1 Kambaŋ kanoŋ Juudanoŋ daremuŋuruta oŋomesaoŋ yagomaŋanoŋ Adulam gomanoŋ kemeŋ eja moŋ qata Hira iwo rama laligoro. 2 Kanoŋ laligoŋ Juudanoŋ Keinan eja moŋ qata Sua iwaa borata iima embiaga mero motooŋ eri. 3 Motooŋ eri embianoŋ koro ama mera meŋ qata Er qaro. 4 Kaeŋ qama mombo koro ama mera moŋ meŋ qata Oonan qaro. 5 Kawaa baatanoŋ mombo toroqeŋ mera moŋ meŋ iwaa qata Sela qaro. Mera ii Kezib gomanoŋ laligoŋ kanoŋ mero.

6 Kaeŋ laligogi Juudanoŋ meria mutuya Er iwaajoŋ emba moŋ qata Taamar muro embiaga kolooro. 7 Embiaga kolooroto, Juudawaa meria mutuya Er iinoŋ Pombaa jaanoŋ kilega meme kolooŋ laligoroti, iikawaajoŋ Poŋnoŋ jeŋ tegoŋ muro komuro. 8 Komuro Juudanoŋ meria Oonambaajoŋ kokaeŋ jero: “Gii saanoŋ dagaanoŋ malo meŋ qambota koloojaŋiwaa kana qaaya otaaŋ iwo eŋ dagaajoŋ gbili mekoloowa.”

9 Kaeŋ jeroto, Oonanoŋ gbili ii iwaa buŋa mende koloowaati, kaeŋ moma sili kokaeŋ ama laligoro: Dataajoŋ gbili mekoloowabotiwaajoŋ iwaa emba maloyawo eŋ laligoriti, kambaŋ iikanoŋ kambaŋ so mera mekomekoloowaa sele apuya ii eeŋ namonoŋ maama laligoro. 10 Sili kaaŋ ama laligoroti, ii Pombaa jaanoŋ kilegamoŋ kolooro. Kawaajoŋ Poŋnoŋ ii kaaŋagadeeŋ jeŋ tegoŋ muro komuro. 11 Komuro Juudanoŋ eŋaroya Taamar kokaeŋ ijoro: “Gii mono maŋgaa miri gomanoŋ eleema kema maloya laaligo laligona merana Selanoŋ somariiŋ somata kolooŋgo gii gombaa.” Keeta kokaeŋ romoŋgoŋ kaeŋ ijoro: Selawaa dawoita komuri iinoŋ iikawaa so laligoŋ kaaŋagadeeŋ komuwabo. Kaeŋ romoŋgoŋ Taamar ijoro maŋaa gomanoŋ eleema kema kanoŋ rama laligoro.

12 Kanoŋ rama laligoro kambaŋ koriga tegoro Suawaa borata, Juudawaa embia iinoŋ komuro. Komuro jiŋgeŋ qama saama laligoro tegoro Juudanoŋ gomaŋ baloŋ qata Timna kanoŋ eja tosianoŋ iyaŋaa lamauruta yoŋoo jugia motogiti, ii iŋiimambaajoŋ uro. Adulam gomambaa eja alia Hira iwo motooŋ iikanoŋ uri. 13 Uri Taamar buzu qaa kokaeŋ jegi moro: “Moba, goo eja eŋaroganoŋ mono lamauruta yoŋoo jugia motomambaajoŋ ama Timna gomaŋ balonoŋ kenja.”

14 Kaeŋ jegi moro. Juudawaa meria Selanoŋ mono somariiŋ somata kolooro kileŋ ii embia koloowaatiwaajoŋ mende muro. Kawaajoŋ Taamarnoŋ malo laligomambaa malekuya qetegoŋ waŋ kawosesenoŋ waŋ jaaya esuuŋ turuŋ aoro. Kaeŋ ama Timna kekembaa kananoŋ kema taoŋ qata Enaim kanoŋ keuma kiropo nagu kosianoŋ raro.

15 Raro Juudanoŋ kaŋ iima jaasewaŋa esuurotiwaajoŋ ii mende iima kotoŋ ii kana somata embaga kaeŋ romoŋgoro. 16 Eŋaroyaga raroti, ii mende moma kotorotiwaajoŋ ama kana goraayanoŋ iwaanoŋ kema kokaeŋ ijoro: “Saanoŋ kana niinoŋ giwo ewota.”

Kaeŋ ijoro moma kokaeŋ qisiro: “Niwo ewagatiwaa tawaya mono naa iwoiga nomba?”

17 Kaeŋ qisiro kokaeŋ ijoro: “Nii neenaa tuuŋnoŋa meme meria gbaworoya moŋ ambe goonoŋ kawaa.” Kaeŋ ijoro kokaeŋ qisiro:

“Ii wala mende kaŋ kouro qaagaa hoŋa koloowaatiwaa iwoi moŋ ii nomba me qaago?”

18 Kaeŋ qisiro kokaeŋ jero: “Noo qaanaa hoŋa koloowaatiwaa iwoi moŋ ii mono naa iwoiga gombenaga?”

Kaeŋ jero kokaeŋ meleeno: “Muŋgeŋ aasoganoŋ qaga mokotaaŋkejaŋi, ii ano iikawaa kasa wota ano gbaruga boroganoŋ meŋ nanjaŋi, mono ii nomba.” Kaeŋ meleeno iwoi ii muŋ iwo ero koro ano. 19 Iwo eŋ waama mirianoŋ kema waŋ kawoseseŋa luluuma qetegoŋ malo laligomambaa malekuya ii mombo mouma laligoro.

20 Kaeŋ laligoro Juudanoŋ kambaŋ moŋnoŋ Adulam gomambaa eja alia Hira wasiŋ kokaeŋ ijoro: “Gii mono meme (noniŋ) meria gbaworoya meŋ kema emba ii muna noo qaanaa hoŋa koloowaatiwaa iwoi ii meleema gono meŋ kawa.” Gawoŋ kaeŋ mewaatiwaajoŋ Hira wasiro kenoto, Hiranoŋ emba ii mende mokolooro. 21 Mende mokolooŋ Enaim eja tosaaŋa kokaeŋ qisiŋ oŋoma jero: “Siimoloŋ jigowaa kana somata embanoŋ Enaim kokaamba kana goraayanoŋ raroti, ii dakanoŋ?”

Kaeŋ jero kokaeŋ meleema ijogi: “Emba kaaŋa moŋ ii kokanoŋ mende laligoro.”

22 Kaeŋ jegi Hiranoŋ eeŋ eleema Juudawaanoŋ kaŋ ijoro: “Niinoŋ kema emba ii mende iibe. Gomaŋ iikawaa toya yoŋonoŋ kaaŋagadeeŋ qaa kokaeŋ jegi mobe: ‘Siimoloŋ jigowaa kana somata embia moŋ ii kokanoŋ mende laligoro.’ ”

23 Kaeŋ ijoro Juudanoŋ kokaeŋ jero: “Oo alana, mesaowa! Iinoŋ iwoi ii saanoŋ meŋ laligowaa. Iwoi moŋ amboraga, mono jomoma noroŋgi gamunoŋ turuŋ norombabo. Niinoŋ meme meria gbaworoya koi ii saanoŋ ambe kenoto, giinoŋ emba ii mende mokoloona.”

24 Kaeŋ jero koiŋ karoombaa so tegoro tosianoŋ Juuda buzu qaa kokaeŋ ijogi moro: “Goo eŋaroga Taamarnoŋ mono serowiliŋ ama koro ama laligoja.”

Kaeŋ ijogi Juudanoŋ ii moma Mooseswaa kana qaawaa so jeŋkooto kokaeŋ ano: “Ii mono wama ororaaŋ gerenoŋ giligi kemeŋ jewaa.”

25 Ii wama ororaaŋ keŋgi eŋaroyanoŋ Juudawaajoŋ qaa kokaeŋ ano keno: “Oo eŋarona, iwoi kokawaa toyanoŋ mono nono koro ama laligojeŋ. Kawaajoŋ muŋgeŋ aaso koi, iikawaa kasa wota ano gbaru koi mono iima gosiŋ toya mokoloowa.”

26 Qaa kaeŋ ano keno moma aŋaa iwoiya ii iima gosiŋ kokaeŋ jero: “Iinoŋ qaa ii oŋia jeja. Niinoŋ ii merana Selawaa embia koloowaatiwaajoŋ mende mube. Kawaajoŋ iinoŋ mono nii nuuguŋ emba dindiŋa kolooŋ qaa ii jeja.” Kaeŋ jeŋ emba iikawo mombo mende ero.

27 Kanageŋ merabora memambaa kambaŋanoŋ kaŋ kuuro mera gesoyaa uutanoŋ sunesune eja meria woi rari. 28 Rari mera memambaajoŋ ano moŋnoŋ boria suluro kamaaro. Kamaaro koipu embanoŋ ii iima moma kasa oso popolaŋ meŋ borianoŋ somoŋgoŋ kokaeŋ jero: “Iinoŋ wala asugija.”

29 Kaeŋ jeroto, mera kanoŋ boria mombo hororo uro alianoŋ wala asugiro. Iinoŋ asugiro koipu embanoŋ kokaeŋ jero: “Oo mono iikaaŋa ama kanaga menjurama asugijaŋ.” Kaeŋ jero qata Perez qagi. (Perez = Kania menjuranja.) 30 Kawaa gematanoŋ aliaa borianoŋ beweso kasa oso popolaŋ eroti, iinoŋ asugiro qata Zera qagi. (Zera = oso popolaŋ) Kiaŋ.