5
Jon Lë Ḳapiya Ti Sën Dejegwi Raḳ Ḳele Niḳegwi* Bemir Rot
1 Log sa halë Mehö sën nedo raḳ sëa-los-arë lo jom ḳapiya ti loḳ nema vesa, beġaġek neggëp raḳ vahi vahi. Log devevir bedemir raḳ ḳele niḳegwi* loḳ len nemadvahi-bevidek-luu, beḳanaḳ raḳ neggëp ḳele niḳegwi*. 2 Log sa halë angër los niwëëk ti genetahi böpata bë, “Mehö re yö nivesa rot, beyoh vu bë napuvin ḳele niḳegwi* in ḳapiya sën agi gegepuh-a?” 3 Rëḳ mehö ti su nivesa menedo yaġek, ma nedo dob, ma nedo dob ġebinë, in bë gepuh ḳapiya sënë benatevin rë. 4 Sa halë gesu detöḳ vu mehöti beyoh vu bë gepuh ḳapiya sënë genatevin rë. Lob sayoġ maggin besesu rot. 5 Rëḳ ggev ti nër vu sa bë, “Su ġengu! Gaḳ gwenġo rë! Reggu böp layon sën yi degwa vu Yuda geverup loḳ Davit-yi-mewis nebë sën meġen neggol loḳ ḳele degwa lo nedo. Mehöti sënë kesuu Satan los nġaa dob yi pin. Om yi sënë yoh vu bë rëḳ napuvin ḳele niḳegwi* nemadvahi-bevidek-luu sagi na in ḳapiya sënë gegepuh.”
Jon Lë Sipsip Nalu
6 Log sa halë Sipsip Nalu ti nare, rëḳ ni nebë sën desis mediiḳ tu seriveng. Nare loḳ sëa-los-arë sënë genġaa lubeluu sën denedo malaj-tumsën agi losho alam ggev lo vuheng atov. Vis nemadvahi-bevidek-luu, gemala ġahis nemadvahi-bevidek-luu. Mala ġahis sagi og yiḳ Anutu yi nġaahur nivesa nemadvahi-bevidek-luu sën Anutu vonġ sir ya meyoh vu dob pin lo. 7 Lob mëm Sipsip Nalu sënë ya meḳo ḳapiya sënë loḳ Mehö sën nedo raḳ sëa-los-arë lo nema vesa. 8 Ḳo ḳapiya sënë ggovek ya, log nġaa lubeluu sën denedo malaj-tumsën agi losho alam ggev mehödahis-bevidek-lubeluu sënë depetev medeneggëp loḳ Sipsip Nalu mala. Alam ggev pin deḳo nġaa-sengii-yi ni nebë gita, los ġabum goor yoh vu sir pin. Log kabanġ reggu nivesa pup ġabum pin ayoj. Yiḳ sënëḳ Anutu-yi-alam hir jomraḳsën. 9 Log devonġ raro mewis ti nebë:
“Ġeyoh vu rot bë gweḳo ḳapiya
beġenapuvin ḳele niḳegwi* sën neggërin lo.
In desis honġ meġediiḳ tu seriveng,
lob ġebaġo mehönon yom vu Anutu raḳ nim ḳöḳ.
Yönon, ġebaġo alam loḳ mehönon degwaj pin,
geloḳ ayej ti ti pin,
geloḳ dob ti ti pin.
10 Geġevonġ bedetu hil Anutu-yi-alam-deneḳo-seriveng
los detu yi alam-los-bengöj
in denatu ala bedegeġin dob.”
Deḳo Sipsip Nalu Arë Raḳ
11 Log sa malaġ yah nelë, lob sa hanġo angër nġahiseḳë rot ayej. Sir nġahiseḳë rot nebë sën andet milion (100,000,000) genġahiseḳë rot raḳ neggëp mehömehö medenare tetup sëa-los-arë sënë genġaa la sën denedo malaj-tumsën lo los alam ggev. 12 Log devonġ raro böpata bë:
“Sipsip Nalu sën desis mediiḳ tu seriveng lo,
yoh vu rot bë geḳo arë böpata rot,
genġaa nivesa vesa pin, gekwa nivesa, geniwëëk böpata.
Yi yö yoh vu rot bë mehönon pin degeḳo arë jaḳ,
gedenanër niwëëk los arë böpata ranġah,
gedenapisek in yi.”
13 Log sa hanġo nġaa aggagga pin sën Anutu tunġ lo ayej raḳ ving. Nġaa sën denevëëng ggëp yaġek babu lo, genġaa sën deneyoh dob lo, genġaa sën deneggevek dob ġebinë lo, genġaa sën deneggëp loḳ loo lo, bayej raḳ medenër bë:
“Mehö sën nedo raḳ sëa-los-arë lo luho Sipsip Nalu,
hil ġaḳo luho arëj jaḳ na vavunë, barëj böp rot,
genij ḳapiik los nij wëëk gëp degwata los degwata!”
14 Log nġaa lubeluu sën denedo malaj-tumsën lo deyoġekin bë, “Yönon!” Lob alam ggev depetev medeneggëp loḳ luho malaj medeneḳo arëj raḳ.