1 Bitaite kwian ulita igi ganga chugagwalla emperador nga Romamu alin kaire kwian na tanre agenga me no jo chke mo lite Jesu kle ngwadi Jesu keruchuge gerule Chube giti. 2 Kwian fariseo mneite kaire kwian daba tkanga tangle Moisés chadalla giti mneite kledu gwage kwian ulita kledu mo lite Jesu oledi gire ama gerudu modige Jesudi kwian ulita kle mo litaba giti:

—Onbre e kle age me no, ama kle mo ta dbe no kwian agenga me no ole kle kwian agenga me no ulita gai ngwange no, diali ama kle blire ule kwian agenga me no ulita ole.

3 Kwian fariseo mneite alin kaire daba tkanga tangle Moisés chadalla giti mneite alin Jesu geru ai ñachugu, Jesu gerudu:

4 —Ba ulita kle aini gweale bda oveja ngle molen cien, gire bda oveja gdaite jogengwa ba ngeru, ¿ba be age mine? ¿Ba be ta jogenga oveja gdaite jogebanga giti be oveja gdaite chuge ngwadi jogenga? Ba oveja mauña mi ta jogenga ovejage, ba be oveja na dare noventa y nueve jige litaba ole ngmadi nga oveja manangwage gire ba be joge oveja gdaite jogebanga jinade nate, ba be oveja jinade tanre gire oveja skwen bage. 5 Oveja skwen bage ba oveja gai ba oveja mlie kwligage nga suga no ole oveja giti. 6 Gire ba chieni oveja dbe gudegu, ba chkeni gude gire ba mo skatemanalla ulita kade kaire ba kwian na ulita kle toi kodi ba ullage kade, gire ba gerule kwian e ulita ole: “Bai nga ollade cha ole oveja ai giti, nga suga noare chadi oveja giti, oveja jongwa cha ngeru, cha oveja jinadu, oveja skwendu chage. ¡Ale oveja ollade nga suga no ole!” 7 Nga dba ai giti ba mo ta dbe ene oveja jogebanga ole, e kare ene nga suga no nga ngaña giti kwian gdaitre alin joge siere age me noge mo ta blite Chube ole giti, nga ma suga no kweri nga ngaña giti kwian e gdaite giti kwian na ulita noventa y nueve gitige, kwian noventa y nueve ulita tañachuge ama ta no trate Chube gwa giti, kwian e ulitage agali suge ama kle age no ulita malen ama me mo ta blitadale Chube ole —Jesu geru ñachugu ene oveja gdaite jogebanga giti.

8 Jesu geru na ñachugu kwian fariseo ulita alin kaire kwian daba tkanga tangle Moisés chadalla giti ulita alin:

—Muinga gdaite igi molen gugataboko, igi e gugaite jogenga muinga ngeru, ¿muinga be age mine igi e nate? Muinga be jichra gwadege, jichra giti muinga be igi jinade nate trate gwa ugdo jegwale, muinga be nga lite ulita gwa tangle, bdagli ene igi be skwen nate muingage. 9 Igi be skwen nate muingage gire muinga be skatemanalla ulita kade, kaire be kwian na ulita kle toi kodi ama ullage kade, be gerule kwian ulita ole: “Nga suga noare chadi. Bai nga ollade cha ole igi giti, igi jongwa cha ngeru, cha igi jinadu nate, igi skwendu chage. ¡Ale igi ollade nga suga no ole!” Muinga be gerule ene kwian ole be kwian kade nga ollade nga suga no ole. 10 Cha gerule ba ole, ene kaire nga ma suga no lle boanga Chube alin nga ngaña giti tanredi kwian gdaitre alin ole joge siere age me noge mo ta blite Chube ole giti.

11 Kaire Jesu geru na ñachugu:

—Kwian onbre gdaite kirogwa onbre molen gdaboke. 12 Kirogwa daba nate gerudu ñenua ole: “Tata, bdagli ba be chude girabate bda girabate dbi girabate ulita cha ole cha daballa ole, ba e bonga chanu kete chage nege, cha me ta manakalin.” Kirogwa daba nate gerudu ene ñenua ole gire ñenua chude girabatu bda girabatu dbi girabatu ulita kirolla boke ole, ñenua lle ngle ketu kirolla bokege. 13 Jo chuia kaire kirogwa daba nate chude, bda, dbi maunu ulita chbadu, gire ama igi gau ngle lle e ulita ñanale. Ama jo toi bate nga nage, jo chke nga batege gire ama me mo ta gbu chage trate, ama igi kagunga ulita lle tanre ngwale giti. 14 Ama igi kagunga ngwale ulita gire bli kweri chiu nga ege kwian ulita alin, kwian onbre e chegu me igi molen ama bli chugu tanre. 15 Ama ole igi me, ama chagedu kole malen ama jo lle boi jinade boadale kwian onbre gdaite lle molen kle toi nga ege ngwadi, onbre e kle toi nga ege lle boale ketu amage boadale, ama chunchi manadu onbre e alin. 16 Ama kle chunchi ulle gligbadi, ama bli ole tanre ama takalin chunchi bligdalla gute tike, agwa ama alin ni gligba keta gutadale. 17 Ama jogeda dare bli ole gire ama tachku mo ñenuage, ama gerudu mo tale: “Llani cha ñenua jwiage bligda tanre no gutadale, kwian lle boanga cha ñenua alin ulita kle blire no, cha ama kirolla aini cha jogeda bli ole. 18 Cha be jogeni cha ñenua ngwadi, cha be gerule cha ñenua ole: ‘Tata, cha agedu me no Chube dollale ba dollale kaire, 19 chage suge cha me agedu no ba ole malen cha takalin ba me cha gaini mo kirollale, agwa ba cha gai kwian lle boanga ba alin.’ ” 20 Ama gerudu ene mo tale gire ama mo gbu biale ama joni jonkare ama ñenua nate, ama jo gwagudeguda bate jonkare ñenua gwagedu mo kirolladi chieni gwagudeguda, ñenua ta sugedu tai dage tanre mo kirollage, ñenua jritedu ama ngwange, ñenua ama gau ngwange nga suga no ole, ñenua ko bliu kirolladi, ñenua kirolla sobadu. 21 Gire kirolla gerudu ñenua ole: “Tata, cha agedu me no Chube dollale ba dollale, chage suge cha me agedu no ba ole malen cha takalin ba me cha gaini mo kirollale, ba cha gai kwian lle boanga kare ba alin.” Ñenua gerudu kirolla ole: “Ba cha kirolla chanu, ba me tallade cha ngeru, ba cha kirolla, cha no ba ole.” 22 Ñenua gerudu ene mo kirolla ole gire gerudu kwian lle boanga ulita ole: “Joga ñometragda no jwen blike cha kirolla alin, ba ama ngama tke no, lle tkale koge jwen tke ama koge, kaire zapato tke ama serage. 23-24 Ba joge chbi ma blodi jwen, ba chbi gweda. Ale blire ule cha kirolla ole, ale nga dbe suga no cha kirolla ole. Cha kirolla ai jongwa chage, cha tañachugu ama jokeda. Me dale ene. Ama kle gwade, nege ama chkuni aini chadige. ¡Ale cha kirolla chuia ollade ule!” Kwian ulita lle boanga tale nga chegu suga no, ama ulita chui olladu ule kirogwa ñenua ole kirolla chkuni giti.

25 ’Kirolla daba ngeru kledu lle boi deage, ama chiuni gudegu chku kodi uge gire ama ologe sugedu kwian kle lle dagenga kwian ulita kle nga ollade skwen gdate. 26 Kirolla e lle boanga gdaite kadu mo gitigu gire geru kadu amage: “¿Kle boi mine gwa?” 27 Kwian lle boanga gerudu: “Ba daballa chkuni noni gudeni ba ñenuadi, malen ba ñenua kle ba daballa chuia ollade, ba ñenua chbi ma blodi gwanguda ba daballa alin gutadale ule.” 28 Daballa ngeruge geru e chku uñale gire ama skochiu tanre mo tale, ama me mo ta gbu joge gwa daballa soli kle ngwadi, ama chegu bate sugekare uge. Bdagli ñenua jo agali kirolla juma jwen gudegu, ñenua gerudu kirolla juma ole: “Bai cha ole gwa ba daballa chkuni chuia ollade.” 29 Kirolla juma gerudu ñenua ole: “Cha mi joge gwa ba ole ba kirolla soli chuia ollade. Sbali chura ngle cha kledu lle boi no ba alin, cha ba gau dage no diali, gire mau tale ni ba bda soli gdaite ketu gwaleda chui olladale cha alin blire ule cha skatemanalla ole. 30 Ba kirolla soli me no ba ole me ba gau dage, ama ba igia junnga ulita ama ba igia kagunga ngwale muinga tanre me nodi, nege ama chkeni gire blike ama alin ba chbi blodi gwanguda gutale ama alin.” 31 Kirolla juma ka bo ene ñenua ole gire ñenua gerudu kirolla ole: “Cha kirolla, ba me ka boi ene cha ole, ba diali kle cha ole, lle chanu ulita banu. 32 Agwa ba daballa jogebanga ama chkuni, noare che ama chuia ollade ta no ole ama ole ule, che nga dbale suga no ama giti, ama jongwa chege, che tañachugu ama jokeda che mi gwageni amadi, agwa nege ama chkuni aini chedige, ama kle gwade malen noare che ba daballa chuia ollade, che mo ta gbale nga suga no chui ollade ba daballa giti” —Jesu geru ñachugu ene ulita kwian fariseo alin kaire kwian daba tkanga tangle Moisés chadalla giti alin.