5
Uumeleeŋ ejemba anana haamo amakeboŋa.
1 Daeŋ yoŋonoŋ Jiisas moma laariŋ “Hamoqeqe Tonanaga kolooja,” jeŋkejuti, ii kuuyanoŋ mono Anutuwaanoŋga kolokoloo doŋgoga kolooŋ laligoju. Daeŋ yoŋonoŋ Maŋa jopagoŋkejuti, ii kuuyanoŋ mono iwaa Meria kaaŋagadeeŋ jopagoŋ muŋkeju. 2 “Anutuwaa meraboraaŋa jopagoŋ oŋonjoŋ,” jeniŋ qaa iikawaa hoŋa ii anana kokaembaajoŋ gosiŋ aoŋ mojoŋ: Anutu jopagoŋ muŋ jojopaŋ qaaya teŋ koma otaaŋkejoŋi eeŋ, mono Anutuwaa meraboraaŋa kaaŋagadeeŋ jopagoŋ oŋomakeboŋa. Iikawaa aiweseya ii kaeŋ. 3 * Jon 14.15Anutu jopagoŋ muboŋatiwaa hoŋa ii qaa teŋkoŋkoŋ. Anutuwaanoŋ jojopaŋ qaa otaaniŋ sokonja. Jojopaŋ qaaya teŋ koniŋ lombotawo mende koloowaa.
4 Anutuwaanoŋga kolokoloo doŋgoga kolooniŋi, anana kuuyanoŋ saanoŋ iwaa jeta teŋ koma balombaa nanamemeŋ bologa haamo amakeboŋa. Anutunoŋ momalaari nonono iikawaa qaganoŋ qama kooliniŋ Anutunoŋ balombaa nanamemeŋ bologa ii qeŋ yakariro kamaadabororota laligojoŋ. Haamo amboŋatiwaa kania morota moŋ mende eja. 5 Anana haamo mende ambonagati eeŋ, daeŋ yoŋonoŋ ii ambuyaga? Jiisas Anutuwaa Meria kolooji, moŋnoŋ ii moma laariŋ mono balombaa nanamemeŋ bologa haamo amakebaa. Kiaŋ.
Anutunoŋ Meriaa qaa kokaeŋ naŋgoŋ jero:
6 Jiisas Kraist Anutuwaa Meria kolooji, ii nomaeŋ mojoŋ? Jiisasnoŋ apunoŋ kemero Jonoŋ oomulu meŋ muro Anutunoŋ kambaŋ iikanoŋ qaa ii jero mogi ano kanageŋ saya molaamambaajoŋ ano iikanoŋ qa aro moŋ Siwenoŋga kolooro mogi. Qaa apunoŋ indiŋ motooŋgo kolooroti, iikayadeeŋ qaago. Siwe Toyanoŋ qaa naŋgoŋ jeroti, iikawaa aiweseya ii apu ano sa, woi ii. Toroqeŋ Uŋa Toroyanoŋ qaa ii jeŋkeja. Iinoŋ qaa hoŋaa Toya koloojiwaajoŋ ama qoloŋgomambaajoŋ amamaaŋkeja.
7 Naŋgonaŋgo qaa karooŋ ii kaeŋ moniŋa eja. 8 Qaa karooŋ iikawaa aiweseya ii Uŋa, apu ano sa. Qaagia ii ororoŋ asuganoŋ moniŋ sokondaboroja. 9 Qaa jakeyanoŋ kouma naŋgonaŋgo amakejuti, ii saanoŋ moma aŋaliŋ aŋgoŋ komakejonto, Anutuwaa naŋgonaŋgo qaayanoŋ mono ejemba qaanana uuguŋ powowoŋ kotakota kolooja. Anutunoŋ Meriaajoŋ “Neenaa Meranaga,” qama kania kaeŋ asuganoŋ naŋgoŋ jero. Kawaajoŋ qaa ii gema qewombo.
10 Moŋnoŋ Anutuwaa Meria moma laariŋkeji, naŋgonaŋgo qaa Toyanoŋ mono aŋo iwaa uutanoŋ laligoro iwaa kania saanoŋ moma yagoŋkeja. Moŋnoŋ Anutu mende moma laariŋkeji, iinoŋ mono naŋgonaŋgo qaa Toya aŋa meŋ kamaaŋ aoŋ eja qolomoloŋgoya kolooŋkeja. Anutunoŋ qaa kota Meriaajoŋ naŋgoŋ jeroti, iinoŋ qaa ii mende moma laarijiwaajoŋ mono Anutu iyaŋa gema qeŋ muŋkeja. 11 * Jon 3.36Anutunoŋ qaaya kokaeŋ naŋgoŋ jero, “Niinoŋ laaligo kombombaŋa oŋomambaajoŋ jeweti, neenaa Merananoŋ mono laaligo kombombaŋa iikawaa kondomondoo Toya kolooja.” 12 Iwaa Meriawo qokotaaŋ laligoji, iinoŋ laaligo kombombaŋa buŋa qeŋ aoŋ laligoja. Anutuwaa Meriawo mende qokotaaŋ laligoji, iinoŋ laaligo kombombaŋa mende buŋa qeŋ aoŋ laligoja. Kiaŋ.
Laaligo kotigaa kania
13 Uugia meleema Anutu Meriaa qata ii moma laariŋkejuti, niinoŋ tere koi oŋoojoŋ oojeŋ. Laaligo kotigaa buŋa koloojuti, oŋonoŋ iikawaa kania tororo moma kotowutiwaajoŋ ama koi oojeŋ. 14 Anana saanoŋ awasaŋkaka kolooŋ Anutuwaa kosianoŋ kema qama kooliŋ nama kokaeŋ moma yagoŋkejoŋ: Naa iwoiwaajoŋ iwaa uusiiŋa otaaŋ qama kooliŋ muboŋati, iinoŋ mono qamakoolinana ii mobaa. 15 Ii me ii kawaajoŋ qama kooliniŋ qamakoolinana mobaatiwaajoŋ mojoŋi eeŋ, mono qaa koi kaaŋagadeeŋ moma kotojoŋ: Naa iwoiwaajoŋ qama kooliŋ mujoŋi, ii kuuya mono ananaa buŋananaga koloowaa.
16 Moŋnoŋ alia iiro siŋgisoŋgo ano iikanoŋ koomu kotigaa buŋa mende koloowaati, iinoŋ mono alia iwaajoŋ Anutu qama kooliro hamo qeŋ muro laaligo kotiganoŋ keubaa. Siŋgisoŋgo Anutunoŋ mesaowaatiwaa so aŋgiti, qaa koi mono iyoŋoojoŋ jejeŋ. Tosianoŋ siŋgisoŋgo aŋgi iikanoŋ koomu kotigaa buŋa koloowuti, iyoŋoojoŋ qama kooliwutiwaajoŋ ii mende jejeŋ. Qaago. 17 Nanamemeŋ bologa kuuya ii siŋgisoŋgo kolooja. Koposo tosaaŋa aniŋ iikanoŋ koomu kotigaa buŋa mende koloowoŋa. Kiaŋ.
Uumeleeŋ ejemba anana Anutuwo qokotaaŋ nanjoŋ.
18 Daeŋ yoŋonoŋ Anutuwaanoŋga kolokoloo doŋgoga koloogiti, iyoŋoonoŋga moŋnoŋ siŋgisoŋgo mende toroqeŋ amakeji, ii mojoŋ. Anutuwaanoŋga kolokoloo doŋgoga kolooŋ laligoji, iinoŋ mono iyaŋa galeŋ meŋ aoro Kileŋaa Toyanoŋ ii mende qelanjiŋ mewaa.
19 Anana qaa koi mojoŋ: Anana Anutuwaa buŋa koloojonto, gomaŋ so yoŋonoŋ uugia mende meleema Kilegaa Toyaa ku-usuŋ baatanoŋ laligogi galeŋ koma oŋomakeja.
20 Qaa koi kaaŋagadeeŋ mojoŋ: Moronoŋ eja hoŋa tooŋ kolooji, anono ii moma mubombaajoŋ Anutunoŋ Meria wasiro kamaaŋ moma-asa-asari nonono. Moronoŋ eja hoŋa tooŋ kolooji, anana iwo qokotaaŋ motooŋgo kolooŋ laligojoŋ. Eja hoŋa tooŋ ii Anutuwaa Meria Jiisas Kraist. Iinoŋ Anutu hoŋaboŋa ano laaligo kotigaa kondomondoo Toya kolooja.
21 Oo kokouruna, tando lopioŋ ano beŋ qoloŋmoloŋgoya tosianoŋ kokosiiŋ qelanjiŋ oŋombubotiwaajoŋ mono oŋoaŋgia galeŋ meŋ aoŋ laligowu. Kiaŋ.