1 Gathek ro khuiinothek nane bumuiithek, Hamangkhung-aphuii ro bushun ne Mesidonia pha charch shii khi-èrek ne jong pha ji shii ne gu nathek shii ìd yi pha now ro. 2 Ithek ne bajo diig pha ji shii de chai srane; chiih-è ithek ne dusho magungde, jimagunde ithek ro lubo ne bajo rey srane, ithek ne awaithek miphi jishii lububo rek ne phi. 3 Gu nathek shii nyayao mua ithek è khama phi mua pha ji phi, chiih-è awaithek khama phi mua pha ji è muna phi. Awaithek lum ne yang pha ji phi 4 ithek è gathek shii khung ne yao, Judea pha Hamangkhung-aphuii ro branthek shii nong mua phi pha chua gathek shii de um yi bo. 5 Hì ne gathek è luthong pha ji è de bajo ro! Igobi ithek ne awaithek shii Ithong shii phi; chiih-è chiihphado è Hamangkhung-aphuii miiyang è ithek ne awaithek shii wie è gathek shii phi muii. 6 Ji-è hanyie è hì pha blia shii jao pha Thaidas shii gathek è khung, hì pha miie pha wie blia shii zab rek ne na shii nong phi ne wiwi rek yi. 7 Migi shii, miyao shii, chiih-è khani shii, nong phi pha nathek ro yang chiih-è nathek ro miie gathek shii um pha ji ne zab bajo bohkhoh ro. Ji-è gu nathek shii hì pha miie pha blia shii lubu hong boh ne yang ro.

8 Gu khohthek pha ji shii arab arek ro. Jishii gaithek shii khi-èrek ne yang ne nong phi pha ji doh yi, gu ne nathek ro miie jine khi-èrek ne izai ji doh pha bidiang ro. 9 Nathek ne gathek ro Ithong Isu Masi ro bushun ne thieg; nathek shii bohkhoh rab pha awai shii dusho rab, ai ne bohkhoh magunde, ai ne nathek chiang awai shii dusho rab.

10 Gu è now pha ji ne hì ro nathek è biichiie pha idam shii nyie jao pha ji ne thuh shii jong pha rek pha ji ne nathek shii wie ro. Blia asi doh bie pha jishii nathek ne blia rek pha yang pha ji shii nathek ne igobi ro. 11 Chiihphado, ai rog shii rai srane ji pha blia shii jong bo! Chiih-è nathek khi-èrek ne phak pha ji duiine zab ne jong pha yang bo, chiih-è thuh na shii nyie um pha ji rog shii rek bo. 12 Na è phi yang arone, na è nyie phi pha ji shii Hamangkhung-aphuii è naro lasen choi ruii phro, na è nyie aphi pha ji è asi ro.

13-14 Gune gai shii isloi thoh ne nathek shii mahan han yi pha abidiang ro; hì pha ishak shii ne nathek shii zab um ro, nathek ne ithek oi pho shii nong phi hì ne izai blia ro. Chiihphado, nathek è chid mage shii nathek shii zab um ruii, nathek è ithek shii nong ruii phro, hì duiine nyimanyi shii ne ò riig ro. 15 Jigigam shii yao pha duiine, “Hanyie è bajo khrab arone bajo oi phro, chiih-è hanyiejia è ìujia khrab pha ji shii bajo ìujia oi phro.”

16 Gathek è nathek shii nong phi pha duiine Thaidas shii yang ne rab pha Hamangkhung-aphuii shii laso phi! 17 Ai è gathek è khung pha ji shii nuii bie pha ji asi pha, ai ne gethek shii nong phi pha bajo yang ne awailum ne nathek shii wuii pha phak. 18 Ai rog shii gathek è khuiino jia thoh ge. Nyieliieshii ai muawie yua pha blia chiang è aishii ne zab pha charch è boh ilab phi. 19 Ji è de, aishii ne guajong chiih-è Ithong ro biisiie chiang è hì pha blia pha miie ne gethek è han pha duiine gethek rog shii lua pha nane charchthek è bow jong ro.

20 Gethek è miie pha lasen jia wad hà yie shii hanyie ji shii suanghàw arek yi pha gethek ne bajo gayiig ne rek ro. 21 Gethek ro blia ne Ithong mieg shii asi bie pha jishii branthek miie shii nyie rangsua ji pha ro.

22 Ji-è gathek ne ithek rog shii gathek ro khuiino thoh ge ro; gathek è aishii blebbleb chai, chiih-è ai ne idang nong phi pha yang pha doh. Chiih-è thuh ai ne nathek shii bajo luthong, ai ne zab e muna ne nong phi pha yang ro. 23 Thaidas ne, ai ne guro ijak nane nathek shii nong phi pha gu rog shii blia rek gieng; gai khuiinothek duiine hanyie è ai rog shii wuii gieng, ithek è jijia charchthek pha bran ro chiih-è Masi ro biisiie shii yi. 24 Nathek ro miie ne ithek shii doh yi bo, jiè zab pha charchthek ne izai ìd ne chiih-è gethek ne ithek chiang shii nyigodog rek pha rangsua chak rone thieg yi bo.