8
Jiisasnoŋ eja moŋ manimbayawo meŋ solaŋaniro.
Maak 1.40-45; Luuk 5.12-16
1 Jiisasnoŋ baaŋa ii mesaoŋ kamaaro kanageso tuuŋlelembe somatanoŋ gematanoŋ otaagi. 2 Kaeŋ kagi kanoŋ eja manimbayawo moŋnoŋ kaŋ simiŋ kuma Jiisaswaa wosoyanoŋ kemeŋ kokaeŋ ijoro, “Oo Poŋ, giinoŋ siiŋganoŋ meŋ qeaŋgoŋ nomambaajoŋ mojaŋi eeŋ, mono nii saanoŋ meŋ solaŋaniŋ nomba.”
3 Kaeŋ ijoro boria boraama selia oosiriŋ ijoro, “Niinoŋ ii amambaajoŋ mojeŋ. Gii mono solaŋaniwa.” Kaeŋ ijoro manimbaya ii iikanondeeŋ solaŋaniro awaa kolooro. 4 * Lew 14.1-32Solaŋaniro kokaeŋ jeŋ kotoŋ muro, “Moba, kokawaa buju qaaya ii moŋ mende jena moba. Qaagoto, mono jigo gawoŋ galembaanoŋ kema selega qendeema muba ano Mooseswaanoŋ jeŋkootoya otaaŋ solaŋanijaŋiwaa daŋgiseŋ nanduŋa ama siimoloŋ oowa. Ii oona iiro ejembanoŋ kaniaga moma kotowu.” Kiaŋ.
Jiisasnoŋ kawali galeŋ mombaa gawoŋ ejia meŋ qeaŋgoro.
Luuk 7.1-10
5 Jiisasnoŋ Kaperneam taonoŋ kouro Room kawali galeŋ moŋnoŋ iwaanoŋ kaŋ qama kooliŋ kokaeŋ ijoro, 6 “Oo Poŋ, noo gawoŋ ejanaa seliaa bakayanoŋ koomuya kolooro siimbobolo kanjaŋawo moma mirinoŋ eja.”
7 Kaeŋ ijoro kokaeŋ jero moro, “Niinoŋ mono kema ii meŋ qeaŋgomaŋa.” 8 Ii moma kokaeŋ meleema ijoro, “Oo Poŋ, nii kaandiaga laligowe noo miri waareŋanoŋ gualeembaatiwaajoŋ gamuna mojeŋ. Kawaajoŋ qaa jeganondeeŋ jena weleŋ ejananoŋ qeaŋgowaa.
9 Ii kokaembaajoŋa: Nii neeno kaaŋagadeeŋ galenaa ku-usuŋ baatanoŋ ama noŋgi laligojeŋ. Noo baananoŋ manjaqeqe eja laligogi ii jeŋ kotoŋ oŋomakejeŋ. Yoŋoonoŋga mombaajoŋ ‘Kemba,’ jeŋ kotowe iinoŋ kembaa. Mombaajoŋ ‘Kawa,’ jeŋ kotowe iinoŋ kawaa ano weleŋ ejana mombaajoŋ ‘Gawoŋ koi mewa,’ jewe iinoŋ ii mewaa.”
10 Jiisasnoŋ qaa ii moma waliŋgoŋ ejemba otaaŋ kagiti, iyoŋoonoŋ eleema kokaeŋ iŋijoro, “Niinoŋ qaa hoŋa moŋ kokaeŋ iŋijowe mobu: Israel kanageso batugianoŋ kaaŋagadeeŋ momalaari somata kaaŋa ii mombaa uutanoŋ mende mokoloowe.
11 * Luuk 13.29Niinoŋ qaa kokaeŋ iŋijowe mobu: Ejemba tuuŋ somasomatanoŋ mono weeŋ koukoutanoŋga ano weeŋ kemekemetanoŋga kaŋ Siwewaa bentotoŋ uutanoŋ kouma Aabraham, Aisak ano Jeikob yoŋowo nembanene neŋ korisoro ama laligowuya. 12 * Mat 22.13; 25.30; Luuk 13.28Yoŋonoŋ kaeŋ laligowuto, bentotombaa meraboraaŋa ii mono oŋomesaoŋ hagoŋ oŋoŋgi paŋgamanoŋ seleeŋgeŋ kemebu. Iikanoŋ laligowuti, iyoŋonoŋ mono saama gigilaaŋ gobugia kigi qaro laligowuya.”
13 Kaeŋ iŋijoŋ kawali galeŋ kokaeŋ ijoro, “Gii mono miriganoŋ kemba. Momalaarigaa hoŋa mono kolooŋ gomba.” Kaeŋ ijoro weleŋ ejianoŋ mono aua iikanondeeŋ qeaŋgoro. Kiaŋ.
Jiisasnoŋ ji ejemba mamaga meŋ qeaŋgoŋ oŋono.
Maak 1.29-34; Luuk 4.38-41
14 Jiisasnoŋ Piitowaa mirinoŋ kema Piitowaa seuŋanoŋ selegere ji kiro ero iiro. 15 Ii iima borianoŋ oosiriro selegereya mesaoro waama kanaiŋ Jiisas nene ooŋ wagiro.
16 Kaeŋ laligogi gomaŋ tiiro kanoŋ ejembanoŋ alaurugia omegiawo ii mamaga uŋuama iwaanoŋ kagi. Kagi ome ii qaayanoŋ jeŋ konjoma oŋono kouma keŋgi ano ji ejemba kuuya ii meŋ qeaŋgoŋ oŋono. 17 * Ais 53.4Iikaaŋ ano Anutunoŋ qaaya gejatootoo eja Aisaiawaa uutanoŋ ano jerota eji, iikanoŋ hoŋawo kolooro. Qaa ii kokaeŋ,
“Iinoŋ ananaanoŋ ji wijinana mero qaganoŋ uro bosino.” Kiaŋ.
Jiisas otaawombaa mondomondo qaaya
Luuk 9.57-62
18 Jiisasnoŋ ejemba tuuŋ somata liligoŋ mugi iŋiima kambaŋ kanoŋ gowokouruta yoŋowo apu aŋgoŋ kotoŋ leegeŋ keubombaajoŋ jeŋ kotoro. 19 Kana qaawaa boi moŋnoŋ Jiisaswaanoŋ kaŋ kokaeŋ ijoro, “Boi, gii daeŋ daeŋ kembagati, niinoŋ mono iikanoŋ gii gotaaŋ kamaŋa.”
20 Ii moma Jiisasnoŋ kokaeŋ ijoro, “Duuyaa kasuya yoŋonoŋ jamo kobaagianoŋ egi kanakeewambaa kooŋa yoŋonoŋ saraŋ bambaŋgianoŋ laligoŋkejuto, Siwe gomambaa Eja hoŋanoŋ mono dakanoŋ kema waŋa naa qembonoŋ qeŋ laariŋ haamo menaga?”
21 Kaeŋ ijoro gowoko yoŋoonoŋga moŋnoŋ kokaeŋ ijoro, “Ii saanonto, maŋnanoŋ komumambaa anjiwaajoŋ mono jena wala kema galeŋ kombe komuro roŋ kombego.” 22 Kaeŋ jeroto, Jiisasnoŋ meleema ijoro, “Mono mesaowa, koomuya yoŋonoŋ qamogia koomuya ii saanoŋ roŋ kombuto, giinoŋ mono kaŋ nii notaawa.” Kiaŋ.
Jiisasnoŋ jero raidimboŋ goroŋ qero.
Maak 4.35-41; Luuk 8.22-25
23 Jiisasnoŋ kema waŋgo uutanoŋ uro gowokouruta yoŋonoŋ otaaŋ iwo motooŋ keŋgi. 24 Keŋgi raidimboŋ somatanoŋ obabaŋkota apu aŋgonoŋ kolooŋ giliro. Giliro sirinoŋ waŋgo uutanoŋ kemeŋ saa qemambaajoŋ anoto, Jiisasnoŋ gaoŋ ero. 25 Gaoŋ ero gowokouruta yoŋonoŋ kema mindiiŋ ijogi, “Hei Poŋ, mono ilaaŋ nonomba. Nono aŋgonoŋ tiwilaawombaajoŋ anjoŋ.”
26 Kaeŋ ijogi meleema kokaeŋ iŋijoro, “Oo oŋo momalaarigia melaada, mono naambaajoŋ toroko momo eja kolooju?” Kaeŋ iŋijoŋ waama musu ano siri jeŋ kotoŋ orono sirinoŋ goroŋ qeŋ ero.
27 Kaeŋ kolooro awawaliŋ qisiŋ aoŋ jegi, “Yei, maŋgaa siita! Eja koi naa ejaga laligoja? Iinoŋ musu ano kowe jeŋ kotoŋ orono jeta teŋ konjao.” Kiaŋ.
Omenoŋ bao uugianoŋ kemegi ejanoŋ qeaŋgori.
Maak 5.1-20; Luuk 8.26-39
28 Kaeŋ kolooro apu aŋgoŋ kotoŋ leegeŋ Gadara yoŋoo gomanoŋ keuro. Iikanoŋ keuma eja omegarawo woi yoronoŋ qasirinoŋga kaŋ Jiisas mokoloori. Yoronoŋ iriŋsoŋsooŋ eja uugeregarawo koloori kuuyanoŋ kana iikanoŋ kembombaajoŋ amamaagi. 29 Yoronoŋ Jiisas mokolooŋ silama kokaeŋ qama gigilaari, “Ae! Gii Anutuwaa Meria koloojaŋ. Gii mono nomaeŋ ama nonomambaajoŋ kajaŋ? Siimbobolo momo kambaŋanoŋ mende kaŋ kuuro waladeeŋ ii geriawo ama nonomambaajoŋ koi kajaŋ me?”
30 Iikanondeeŋ koriganoŋ qaagoto, kosogianoŋ kanoŋ bao tuuŋ somata moŋ gbojoja uutanoŋ kuluuma laligogi. 31 Kawaajoŋ ome yoŋonoŋ kokaeŋ jeŋ Jiisas welema mugi, “Giinoŋ nono konjoma nonombagati eeŋ, mono wasiŋ nonona saanoŋ bao tuuŋ yoŋoo uugianoŋ kemeboŋa.”
32 Welema mugi Jiisasnoŋ “Mono kema kemebu,” jeŋ jeŋ kotoŋ oŋono. Kaeŋ jeŋ kotoŋ oŋono iikanondeeŋ eja uugaranoŋga kouma kema bao uugianoŋ kemegi. Kemegi bao tuuŋ jumuŋa yoŋonoŋ mono luguŋ newonewoyanoŋ (siasiayanoŋ) kema jororoŋgoŋ apu aŋgonoŋ kemeŋ nemotoŋ komudaborogi.
33 Komudaborogi bao galeŋ yoŋonoŋ koko koma unjurama taonoŋ kema qaa bujugia kuuya jegi. Eja omegarawo yoroonoŋ iwoi kolooroti, iikawaa bujuya kaaŋagadeeŋ iŋijogi. 34 Iŋijogi moma taoŋ ejemba jaasooŋgo yoŋonoŋ mesaoŋ Jiisas mokolooŋ iibombaajoŋ kagi. Kaŋ iima Jiisasnoŋ yoŋoo mindimindiri sopa gomaŋ mesaoŋ kembaatiwaajoŋ welema mugi. Kiaŋ.