HEBRIUTHEK shii Jigigam.
1.
Buyo Hamangkhung-aphuii è bajo ishak chiih-è chaigthek pha ji è bajo lumuii è gethek blangthek yao ro, 
jishii thuh pha iidohè pha inai shii ne awai dufuii ji è gethek shii yao ro. Ai jia chiang è Hamangkhung-aphuii è hamangnyiak shii rab ro, chiih-è iidohè shii zab pha manathek shii muspho rey pha Hamangkhung-aphuii è gua ro. 
Ai ne Hamangkhung-aphuii ro biisiie pha chuang pha ji shii mia ro chiih-è jine Hamangkhung-aphuii awai chai duiine rey yi, airo bohbluthek miyaogamthek è hamangnyiak hà rai yie ro. Zab bran ro layog shii khung phi pha ji rey ched pha iidoh è, ai ne hamangkhung hà Hamangkhung-aphuii ro giu blu um pha phazoi hà dug dun ro. 
Hamangkhung-aphuii è aishii ithek è de bajo boh ibeng phi pha duiine, Dufuii ne hamangkhliiethek è de bajo boh rab phi ro. 
Hamangkhung-aphuii ne khuchung de hanyie hamangkhliiethek shii ayao, “Nathek gu dufuii ro; Sudoh gu ne nathek Aphuii rey ruii.” Hamangkhung-aphuii è hanyie hamangkhliiethek chiang shii ayao ro, “Gune ai Aphuii rey ruii, chiih-è ai ne gu Dufuii rey ruii phro.” 
Jishii Hamangkhung-aphuii è awai ro igobigiak pha Dufuii shii sohjambling hà thoh shii, ai è yao, “Zab Hamangkhung-aphuii ro hamangkhliiethek aishii misiasia chid phro.” 
Jishii hamangkhliiethek chiang shii Hamangkhung-aphuii è yao, “Hamangkhung-aphuii è airo hamangkhliiethek ne hasamthek rab, chiih-è airo khiaothek shii ne bai hang pha rab phro.” 
Jishii Dufuii chiang shii, Hamangkhung-aphuii è yao: “Hamangkhung-aphuii wo naro Sajathua, ne, idang nane idang rey bo! Na ne nawai branthek rog shii isiie è kho ro. 
Na ne nyie shii rangsua ji shii miie chiih-è nyie yi asi jishii khiijai. Ji pha chiang è Hamangkhung-aphuii, na ro Hamangkhung-aphuii è na shii gua chiih-è ilab pha lubo ne ai è na iijiiakthek shii phi pha ji è de bajo boh na shii phi ro.” 
Ai ne hì de yao, “Ithong, na ne, igobi sohnyiak shii rab, chiih-è nawai ro wad sbang è hamangkhung shii rab. 
Ithek ne sand ruii phro, jishii na ne asand ruii phro; ithek ne zab yungthek duiine ihèg rey dun. 
Na ne ithek shii phadiig duiine jiangmuii phro, chiih-è ithek ne yungthek duiine laidun. Jishii na ne idang pha duiine ò ro, chiih-è naro chai ne khuchungde ajong.” 
Naro makpho shii “Naro lai iliing hà aruii sapho shii ne Guro phazoi hà dug bone: Hamangkhung-aphuii ne awai ro hamangkhliiethek hanyie shii magunde khuchungde ayao ro.” 
Ji-anine, hamangkhliiethek ne nyie ga? Ithek ne ragungthek hanyie è Hamangkhung-aphuii ro blia rek chiih-è hanyie è giawo shii choi pho shii nong yi pha aishii thoh ge.