Kapiloho.
21.
Muri a matai a hunu karaba, a malala karaba. A hunu muga, a malala muga ru lobo. I uka tabu a dari. 
A masia a tanga na Vure, re Ierusalem karaba, i valai na Vure, i puru valai na hunu, i manga a ngatavine i parangi karaba i bagetu kamumu hateka, i davea e girihina. 
A longoa a lohona viri i gale valai na gula hariki, i ta dagi, i ta maea, “Mu longo! A Vure i made turana e huriki a bakovi. Ge made turane ria, ge ria e huriki a ngate vona, ge ia a Vure ne ria. 
Ge ravu vuroki a luhane ria, i uka ma ri gi tangi tabu, i uka ma ri gi mate tabu, i uka ma ri gi dodo tabu, i uka ma ri gi bole tabu a nimadihi, a vuhuna a maka maki hosi i lobo.” 
Lakea a viri i made na gula hariki i ta maea, “Mu longo! A rata a maki lobo ri bele karaba tabu.” Muri i ta maea, “O here puru a ngava nga, a vuhuna ri muholi, ri gi bele muholi.” 
Muri i ta maea tabu, “I lobo! Iau a Alpa, a Omega. Iau a nidoko na maki lobo, a nilobona maki lobo. A habi tavula ne huriki ri marohu a naru i valai na naru bele na nimahuri. 
E huriki ri mulangi, ga habi a maki nga ne ria. Ge iau a Vure ne ria, ge ria e huriki e tugu. 
Pali e huriki ri mangenge, e huriki i uka ma ri luhoi tora, e huriki ri katoki na matagu, e huriki ri rabalaki a viri, e huriki ri mole, e huriki ri rata a muto, a malulu, e huriki ri vasileki na nitamina vure, e huriki ri tatami, a murine ria a darilomu i nono na viku a kanono. Ia ni gale a ruana matenga.” 
Muri a turana e huriki a agelo ala polorua, ra ri guru tala a tavila i polorua na ikuna vuranga i polorua, i valai, i taki iau, i ta maea, “O valai, ga vakasiri ioe vona e Girihina Tuna Sipsip, ra i parangi karaba vona.” 
Lakea a Hanu Kiripiripi i bele tora nau, a agelo i bole sike iau na mapana lolo dagi. I vakasiri iau vona a tanga na Vure, e Ierusalem, i puru valai na Vure na hunu. 
A nipara dagi na Vure i paraia. I bagetu kamumu i manga a kedo i mata kamumu hateka, i manga a kedo a iaspa, a glas. 
A tanga iea i tahoka a nure dagi ni tura halui. I tahoka a logo i ravulu a polona i rua. A agelo i matakari a logo takutaku. A logo takutaku, ni here a rana kabu takutaku ne Israel. 
A logo i tolu to pesi na tabeke na nirikena haro. A logo i tolu to pesi na tabeke mule sike. A logo i tolu to pesi na tabeke mule puru. A logo i tolu to pesi na tabeke na nirolona haro. 
A nure iea, ni hae langa na kedo i ravulu a polona i rua. A kedo takutaku nga, ni here a rana a apostolo takutaku na Tuna Sipsip ala ravulu a polona i rua. 
Ra agelo i ta turagu, i nugu a kodo ni rovai, ni rata na gol, ne vona ni rovai a tanga, a nure vona, turana maka logo vona. 
A harena tanga i va, ri palupulupu. A niolana tanga i palupu turana nibolana. A agelo i rovaia na kodo vona. A niolana, a nibolana a nirike vona i manga a kilomita i 2, 200. 
Muri i rovaia a nure na tanga. I bele manga a mita i 66 na nirovai na bakovi, ra i rovai a maka maki vona a agelo iea. 
A nure ni rata na kedo a iaspa. A tanga ni rata na gol, i maga manga a glas. 
A vuhuna nure na tanga, ni vakabagetu na kedo mata kamumu legelege. A viri muga a kedo a iaspa, a ruana a kedo a sapaia, a toluna kedo a agete, a vana kedo a emeral gomagoma. 
A limana kedo a oniks, a polotarana kedo a kanelian, a poloruana kedo a krisolait, a polotoluna kedo a beril. A polovana kedo a topas. A ravuluna kedo a krisoprase, a ravulu a polona takuna kedo a iasint. A ravulu a polona ruana kedo a ametis. 
A logo i ravulu a polona i rua, ni rata takutaku na meki dagi i taku. A dala na tanga ni rata na gol, i maga hateka, i manga a glas. 
I uka roho na Vure ge tabuli pololilo na tanga dagi, a vuhuna e Bakovi Dagi, a Vure Tuhaka Hateka, rua a Tuna Sipsip, rua a roho na Vure. 
A tanga iea, i uka ma i ngarua a haro, a keva ru gu paraia, a vuhuna a nipara dagi na Vure i paraia, a Tuna Sipsip i manga a nipara vona. 
E huriki a kabu lobo bara ri laho na nipara vona. E huriki a hariki lobo na malala ri gi bole valai a mahala ne ria, ri gi habia na Vure ne vona ni togoa. 
A maka logo vona, i uka ma ni gi tukari, a vuhuna a rodo i uka ma ge puru vonga. 
E huriki na tanga lobo bara ri bole valai vona a mahala ne ria, ri gi habi na Vure ne vona ni togoa. 
I uka tara maki katoki ge dili vona. I uka tara viri i rata a naro ni maruhu vona, o a naro taminga ge dili vonga. E huriki ri gi dili vona kunana, e huriki a rane ria ni here dili na buk na nimahuri na Tuna Sipsip.