Iesusa gɨrgɨr aŋgɨca ma menaca ma mac nda ŋgepatna
18
(18—20)
Iudasa Iesusmo puŋnaŋgepta para tɨkatna
(Matiu 26.47-56 na Mak 14.43-50 na Luk 22.47-53)
1 2 Sml 15.23, na Mt 26.36, na Mk 14.32, na Lk 22.39Karica Iesusa an kamb topca maica ma ndona iŋa raŋgairena ramtaɨrap, mina taŋca Kidron oc irikca monmbai waŋ magat. Na an ocna waŋga warɨŋ ianna maeacreke, ri, Iesusapa mana iŋa raŋgairena ramtaɨra mina an warɨŋ mambukat.* Kidron oc ma Olip Takurna roumb ndeacrena, na ma pacwɨkɨn teker ian, na warɨŋ ianna anna roumb ndeacrenan, na mana ia Getsemani. 2 Lk 21.37, na 22.39Na Iesusmo puŋnaŋgepta para tɨkna ramoot Iudas, ma toco an taupca malamŋirenan. Na kɨdrɨk wɨtta Iesusa ma ndona iŋa raŋgairena ramtaɨrmo aŋgɨca mina an warɨŋa punirenan. 3 Mt 26.47, na Mk 14.43, na Lk 22.47, na In 7.45, na Up 1.16Ainda moca Iudasa an taup ndamtaɨr paŋaindta aiŋa morena ramtaɨrapa Parisiarta aiŋa morena ramtaɨrapa, lapoca ruŋrena ramtaɨrap, aŋgɨca mina an warɨŋ makɨpat. Na mina runduikta reikapa tacapa racbikarta kaipta tacap kɨprenan. 4 Ri, an reikca muruŋa man ndarunanna, ma atuna ndamŋirina. Ainda moca ma an tumbun ndambuŋa taŋga rambuŋaica ma minmo gainda digirinan, “Ne mandaina orerenan?”
5 Karica mina mana kambmo gainda rutirina, “Aia Nasaretna Iesusna orena kɨprina.” Ri, Iesusa minmo aindopatna, “Aku gade.” Na manmo aŋgɨrca mina neaŋna ramoot Iudasa ma minap eacrina. 6 Na mina waracrinanna, Iesusa aindoprina, “Aku gade man.” Ri, an ramtaɨra iŋ ndiŋa taŋga pitrik mairikat.
7 Karica Iesusa minmo mac digiatna, “Ne mandaina orerena?” Na mina aindopatna, “Nasaret auŋna Iesus.” 8 Ainda moca Iesusa mina kambmo gainda rutirinan, “Aku nenmo mboprinan, anna auk. Na ne aukna ore te, ne gan ramtaɨrmo watcarica mina taŋ.” 9 In 17.12Na an tɨpna kirara ma ŋgaua mboprina kirara gan kamma moa mɨnna tɨkatna, “An ramtaɨra u aukmo neaŋrinanna, ianna mba taprekeitndait.”
10 Mt 26.51, na Mk 14.47, na Lk 22.38, na 22.49-50Ainda moca Saimon Pita ma bugrim ianap aŋgɨca taŋrenanna, ma an mbuŋa taup ndamoot paŋan aniacna tuomna aiŋ kamainda morena ramootmo mawacat. Na an bugrimma an ramootna koar umbai waŋa kataca mairikat. Na an mbaiŋna aiŋa morena ramootna ia Malkus. 11 Mt 20.22, na 26.39, na 26.42, na Mk 14.36, na Lk 22.42Karica Iesusa Pitamo gaindopatna, “An bugrimmo mana taupca nda tɨk. Kai ac? Na u tit ndamŋirena, an gɨgɨrar Aetta aukmo neaŋna morenanna, aku mba mbukit ki?”
Mina Iesusmo Anas ndambuŋa warkica taŋrina
12 Ainda moca an lapoca ruŋrena ramtaɨrta wiwitapa, mina outta taŋrena ramoot paŋanapa, Iudana aiŋa morena piriŋgap, mina Iesusmo utiŋga mana parniŋmo ŋgatɨk mbuŋa leacrinan. 13 Mt 26.57, na Lk 3.2Ri, mina manmo outta Anas ndambuŋ naaŋgɨa mataŋgat. Na Anas ma Kaiapasna meacna aet, na Kaiapasa an mɨnna ma taup ndamoot paŋan aniac ndeacri. 14 In 11.49-50Na man tikca, ma an ramootta Iudanaŋgepmo aindopatna, “Anna laŋ ecte, ramoot kabea ndo meikramtaɨr wɨtna taup aŋgɨca menacna.”
Pita ma aindopatnan ma Iesusmo lamŋi ŋgocor
(Matiu 26.69-70 na Mak 14.66-68 na Luk 22.55-57)
15 Mt 26.58, na Mk 14.54, na Lk 22.54, na In 20.3, na 21.20, na Up 3.1Ainda moca Saimon Pitaapa kabena Iesusna iŋa raŋgairena ramoot ianna maniŋa Iesusna iŋa raŋgaica mataŋri. Na an Iesusna iŋa raŋgairena kabena ramoot, anna taup ndamoot paŋan aniaca manmo lamŋirena, aintik ma Iesusmo raŋgaica taup ndamootna kacna wuoca mbukrinan. 16 Mt 26.69, na Mk 14.66, na Lk 22.54Na Pita ma wuocmo raekmbaina tɨŋ kamma, wɨtɨkca eacri. Ainda moca an kabena Iesusna iŋa raŋgairena ramootta taup ndamoot paŋan aniaca manmo lamŋirenanna, ma an tɨŋna ŋginaŋa morena meacmo mbopca ma taŋga Pitamo ŋai naaŋgɨca mambukat. 17 Ri, an tɨŋna ŋginaŋa morena meaca Pitamo gainda digirina, “Na u toco, mana iŋa raŋgairena ramtaɨrta ramoot ian ki?” Ri, Pita gaindopatna, “Wanaiŋ, aku mana iŋa raŋgairena ramtaɨrta ianna wanaiŋ.” 18 Na an mouŋa gagauri, na an mbaiŋna aiŋa morena ramtaɨrapa Iudana aiŋa morena piriŋgap, tac aniac ianna keca eacri. Na mina wɨtɨkca ndorita tikembmo moa owairena. Ainda moca Pita toco minap wɨtɨkca ndona tikmo moa owairina.
Taup ndamoot paŋan aniaca Iesusmo ritri waparaca moatna
(Matiu 26.59-66 na Mak 14.55-64 na Luk 22.66-71)
19 Na an mɨnna taup ndamoot paŋan aniaca Iesusmo ndona iŋa raŋgairena ramtaɨrta moca digirinanapa, an kambca ma meikramtaɨrmo riptirenan. 20 Mt 26.55, na Lk 4.15, na In 7.14, na 7.26-28Ainda moca Iesusa mana kambmo gainda rutirinan, “Aku meikramtaɨrmo memetmbaca kambca waekekeca neaŋrenan. Na memetmbaca aku meikramtaɨrmo Iudananta mimitpac aŋgɨrena kaikca tɨkca riptirenan, na Raraŋ Aetaniacna Kacna wuocna roumbca anna Iudanaŋgepca anna punirenan. Na aku kam ianna ŋaia mba tɨkca mboprenan. 21 Na kaica u aukmo digirenan? U an kamb mbaracrina meikramtaɨrmo digi. Na an kambca aku mboprinanna, mina lamŋirenan.”
22 Ier 20.2, na Up 23.2Ainda moca Iesusa aindopatke, piraŋ ianna wɨtɨkca eacrenanna, ma Iesusmo apakeca aindoprina, “Kaina moca u taup ndamoot paŋan aniacna kambmo gaindta tɨpna kirara rutica mboprina?” 23 Karica Iesusa mana kammo gainda rutirinan, “Aku kam ŋgoreaca mbop te, u aukna mbopatna kam ŋgoreacna mɨnɨŋmo mbop. Na aku kam laŋ ndop te, kaina moca u aukmo pirinan?”
24 Karica Anasa Iesusmo taup ndamoot paŋan aniac Kaiapas ndambuŋa mbagɨrica taŋrina. Na an ŋgatɨkca mina mana parniŋmo leacrinanna, mina mba pɨaratke.
Pita mac mambopat, ma Iesusmo lamŋi ŋgocor
(Matiu 26.71-75 na Mak 14.69-72 na Luk 22.58-62)
25 Mt 26.69-71, na Mk 14.69, na Lk 22.58Na Saimon Pita ma wɨtɨkca ndona tikmo taca tɨkca moa owairi. Na mina manmo gainda digirina, “U toco, mana iŋa raŋgairena ramtaɨrta ramoot ian ki?” Ainda moca ma gaindopatna, “Wanaiŋ, aku mana iŋ raŋgairena ramtaɨrta ianna wanaiŋ.”
26 In 18.10Na taup ndamoot paŋan aniacna mbaiŋna aiŋa morena ramoot, Pita mana koarmo bugrim mbuŋa waca katacrinanna, mana kamkabe ianna ma aindoprina, “Aku umo watrinanna, u Iesusap warɨŋ inikca eacrina ramoot ki?” 27 Mt 26.74, na Mk 14.72, na Lk 22.60, na In 13.38Ainda moca Pita gaind mac mbopatna, “Wanaiŋ.” Na an kɨdrɨk ŋgoinna kackura maapat.
Mina Iesusmo Pailat ndambuŋ naaŋgɨca taŋgatna
(Matiu 27.1-2 na 27.11-14 na Mak 15.1-5 na Luk 23.1-5)
28 Mt 27.2, na Mk 15.1, na Lk 23.1, na Up 3.13, na 10.28Karica Iudanaŋgepta ramtaɨra Kaiapasna kac tɨkcarica mina Iesus aŋgɨca Romna ramoot paŋanna, an ndeacrinanmo, mina manmo anna aŋgɨ taŋrina. Na anna ŋaŋarmuŋ ŋgoin. Na mina gaind malamŋiat, “Moca aia Raraŋ Aetaniacna lamnɨac ŋgoutta ratta mba laruitndai, te, aia mina an Pasowana Rana amtiamma mba ammit.” Ainda moca mina ndori koinda an Romna ramoot paŋanna kaca mba mbukatke.† Pasowana Ra: Na Pasowana Ra, mana mɨnɨŋa gaind, an Ra Israelnanda Isip Ndeacri, Raraŋ Aetaniaca Minmo Otaca Aŋgɨca Larurina Ra Aniacna ndamŋina moatna. 29 Ri, mina raekca lambia eacri, Pailatta min ndambuŋa kɨpca minmo gainda digirina, “Ne gan ramootmo kaina reacna moca manmo ritri waparaca mona more?” 30 Na mina mana kambmo gainda rutirina, “Ma tɨp kirar ŋgoreaca mo ŋgocorta ramoot ecte, aia manmo un ndambuŋa mba aŋgɨ kɨpitndai.”
31 In 19.6-7, na Up 18.15Ri, Pailatta minmo gaindopatna, “Ne manmo aŋgɨca taŋca ndorita tɨp wandɨk mbuŋa manmo ritri waparaca mo.” Na an Iudanaŋgepca aindopatna, “Aia ramootta mo memenaca anna wandɨk.” 32 Mt 20.19, na In 3.14, na 12.32-33Na ŋgaua Iesusa ndo memenacna tɨpna kirara ma mbopatnan, na an reaca larurinanna, ma an mana kammo gidikca moa mɨnna tɨkatna.
33 Mt 27.11Karica Pailatta an Romna ramoot paŋanna kaca nda mambukat. Ri, ma Iesusmo aca kɨpca manmo madigiat, “U Iudananta gagrirta ramoot paŋan ki?” 34 Ri, ma mana kambmo gainda rutirinan, “U ndo an kambmo ndo mbuŋa lamŋica mbopre, ki? Co, kabena ramootta aukna moca unmo mboprinan ki?” 35 In 1.11Ainda moca Pailatta mana kambmo gainda rutirina, “Kaica? Na aku Iudana ramoot ki? Una wiwitnanapa taup ndamtaɨr paŋainda unmo auk ndambuŋ naaŋgɨca kɨprina. Na u kai ŋgoinna morina?”
36 Dan 2.44, na 7.14, na 1 Ti 6.13Karica Iesusa gaindopatna, “Aukna bubuoca gan tiacarpaiknanna wanaiŋ. Na aukna bubuoca gan tiacarpaiknan co, aukna mbaiŋa morena ramtaɨra ruŋ mbe, te, ramoot ianna aukmo Iudanaŋgepta para mba tɨkitndai. Aind aukna bubuoca gan tiacarpaiknanna wanaiŋ.” 37 In 8.47, na 1 Ti 6.13, na 1 Io 3.19, na 4.6Ri, Pailatta manmo gainda digiatna, “Na anna gidikca, u gagrirta ramoot paŋan ian ki?” Ri, Iesusa mana kammo gainda rutirina, “Na an gagrirta ramoot paŋanna kambca anna una kamb. Na aemma aukmo mɨrrinanna, aku gan tiacarpaik nakɨprinanna, aku aiŋ kabe niŋgikca mona kɨprinan. Na anna kamb gidkara wiwitinan, te, meikramtaɨra muruŋa waracnande. Ainda moca meikramtaɨra muruŋcamiŋa kamb gidkara raŋgairenanna, mina aukna kamma raŋgainandet.” 38 Mt 27.24, na Lk 23.4Na Pailatta manmo mac madigiat, “Na kam gidikca anna kaina reac ŋgoin?”
Pailatta Iesusmo ik nakeracna kam mambopat
(Matiu 27.15-31 na Mak 15.6-20 na Luk 23.13-25)
Na Pailatta an kamb topca maica ma nda laruca Iudanaŋgep tambuŋ mataŋgat, na ma minmo gaindoprinan, “Aku mana makuk ianna mba watri. 39 Mt 27.15, na Mk 15.6, na Lk 23.17Na aukna raŋgairena tɨpna kirara ne lamŋirenan. Na an Pasowana Rana iarira aku memetmbaca kac ŋgoreacna ramoot ianmo wattacarica ma larurenan. Ainda moca ne toŋgorinanna, aku nenmo gan Iudananta gagrirta ramoot paŋanmo watcarica ma larua taŋit ki?” 40 Lk 23.19, na Up 3.14Ri, mina kamb keca aindoprina, “Ma wanaiŋ co. U Barabasmo watcarica ma laru.” Na Barabas tikca ma runduŋa moa ŋgeprenanapa reik makɨmrena ramoot.
18:1 2 Sml 15.23, na Mt 26.36, na Mk 14.32, na Lk 22.39
*18:1 Kidron oc ma Olip Takurna roumb ndeacrena, na ma pacwɨkɨn teker ian, na warɨŋ ianna anna roumb ndeacrenan, na mana ia Getsemani.
18:2 Lk 21.37, na 22.39
18:3 Mt 26.47, na Mk 14.43, na Lk 22.47, na In 7.45, na Up 1.16
18:9 In 17.12
18:10 Mt 26.51, na Mk 14.47, na Lk 22.38, na 22.49-50
18:11 Mt 20.22, na 26.39, na 26.42, na Mk 14.36, na Lk 22.42
18:13 Mt 26.57, na Lk 3.2
18:14 In 11.49-50
18:15 Mt 26.58, na Mk 14.54, na Lk 22.54, na In 20.3, na 21.20, na Up 3.1
18:16 Mt 26.69, na Mk 14.66, na Lk 22.54
18:20 Mt 26.55, na Lk 4.15, na In 7.14, na 7.26-28
18:22 Ier 20.2, na Up 23.2
18:25 Mt 26.69-71, na Mk 14.69, na Lk 22.58
18:26 In 18.10
18:27 Mt 26.74, na Mk 14.72, na Lk 22.60, na In 13.38
18:28 Mt 27.2, na Mk 15.1, na Lk 23.1, na Up 3.13, na 10.28
†18:28 Pasowana Ra: Na Pasowana Ra, mana mɨnɨŋa gaind, an Ra Israelnanda Isip Ndeacri, Raraŋ Aetaniaca Minmo Otaca Aŋgɨca Larurina Ra Aniacna ndamŋina moatna.
18:31 In 19.6-7, na Up 18.15
18:32 Mt 20.19, na In 3.14, na 12.32-33
18:33 Mt 27.11
18:35 In 1.11
18:36 Dan 2.44, na 7.14, na 1 Ti 6.13
18:37 In 8.47, na 1 Ti 6.13, na 1 Io 3.19, na 4.6
18:38 Mt 27.24, na Lk 23.4
18:39 Mt 27.15, na Mk 15.6, na Lk 23.17
18:40 Lk 23.19, na Up 3.14