1 Eshe eshuwotso! Ik'o genee'úshitwo, beyar beetwonat S'ayin wosho woshde'er it atso it t'intsitwok'o maarts Ik'o shútson itn k'onirwe. Manowere t'intso itn b́ geyitso ari Ik'osh finet finoniye. 2 Sheengonat genee'úshitwo kim deshawonowere Ik'o shuntso fadbek'o it falitwok'o it nibi gawirwon handraar, it beyo woneewa bako datsani ark'ayere.

3 Aaninuwere it ik ikets Ik'o itsh b́imts imnetiyok'on tooko dashan detson asaabore bako it angoniyere danb it tookosh bogotaane err asaabk'ayere ett taash imets s'aaton keewirwe. 4 No ats ikatse ay kayuwots fa'ane, noatsi kay ik ikonuwere k'osh k'osh fino detsfe. 5  12:4-51 K'or. 12:12 Mank'owere noo ayuwotsi wotat nobefere Krstosn ik ats noone, ik atsi kayuwotsi nowottsok'on noatsatsewo desheeknone. 6 Mansh Ik'o b́ s'aaton noosh b́ ímts k'osh k'osh naari deero finats jiitswone, noosh imetso Ik'o aap'ts keewa wotiyal no amantsok'on Ik' aap'tso keewwone. 7 Noosh imetso k'oshwotssh fina wotiyal kup'ar finone, noosh imetso daniya wotiyal sheengshde'er daniwone, 8  12:6-8 1 K'or. 12:4-11 noosh imetso iza wotiyal izwone, noosh imetso tuwdi dowawotiyal nib s'eenon imone, noosh imetso ashuwotsi k'eeza wotiyal kup'ar k'eezwone, noosh imetso mihretiya wotiyal hanowere gene'on k'aluwone.

9 Git alber deshaw ari shunewo t'ut'k'ayere, gond keewo shid'ere, sheeng keewi shuutso sha'ore. 10 It ats atsewo eshuwwots shunon shunewere, it ats atsewosh mango imosh nohewere, 11 mawuk'ayr, Shayron aat'iruwotsi wotoore, doonzosh keewewere. 12 Jangiyetson gene'owere, gond bek'o k'amoore, jam aawo Ik'o k'onwere. 13 Amants eshuwotsi bokic'or te'úwere, ibwotsno ibíewre.

14  12:14 Mat. 5:44; Luk'. 6:28 Itn gishirwotsi deerwere, derwere bako c'ashk'ayere. 15 Geneúwirwotsnton gene'ore, epiruwotsnton efere. 16 It ats atseyo ik hasabiyon ikwotar beewere, it tooko danbaan deshr bog taana eto k'ayr* 12:16 Bog taana et k'ayere: T'owwotsnton ik wotar beewere,, wee gac'ets fino finosh it shúno wotowe. t'owwotsnton ik wotar beewere. It tookosh danfone etk'ayere.

17 Ash jami shinats sheeng wotts keewo k'aluwere bako, ashuwots itats gond keewo bok'aliyal, it aanide'er gondo boosh k'alk'ayere. 18 Itsh b́ faleyal ash jamonton jeenon beyosh it weeron it falitu jamo k'aluwere. 19  12:19 Iwi. 32:35 T jirwotso! fayo Ik'osh k'ayere boko it it tookon weero oorshk'ayere, «Weer weershtwonat weer worshi gushono anituwo taane etfe Doozo Ik'oni» ett guut'ere. 20  12:20 Ari. 25:21-22 Mansh weer worshoniyere n balangaro b́k'ak'iyal mazuwe, b́shashuwiyal shashuwo kishwe, hank'o n k'aliyal goyinar b́ jitsituwok'o woshitune. 21 Mansh gond keewo sheeng keewon da'úwere boko gond keewon da'ek'ayere.