48
Jeikobnoŋ Manase ano Efraim kotuegoŋ orono.
1 Kambaŋ tosia tegoro Jeikobnoŋ ji mokolooro qaa ii Joosef ijogi moro. Ii moma merawoita woi Manase ano Efraim ii uruama maŋaanoŋ keno. 2 Keno tosianoŋ Jeikob kokaeŋ ijogi, “Meraga Joosefnoŋ giimambaajoŋ kaja.” Israelnoŋ qaa ii moma ku-usuŋa eroti, ii kululuuŋ ee duŋayanoŋa waama raro. 3 * Jen 28.13-14 Waama rama Joosef kokaeŋ ijoro: “Anutu ku-usuŋ kuuyaa Toya iinoŋ Keinan balombaa Luz gomaŋ kanoŋ noonoŋ asugiŋ kotuegoŋ nono.
4 Ii noma kokaeŋ nijoro: ‘Niinoŋ kolooŋseisei gombe gbiliuruga yoŋoo jaŋgogianoŋ mono somariiŋ somariiŋ uro giinoŋ kanageso tuuŋa tuuŋa mamaga yoŋoo bemunjalegiaga koloowaga. Gbiliuruga kanageŋ kolooŋ ubuti, niinoŋ baloŋ koi ii buŋa qeŋ oŋombe iyoŋoo buŋagiaga tetegoya qaa eŋ ubaa.’
5 Anutunoŋ kaeŋ nijoro. Wala nii Iijipt balonoŋ goonoŋ mende kaweti, kambaŋ iikanoŋ embaganoŋ merawoiga woi Iijipt kokanoŋ oronoti, iyoronoŋ mono noo buŋa koloowao. Manase ano Efraim yoronoŋ mono Ruuben ano Simeon kaaŋa noo buŋa koloowao. 6 Kaeŋ koloori kanageŋ baloŋ mosoma yoroojoŋ distrik woi orombu. Efraim ano Manase yoroo bagaranoŋ meraborauruga tosaaŋa koloogiti, iyoŋonoŋ mono geeŋgaa buŋaga koloowuya. Yoŋonoŋ baloŋ bakaya buŋa qeŋ aowuti, ii mono Efraim ano Manase yoroonoŋ distrik woi iikawaa uutanoŋ egi yoronoŋ waŋgia koloori dawoigara yoroo newo baogaranoŋ laligowuya. 7 * Jen 35.16-19 Niinoŋ Mesopotemia (Padan Aram) mesaoŋ eleema Keinan balonoŋ kaŋ Efrata taoŋ dodowiwe embana Reizelnoŋ komuro wosobiri somata kolooŋ nono. Komuro qamoya ii Efrat kekembaa kana goraayanoŋ roŋ kombe. Efrat gomambaa qata moŋ ii Betlehem.”
8 Israelnoŋ kaeŋ jeŋ Joosefwaa merawoita iriima kokaeŋ qisiŋ muro: “Mera woi koi ii moronoŋ moronoŋ?”
9 Qisiŋ muro Joosefnoŋ maŋa kokaeŋ ijoro: “Noo merawoina Anutunoŋ Iijipt kokanoŋ nonoti, mono ii.” Kaeŋ ijoro Israelnoŋ jero: “Niinoŋ kotuegoŋ oromambaajoŋ ii saanoŋ uruana noo kosonanoŋ kawao.” 10 Kaeŋ ijoro Joosefnoŋ merawoita uruama kosianoŋ kagi boria giliro arogaranoŋ kemero buugara kitoŋ nero. Israelnoŋ eja waŋa kolooro jaaya umuŋ kono iwoi moŋ iima kotomambaajoŋ haŋqaŋ qeŋ amamaaro. 11 Buugara kitoŋ neŋ Joosef kokaeŋ ijoro: “Niinoŋ wala goo jaasewaŋga mombo giimambaajoŋ mende mamboma laligoweto, Anutunoŋ kana meleuro kete koi geeŋga ano merawoiga kaaŋagadeeŋ iŋiijeŋ.”
12 Kaeŋ ijoro Joosefnoŋ merawoita maŋaa tawoyanoŋga uruama simiŋ kuma usugoŋ kemero.
13 Usugoŋ kemeŋ waama merawoita borogaranoŋ meŋ uruano aŋaa maŋaa batanoŋ kari. Efraim ii boria dindiŋanoŋ meŋ Israelwaa boria qanianoŋ ama Manase ii boria qanianoŋ meŋ Israelwaa boria dindiŋanoŋ ano. 14 Kaeŋ ama oronoto, Efraim koga kolooro asianoŋ kileŋ boria dindiŋanoŋ boraama iwaa waŋanoŋ ano. Manasenoŋ Joosefwaa meria mutuya kolooroto, asianoŋ kileŋ boria qanianoŋ iwaa waŋanoŋ ano. Kaeŋ ama boria maripooŋ kaaŋa ama kotoŋ waŋgaranoŋ ano. 15 Kaeŋ ama rama Joosef kotuegoŋ muŋ kokaeŋ jero:
“Asana Aabraham ano maŋna Aisak yoronoŋ Anutuwaa jaanoŋ
kema kaŋ ama meŋ laligori.
Niinoŋ kolooŋ laligoŋ koubeti, Anutunoŋ mono
kambaŋ iikanoŋ pondaŋ kalaŋ koma noma laligoŋ kouro.
16 Siwe gajobanoŋ nii bologa kuuya iikanoŋa metogoŋ aŋgoŋ koma noma
laligoroti, iinoŋ mono eja gbaworo woi koi kotuegoŋ oroma laligowa.
Ejembanoŋ yoroo qagara qagi iikanoŋ mono nii ano maŋ asana
Aisak ano Aabraham nonoo qabuŋanana bosima laligowao.
Yoroo kanagesogaranoŋ mono namo qaganoŋ honoŋa qaa seiŋ laligowuya.”
17 Kaeŋ jeroto, Joosefnoŋ maŋanoŋ boria dindiŋanoŋ Efraimbaa waŋanoŋ ano ii iiro mende sokono kawaajoŋ moma boliŋ maŋaa boria dindiŋanoŋ meŋ Efraimbaa waŋanoŋga metogoŋ Manasewaa waŋanoŋ amambaajoŋ ano. 18 Kaeŋ ama maŋa kokaeŋ ijoro: “Amana, kaaŋ mende mewa. Mera koi kanoŋ mutu merana kolooja. Kawaajoŋ boroga dindiŋanoŋ mono iwaa waŋanoŋ amba.”
19 Kaeŋ ijoroto, maŋanoŋ ii amambaajoŋ qetama Joosef kokaeŋ ijoro: “Merana, ii saanoŋ mojeŋ. Niinoŋ ii mojeŋ. Manasenoŋ kaaŋagadeeŋ waaŋawo kolooro iwaa gbiliurutanoŋ kaaŋagadeeŋ kolooŋ seisei ama kanageso somata koloowuyato, Efraimbaa qaqabuŋayanoŋ mono Manasewaanoŋ qabuŋa uuguŋ ewaa. Iwaa gbiliurutanoŋ mono kolooŋ seisei somata ama kanageso tuuŋa tuuŋa mamaga kolooŋ laligowuya.”
20 * Hib 11.21 Kaeŋ ijoro moro weemboria iikanoŋadeeŋ kotuegoŋ oroma kokaeŋ jero:
“Israel yoŋonoŋ mono oroo qagara qama kanagesogia
kotuegoŋ oŋoma kokaeŋ jewuya:
Anutunoŋ mono oyaŋboyaŋ ama oŋonota
oŋonoŋ Efraim ano Manase kaaŋa koloowu.”
Kaeŋ jeŋ Manase ii Efraimbaa newo baatanoŋ ano.
21 Israelnoŋ kotuegoŋ oŋono tegoro Joosefwaa qaa kokaeŋ jero: “Moba, niinoŋ komumambaajoŋ anjento, Anutunoŋ oŋowo laligoŋ ubaa. Iinoŋ mono uŋuano maŋ asaurugia yoŋoo balonoŋ eleema kembuya. 22 Iikanoŋ kema batugianoŋ baloŋ mosoŋgi niinoŋ goonoŋ baloŋ toroqeŋ Sekem baloŋ kelegawo ii gonjeŋ. Niinoŋ baloŋ bambaaŋa ii Amor kanageso yoŋowo manja qeŋ neenaa tiwo ano manjawaa soo somata iikanoŋ yoŋoonoŋga mewe. Joosef gii daremuŋuruga yoŋoo waŋgia koloojaŋiwaajoŋ ii daremuŋuruga yoŋoojoŋ qaagoto, goo buŋaga jeŋ tegoweta ewaa.” Kiaŋ.