18
Chube ji kweri gbe kwian ulita una Babiloniamu giti kwian una emu agedu me no gdale
1 Bigire cha gwagedu lle boanga Chube alin nadi lle boanga e chiu dbige nga ngaña giti chie nga dba ai giti, ama kiraske tanre, ama chralla tiendunga nga ulitage gire nga dba ai giti ulita chegu nga chra no giti lle boanga e chralla giti. 2 Lle boanga e ngautu kiraske kweri ene:
“Ulia ulia una kweri Babilonia chegu skianbanga ulita, chegu me no kwian toinga una ege agedu me no kbiale.
Una e chegu dolla oña me no ngle che dolla Satanás chudaboangalla toingwallale kaire una e chegu bdada ulita ji giti me no sugaska jwiale.
3 Una bebi joge skianbanga gire kwian toinga una Babiloniage age salengwli muinga chagenga onbre tanre ole kare, kwian una Babiloniamu kwian na nga ulitamu gbu boi daga ngwale age me no tanre ama kledu age kare.
Kwian chugagwalla ulita nga ulitamu kwian una Babiloniamu suia jun toidu salengwli ulita ama kare age me no tanre.
Kwian una Babiloniamu tadukalin lle tanre ñanaskege ama diali igi kagakalinnga ngwale lle tanre tanre gige gire kwian lle chbadanga lle tanre ñanaske chbadu kwian una Babiloniamuge, e giti kwian lle chbadanga chege igi molen tanre.
Kwian una Babiloniamu kwian na nga ulitamu gbu age ene me no ama kledu age kare gire e kbiale Chube ji gbu kwian toinga una Babiloniage giti.”
Lle boanga Chube alin e gerudu ene ulita cha ole una Babilonia giti.
4 Kaire cha keru na keruchugu gerule nga ngaña gitige ene:
“Ba ulita chanu jogedale siere una Babiloniage, ene ba ulita chanu mi mo ta gbe age me no kwian toinga una ege kle age kare ene ba kwian chanu mi ji chuge age me no kbiale.
5 Kwian una Babiloniamu agedu me no tanre cha dollale, ama agedu me no tanre cha gwa giti, ulita uñale chage.
Sugedale bage cha me ta jonga ama ulita agedu me no gitige, malen cha be ji gbe kwian e giti.”
6 Kaire cha geru keruchugu gerule dare gerule lle boanga Chube alin kwian gbanga ji chuge ole, gerudre ene:
“Ba agedale kwian una Babiloniamu ole ama agedu kwian na tanre ole kare.
Ba ama gbadale boi daga ngwale bitaboke tangle ma ngle tira ama agedu daba olege.
Ba lle gage tugenga moske bitaboke tangle ma tirare ama lle gage tugunga kwian na alin jadalege.
7 Kwian ulita toinga una Babiloniage mo gbu kweri mo sobadu kwian toinga nga nagedi, ama toidu lle ñanaske tanre giti lle ulita ama tadukalinge ama gigu, ama mo gbu kweri e giti.
Ama mo sobadu mangire batre dabadi ama toidu lle ñanaske tanre ole mangire batre, e batre kaire ene agwe ba ama gbadale boi daga ngwale chege ta olire tanre ole.
Diali kwian ulita una Babiloniamu tañachugu mo tale mo giti naskuni ene: ‘Cha ulita una Babiloniamu cha kwian nga ulitamu chugagwalla kweri, cha ulita no trate.
Cha me chege dale muinga kle chege gballa kare, cha mi chege ta olire ole, lle ulita kle cha ole, cha mi boi daga ngwale dale.’
Kwian toinga una Babiloniage tañachugu ene mo gbe tangle kwian nadi suge moge kweri.
8 Malen e giti blikare chui gbaitre alinge ji be kle gbaba ama giti ene: Ama gweale be jogekeda, na be chege ama oliade, ama be bli chuge tanre, kaire ama be joge gugaba jitaske.
Ulia cha Chube no trate kiraske cha kwian Chugagwalla kweri ji gbanga kwian giti age me no gdale, cha be ji gbe tirare kwian una Babiloniamu giti kwian agedu cha dollale kbiale.”
Keru sugedu chage nga ngaña giti gerudu ene ulita lle boanga Chube alin kwian gbanga ji chuge ole.
9 Kwian chugagwalla nga ulitamu kwian una Babiloniamu suia jun toidu salengwli ulita ama kare age me no tanre nga suga no ole mo chuge ke giti onbre muinga ole muinga onbre ole. Kaire kwian chugagwalla ulita e sui jun toi lle tanre ñanaske ole salengwli kwian una Babiloniamu kare. Chube ji gbu kwian una Babiloniamu giti gire kwian chugagwalla nga ulitamu gwagedu una Babiloniadi boi tirare daga ngwale gwagedu una kuge jiangwalladi chie bdugu jitaske, gire kwian chugagwalla nga ulitamu ta olidu tanre kwian una Babiloniamu giti. 10 Kwian una Babiloniamu boidu tirare daga ngwale ene agedu me no gdale gire kwian chugagwalla ulita ama skatemanallale chegu ta kennga gwage amadi bate, ama gerudu ene:
“Ulia ulia cha ulita tai dage bage ba ulita toinga una Babiloniage, una Babilonia kweri noare agwa sugetibi allabi hora gdaitre alinge ji chku gbaba ba ulita giti ba agedu me no me no Chube dollale kbiale.”
Kwian chugagwalla nga ulitamu kwian una Babiloniamu skatemanallale gerudu ene kwian toinga una Babilonia giti.
11 Kaire kwian ulita lle chbadanga kwian una Babiloniamuge ama olidu mo suia junnga ta olire ole kwian una Babiloniamu kledu boi giti, sugedu kwian lle chbadangage kwian una Babiloniamu me ñadu lle gige amage dare, malen e giti kwian lle chbadanga chegu ta olire tanre. 12 Ama lle ulita chbadu kwian una Babiloniamuge, ama lle ai kare chbadu: Lle ñanaske kada oro, igi dodaba llere, kechuga ñanaske gwadenga no, lle igigwa gba kweri kare kada perla, ñometra noare ñanaske tanre, ñometra chada lénrennga kaire ñometra chada dabere, gli tanre no ñanaske, gli e ñachke no, lle ai ulita chbadre kwian una Babiloniamuge. Kaire bda elefante dau kweri, gli ñanaske, lle mno kada bronce, hierro, kechuga noare kada mármol, lle ai ulita ñanaske jo dodabale lle tanrere. Lle ai ulita ñanaske chbadre kwian una Babiloniamuge. Kaire agwe lle na tanre chbadre kwian una Babiloniamuge lle e ulita kada ene: 13 Lle tanre ñachke no kada canela kaire mirra kaire olíbano kaire lle kinre gugadale ñachke no kada incienso, lle e ulita chbadre. Kaire lle bligdale tanre chbadre ene: Lle gage jadale kada vino, gli kada olivo kin, chude gutale kada trigo, kaire trigo mnuñale. Kaire lle bdale chbadre ene: Chbi, bda oveja, ja kaire carro lugakle jadi ja kle carro e dbe. Kaire kwian lle boanga tanre onbrenu muirenu chbadre kwian una Babiloniamuge. Lle ai ulita kwian lle chbadanga chbadu kwian una Babiloniamuge agwa me ñadu chbade dare. Kwian una Babiloniamu chegu me lle giganga dare. 14 Kwian lle chbadanga ulita gerudu kwian una kweri Babiloniamu giti ene:
“Nege ba una Babiloniamu me kle chege toi ngeru kare.
Lle ulita ba tadukalinge ba lle tanre ñanaske e gigu chage, agwa lle ulita e jonga ngwale.
Nege ba me chegu lle molen ngeru kare, ba chegu kwian me lle molen kare diali chui tangle.”
Kwian lle chbadanga gerudu ene ulita kwian una Babiloniamu giti.
15 Kwian lle chbadanga kledu lle tanre ñanaske chbade kwian una Babiloniamuge, lle e ñana giti kwian lle chbadanga ulita chegu igi molen tanre. Kwian una Babiloniamu ji chugu chuiage kwian lle chbadanga chegu batre kwachie, ama ulita olidu ta chegu dage ulita kwian una Babiloniamu kledu boi giti, 16 gire ama ulita gerudu ene:
“Ulia ulia una Babilonia una kweri, agwa cha tai dage kwian una emuge ama kle ji chuge giti.
Kwian toinga una ege kle chege salengwli muinga mo ngama tke no kare muinga kle mo ngama tke ñometra no kwangleare giti ñometra e chada lénrennga kaire chada dabere, ama kle chage mo gbagataba no oro chrachienga no kwangle giti, kaire ama mo dodaba ulita jegwale lle ñanaske giti lle igigwa gba kweri kare kada perla giti kaire kechuga soli gwadenga no giti.
Muinga e kare ene kwian una Babiloniamu ulita kledu toi.
17-18 Agwa ulita sugetibi allabi hora gdaitre alinge ji gbere una e giti kwian toinga una ege agedu me no kbiale, una e chegu skianbanga ulita, kwian toinga una ege llea ulita jonga ngwale.”
Kwian lle chbadanga ulita gerudu ene ulita kwian una Babiloniamu giti.
Kwian ulita du dbanga kaire kwian ulita chagenga du e ulitage, kaire kwian ulita du mananga kaire kwian ulita kle lle boi blege ene ama ñage igi gai toigda, ama ulita kaire agwe gwagedu una Babiloniadi bole daga ngwale gugle, gwagedu una jiangwalladi chie bdugu jitaske, gire ama chegu bate una Babiloniage chru ole. Ama ulita gerudu ene: “Ni una na gdaite chege no kweri una Babilonia kledu kare.” 19 Ama ulita gerudu ene, gire ama ulita dbi mnuña batu mo chuga giti ta olire tanre ole, ama mo suia junnga ta olire ole kwian una Babiloniamu giti, gire ama ulita ngautu kweri gwangerugu ene:
“Ulia cha tai dage bage ba ulita toinga una kweri ege.
Ba ulita kledu lle molen tanre, ba giti kwian du mauña chegu igi molen tanre agwa ulia sugetibi allabi hora gdaitre alinge ji gbere ba giti ba agedu me no Chube dollale kbiale, ba toingwa chegu skianbada ulita chegu me no, ba llea ulita jonga ngwale.”
Kwian e ulita gerudu ene una Babilonia giti.
20 Chube ji gbu kweri kwian toinga una Babiloniage giti kwian e agedu me no kwian Chubenu dollale gdale, malen e giti kwian ulita kle toi nga ngaña giti Chube ole kwian Jesucristo gerua ganga ulita, kwian ulita Jesucristo gerua ketanga dabage, kwian ulita Chube gerua ketanga, ama ulitadi nga sugadale no Chube agedu kwian una Babiloniamu ole giti. Chube kwian ulita amanu jia junnga kwian una Babiloniamuge.
21 Lle boanga Chube alin gdaite kiraske tanre ama kechuga gbaite kweri gau ngaña kodi, kechuga e chege salengwli kechuga kweri kweri lle gweale ugagda kare. Lle boanga kechuga e mliu bleske, ama gerudu ene:
“Ke ai cha mliu bleske e kare ene una Babilonia be chege skianbada ulita chege me no diali dale alin, ni una e be chege naskuni ngeru kare.
22 Ni una ege dare kwian be lle gitarale kada arpa dagenga, ni kwian be ngwane dare una ege lle ngwanegda gdaite kada flautage ni lle ngwanegda gdaite kada trompetage, ni kwian gdaite be chege lle boanga una ege, ni kwian be chege lle gweale uge kechuga giti dare una ege.
23 Ni jichra be gwadenga dare una ege, ni kwian be mo jwen chuia ollade dare una ege.
Kwian lle chbadanga ulita kledu toi una Babiloniage ama chegu ma kweri kwian lle chbadanga nga na ulitamuge, agwa nege ama kle ji chuge daga ngwale.
Kwian una Babiloniamu kwian nga na ulitamu anblitu ngwale geru me nodi, ama kwian ta gbu age me no dolla Satanás kirallaske daba na gbe jiske.
E giti ama ulita kle ji chuge tirare.”
Lle boanga Chube alin kechuga mliu bleske gerudu ene ulita una Babilonia giti.
24 Una Babilonia ege kwian Chube gerua ketanga guleda tanre kaire kwian Chubenu na guleda tanre una ege. Kaire kwian ulita mangire batre jo gwabada nga ulita nga dba ai giti ama ulita guleda ne ngwadi, e kbiale Chube be ji gbe tirare kwian toinga una ege giti.