita na naro hale ne hita. 
I rata hita si bele manga a harikianga vona, si manga a prister na Vure vona, re Tamana. Ne vona kunana a bagetuanga, a nitora lobo ni matakari a maki lobo vakaroro. I muholi. 
Mu longo! I popote ge valai na bubu. E huriki lobo ri gi masia. E huriki ri rabalakia, ria ranga ri gi masia. E huriki a kabu lobo na malala ri gi masia, ri gi duku. Ge bele mavonga. I muholi. 
A Vure e Bakovi Dagi i ta maea, “Iau kunana a nitubuna maki lobo. Iau kunana a nilobona maki lobo. Iau a made ngane, a made hosi, ga made vakaroro. Iau a tahoka a nitora lobo.” 
Iau e Ioanes, a turane mua. Si vaveru na ni bole a nimadihi na rane Isu. A dili turane mua na harikianga na Vure, si pesi tora ni ramaia e Isu. Iau a vara e huriki na nitana Vure, a ngava ne Isu, lakea ni lakavu iau, ni ru dili iau na bavi, koea na bodu e Patmos. 
Na parava ne Bakovi Dagi a Hanu Kiripiripi i bele tora nau. A longo na bitogu a lohona bakovi i gale dagi, i nangi i manga a tavure. 
A loho iea i ta maea, “A maki lobo o matai, o here puru na raukea, o vakaru lakea ne huriki a tara na Vure o Epesus, o Smerna, o Pergamum, o Tiatira, o Sardis, o Piladelpia, o Laodisia.” 
Muri a matagege, ta ga masia ra viri i ta turagu, lakea a matai a butu na nipara i polorua, ni rata na gol. 
Na koropalana maka butu na nipara nga, a matai a viri i manga a tuna bakovi. I rodoa a varakia ola ola, na ngalana i rea na mota ni rata na gol. 
A vuna i kea hateka, manga a vuna sipsip, manga a bubu keakea. A matana i para manga a huvina kanono. 
A vahana ru para manga a bras ni ravu, i para hateka. Ru mata manga a bras ni gutu na kanono, i bele maga hateka. A lohona i nangi dagi, i manga a nangina bokona dari i rere. 
I nugu na limana a kanena a hada i polorua. A bainat i tahoka a ngina i rua i vere hateka i toro toro tala na ngavana. A matana i para hateka i manga a haro i para na kuru haro. 
Na tahuna a masia, a boru puru tabukoi na vahana, a tabuli manga a viri i mate. Pali i padoi iau na limana a kanena, i ta maea, “Naha ni mangenge. Iau kunana a nitubuna maki lobo. Iau kunana a nilobona maki lobo. 
Iau a mahuri. Hosi a mate, pali ngane a mahuri vakaroro. Iau a nugua a ki na matenga, a ki na murine huriki ri mate pali. 
I mavonga, a ngaru ioe go here puru a maki lobo o matai pali, ra maka maki i tabuli ngane, turana maka maki ri gi bele muri ma. 
Pali a hada i polorua a nugu na limagu a kanegu, turana butu na nipara i polorua ni rata na gol, ngane ga taki ioe vona a pelegona nita kapiloho. A hada i polorua nga, a agelo na tara na Vure i polorua. A butu na nipara nga, a tara na Vure i polorua.”